യുവജനങ്ങൾ ചോദിക്കുന്നു
എനിക്ക് എങ്ങനെ തടി കുറയ്ക്കാം?
ഞാൻ ശരിക്കും തടി കുറയ്ക്കണോ?
തടി കുറയ്ക്കണമെന്നു പല ചെറുപ്പക്കാർക്കും ആഗ്രഹമുണ്ട്. പക്ഷേ . . .
പലരും ആരോഗ്യമല്ല ആകാരമാണു നോക്കുന്നത്. തടി കുറയ്ക്കാനുള്ള എളുപ്പമാർഗമായി പലരും കണ്ടിരിക്കുന്നതു ഭക്ഷണം കഴിക്കാതിരിക്കുക, തടി കുറയ്ക്കാനുള്ള മരുന്നു കഴിക്കുക ഇതൊക്കെയാണ്. അത്തരം കുറുക്കുവഴികൾ നമുക്കു പ്രയോജനം ചെയ്യണമെന്നില്ല. ചിലപ്പോഴൊക്കെ അതു വലിയ അപകടവും വരുത്തിവെച്ചേക്കാം.
“ചില പെൺകുട്ടികൾ പെട്ടെന്നു തടി കുറയ്ക്കുന്നതിനുവേണ്ടി പട്ടിണി കിടക്കുന്നു. ഇതു ശരിക്കും അവരുടെ ശരീരത്തിനു വലിയ ദോഷം ചെയ്യും. പിന്നെ ശരീരം പഴയപടിയാകാൻ ഒരുപാട് സമയം എടുക്കും.”—ഹെയ്ലി.
തടി എന്നു പറയുന്ന പലർക്കും തടിയില്ല. പലരുടെയും പ്രശ്നം അവർ അവരെ കൂട്ടുകാരുമായി താരതമ്യം ചെയ്തുനോക്കുന്നതാണ്. ഇനി മാധ്യമങ്ങൾ ഏറെ ഭംഗിയെന്നു വിശേഷിപ്പിക്കുന്നതു മെലിഞ്ഞിരിക്കുന്നവരെയാണ്. ആ താരങ്ങളെക്കാൾ അല്പം തടി കൂടിയാൽ അതും അവർക്കു പ്രശ്നമാണ്.
“എനിക്ക് 13 വയസ്സുള്ളപ്പോൾ ഞാൻ എന്നെയും കൂട്ടുകാരെയും താരതമ്യം ചെയ്തുനോക്കാൻതുടങ്ങി. ഞാൻ അവരെപ്പോലെ ആയിരുന്നെങ്കിൽ അവർക്ക് എന്നെ ഇഷ്ടപ്പെട്ടേനെ എന്നു ഞാൻ ചിന്തിച്ചു. പക്ഷേ അതിനു ഞാൻ കോലുപോലെ മെലിയണമായിരുന്നു.”—പവോലാ.
അതേസമയം അനേകം ചെറുപ്പക്കാർക്കും അമിതഭാരം ഒരു യഥാർഥ പ്രശ്നംതന്നെയാണ്. ലോകാരോഗ്യ സംഘടനയുടെ ഒരു റിപ്പോർട്ട് പറയുന്നതനുസരിച്ച് . . .
ലോകവ്യാപകമായി 5 വയസ്സിനും 19 വയസ്സിനും ഇടയിലുള്ള 34 കോടി യുവപ്രായക്കാർ അമിതഭാരമുള്ളവരാണ്.
1975-ൽ 5-നും 19-നും ഇടയ്ക്കു പ്രായമുള്ള കുട്ടികളിൽ പൊണ്ണത്തടിയുള്ളത് 4 ശതമാനത്തിനായിരുന്നെങ്കിൽ 2016-ൽ അത് 18 ശതമാനമായി വർധിച്ചിരിക്കുന്നു.
ലോകത്തിന്റെ പല ഭാഗത്തും തൂക്കക്കുറവുള്ളവരെക്കാൾ പൊണ്ണത്തടിയുള്ളവരാണു കൂടുതൽ.
വരുമാനം കുറവുള്ള രാഷ്ട്രങ്ങളിലും പൊണ്ണത്തടി സാധാരണമാണ്. അവിടങ്ങളിൽ വേണ്ടത്ര പോഷകമൂല്യമുള്ള ഭക്ഷണം കിട്ടാത്ത കുടുംബങ്ങളിലെ ചിലർക്കുപോലും പൊണ്ണത്തടിയുണ്ട്.
തടി കുറയ്ക്കാനുള്ള ഏറ്റവും നല്ല വഴി എന്താണ്?
നിങ്ങൾ എന്തു ചെയ്യും?
ചില നേരത്തെ ഭക്ഷണം ഒഴിവാക്കും.
സമീകൃതാഹാരത്തോടൊപ്പം വ്യായാമവും ചെയ്യും.
തടി കുറയ്ക്കാനുള്ള മരുന്നു കഴിക്കും.
ശരിയായ ഉത്തരം, രണ്ടാമത്തേതാണ്: സമീകൃതാഹാരത്തോടൊപ്പം വ്യായാമവും ചെയ്യും.
ചില നേരം ഭക്ഷണം കഴിക്കാതിരിക്കുന്നതോ ചില തരം ഭക്ഷണസാധനങ്ങൾ ഒഴിവാക്കുന്നതോ ഒക്കെ പെട്ടെന്നു ഫലം ചെയ്തേക്കാം എന്നതു ശരിയാണ്. എന്നാൽ അതൊന്നും ആരോഗ്യത്തിനു ഗുണം ചെയ്യണമെന്നില്ല. ഒരിക്കൽ നിങ്ങളുടെ പഴയ ഭക്ഷണരീതിയിലേക്കു മടങ്ങുമ്പോൾ പോയ തടി പിന്നെയും വരും.
അതുകൊണ്ട് ഭക്ഷണം ഒഴിവാക്കുന്നതിനെക്കാളും നല്ലത് ആരോഗ്യത്തിനു പ്രാധാന്യം കൊടുക്കുന്നതായിരിക്കും. അതു നിങ്ങളുടെ ശരീരത്തിനും മനസ്സിനും ഉണർവും ഉന്മേഷവും തരും. ഡോ. മൈക്കിൾ ബ്രാഡ്ലി a പറയുന്നു: “നിലനിൽക്കുന്ന പ്രയോജനം ലഭിക്കണമെങ്കിൽ നിങ്ങൾ ജീവിതശൈലിക്കുതന്നെ മാറ്റം വരുത്തണം. അതു നിങ്ങളുടെ ജീവിതകാലം മുഴുവൻ തുടർന്നുകൊണ്ടുപോകാനും പറ്റണം. . . . ഏറ്റവും സുരക്ഷിതവും ആരോഗ്യകരവും ആയ രീതി അതാണ്.” മനസ്സിൽപ്പിടിക്കേണ്ട ആശയം എന്താണ്? നിങ്ങൾ തടി കുറയ്ക്കാൻ ആഗ്രഹിക്കുന്നെങ്കിൽ ഏതെങ്കിലും പ്രത്യേക ഭക്ഷണരീതിയിലേക്കു മാറുന്നതിനെക്കാൾ നല്ലതു നിങ്ങളുടെ ജീവിതശൈലിക്കു മാറ്റം വരുത്തുന്നതായിരിക്കും.
നിങ്ങൾക്ക് ചെയ്യാനാകുന്നത്?
‘ശീലങ്ങളിൽ മിതത്വം പാലിക്കാൻ’ ബൈബിൾ പറയുന്നു. അതിൽ ഭക്ഷണശീലങ്ങളും ഉൾപ്പെടുന്നു. (1 തിമൊഥെയൊസ് 3:11) അമിത ഭക്ഷണം ഒഴിവാക്കുന്നതിനെക്കുറിച്ച് അത് എടുത്തു പറയുന്നുണ്ട്. (സുഭാഷിതങ്ങൾ 23:20; ലൂക്കോസ് 21:34) ആ തത്ത്വങ്ങൾ മനസ്സിൽപ്പിടിച്ചുകൊണ്ട് പിൻവരുന്ന കാര്യങ്ങൾ പരീക്ഷിച്ചുനോക്കുക. അതു നിങ്ങൾക്ക് ആരോഗ്യകരമായ ജീവിതശൈലി സമ്മാനിക്കും.
ആരോഗ്യം തരുന്ന ഭക്ഷണസാധനങ്ങൾ എന്തൊക്കെയാണെന്നു മനസ്സിലാക്കുക.
ഇതിനെക്കുറിച്ച് ചിന്തിച്ച് വളരെയധികം തലപുകയ്ക്കേണ്ടതില്ലെങ്കിലും പോഷകപ്രദമായ ആഹാരം ഏതൊക്കെയാണെന്ന് അല്പമെങ്കിലും മനസ്സിലാക്കിവെക്കുന്നതു സമീകൃതാഹാരം കഴിക്കാൻ നിങ്ങളെ വളരെ സഹായിക്കും. തടി കൂടാതിരിക്കാനുള്ള മികച്ച മാർഗങ്ങളിൽ ഒന്നാണ് സമീകൃതാഹാരം കഴിക്കുന്നത്.
മുടങ്ങാതെ വ്യായാമം ചെയ്യുക.
ഊർജസ്വലതയോടെ ഇരിക്കാൻ ദിവസവും എന്തൊക്കെ കാര്യങ്ങൾ ചെയ്യാൻ പറ്റും എന്നതിനെക്കുറിച്ച് ചിന്തിക്കുക. ഉദാഹരണത്തിന്, ലിഫ്റ്റ് ഉപയോഗിക്കുന്നതിനു പകരം പടികൾ കയറിപ്പോകാൻ തീരുമാനിക്കുക. മൊബൈലിൽ ഗെയിം കളിക്കാൻ ഉപയോഗിക്കുന്ന സമയത്തിൽനിന്ന് അര മണിക്കൂറെങ്കിലും നടക്കാൻ പോകുന്നതിനുവേണ്ടി ഉപയോഗിക്കാനാകുമോ?
വറപൊരിക്കും മറ്റും പകരമായി പോഷകാഹാരം കഴിക്കുക.
“ശരീരത്തിനു ഗുണം ചെയ്യാത്ത ഭക്ഷണസാധനങ്ങൾ ഒരുപാട് കഴിക്കാനുള്ള പ്രലോഭനത്തെ ചെറുക്കാൻ പോഷകമൂല്യമുള്ള പഴങ്ങളോ പച്ചക്കറികളോ പോലുള്ള ഭക്ഷണസാധനങ്ങൾ എപ്പോഴും എന്റെ അടുത്തുതന്നെ വെക്കും” എന്ന് കൗമാരപ്രായത്തിലുള്ള സോഫിയ പറയുന്നു.
സാവകാശം കഴിക്കുക.
വയറു നിറഞ്ഞെന്ന് ശരീരം നൽകുന്ന സന്ദേശം “കേൾക്കാൻ” കഴിയാത്തത്ര വേഗത്തിലാണു ചില ആളുകൾ ഭക്ഷണം കഴിക്കുന്നത്. അതുകൊണ്ട് സാവകാശം ഭക്ഷണം കഴിക്കുക. രണ്ടാമത് എടുക്കുന്നതിനു മുമ്പ് നന്നായി ഒന്നു ചിന്തിക്കുക. നിങ്ങൾ വിചാരിക്കുന്നത്ര വിശപ്പ് ഒരുപക്ഷേ നിങ്ങൾക്ക് ഉണ്ടായിരിക്കില്ല.
എത്ര കലോറി കഴിച്ചെന്ന് നോക്കുക.
നിങ്ങളുടെ ഭക്ഷണത്തിൽ എന്തുമാത്രം കലോറി അടങ്ങിയിരിക്കുന്നു എന്നറിയാൻ ചേരുവകളെക്കുറിച്ചുള്ള വിശദാംശങ്ങൾ വായിച്ചുമനസ്സിലാക്കുക. ഉദാഹരണത്തിന്, മധുരപാനീയങ്ങൾ, മധുരപലഹാരങ്ങൾ, ഫാസ്റ്റ്ഫുഡ് ഇവയിലൊക്കെ ഒരുപാട് കലോറി അടങ്ങിയിരിക്കുന്നു. ഇതു തടി കൂടാൻ ഇടയാക്കും.
പരിധി വിടരുത്.
16 വയസ്സുള്ള സാറ പറയുന്നു: “ഒരിടയ്ക്ക് എന്റെ മുമ്പിൽ ഭക്ഷണം വന്നുകഴിഞ്ഞാൽ അതിൽ എന്തുമാത്രം കലോറി അടങ്ങിയിട്ടുണ്ടാകും എന്ന ടെൻഷനായിരുന്നു എനിക്ക്.” എന്നാൽ വല്ലപ്പോഴും ഒക്കെ അല്പം കലോറി കൂടിയ ഭക്ഷണം കഴിക്കുന്നതിൽ തെറ്റില്ല.
നുറുങ്ങ്: തടി കൂടുന്നതിനെക്കുറിച്ച് നിങ്ങൾക്കു തോന്നുന്ന ഉത്കണ്ഠകളൊക്കെ ഒരു ഡോക്ടറോടു പറയുക. നിങ്ങളെ നന്നായി അറിയാവുന്ന ഒരു ഡോക്ടർക്കു നിങ്ങളുടെ ആരോഗ്യത്തിനു പറ്റുന്ന ഒരു ജീവിതശൈലി എങ്ങനെ തിരഞ്ഞെടുക്കാം എന്നതിനെക്കുറിച്ച് പറഞ്ഞുതരാൻ പറ്റും.
a കൗമാരപ്രായക്കാർ ആശയക്കുഴപ്പത്തിലാകുമ്പോൾ (ഇംഗ്ലീഷ്) എന്ന പുസ്തകത്തിൽനിന്ന്.