Salmo 32:1-11
Iya ni David. Masʹkil.
32 Malipayon siya kansang kalapasan gipasaylo, kansang sala gitabonan.+
2 Malipayon ang tawo nga kaniya wala ipahamtang ni Jehova ang kasaypanan,+Ug sa iyang espiritu walay panglimbong.+
3 Sa dihang ako naghilom ang akong mga bukog nagabok sa akong pag-agulo sa tibuok adlaw.+
4 Kay sa adlaw ug sa gabii mabug-at ang imong kamot sa ibabaw nako.+Ang kaumog sa akong kinabuhi nailisan ingon sa uga nga kainit sa ting-init.+ Seʹlah.
5 Sa kataposan gisugid ko kanimo ang akong sala, ug wala ko taboni ang akong kasaypanan.+Miingon ako: “Isugid ko kang Jehova ang akong mga kalapasan.”+Ug ikaw mismo nagpasaylo sa pagkadaotan sa akong mga sala.+ Seʹlah.
6 Tungod niini ang tanang maunongon magaampo kanimo+Sa panahon lamang nga ikaw mahimong makaplagan.+Mahitungod sa baha sa daghang katubigan, dili gayod kini makaabot kaniya.+
7 Ikaw usa ka tagoanang dapit alang kanako; panalipdan mo ako gikan sa kasakitan.+Uban ang hugyaw sa kalipay tungod sa pagtaganag kaikyasan pagalibotan mo ako.+ Seʹlah.
8 “Ihatag ko kanimo ang hait nga salabotan ug tudloan ko ikaw sa dalan nga imong pagalaktan.+Ihatag ko ang tambag nga ang akong mata magatan-aw kanimo.+
9 Ayaw kamo pagpanig-ingon sa usa ka kabayo o sa mula nga walay pagsabot,+Kansang kaliksi pagapugngan sa busal o sa renda+Sa dili pa sila makaduol kanimo.”+
10 Daghan ang kasakit sa tawong daotan;+Apan siya nga nagasalig kang Jehova, pagalibotan siya sa mahigugmaong-kalulot.+
11 Pagmaya diha kang Jehova ug paglipay, kamong mga matarong;+Ug panghugyaw nga malipayon, kamong tanan nga matul-id sa kasingkasing.+
