Salmo 69:1-36
Para sa direktor nin musika; nasa tono kan “An mga Liryo.” Salmo ni David.
69 Iligtas mo ako, O Diyos, ta namemeligro an buhay ko huli kan katubigan.*+
2 Luminubog ako sa hararom na laboy, na mayo nin matagas na matutungtungan.+
Napasa hararom na katubigan ako,Asin inanod ako kan nagraragasang sulog nin tubig.+
3 Pagal-pagal na ako sa kakaapod;+Napaas na an sakong halunan.
Nagrumarom na an sakong mga mata mantang naghahalat sa sakuyang Diyos.+
4 An mga nauungis sa sako na daing dahilan+Mas dakul pa kisa sa mga buhok kan sakong payo.
An mga gusto akong gadanon,Su mga traydor kong kalaban,* nagin nang dakul.
Pinirit ninda akong isuko an mga dai ko man hinabon.
5 O Diyos, aram mo an sakong kalulungan,Asin dai natatago sa saimo an sakong kasalan.
6 Lugod na an mga naglalaom sa saimo dai mapasupog huli sa sako,O Soberanong Kagurangnan, Jehova na pamayo nin mga hukbo.
Lugod na an mga naghahanap sa saimo dai mapasupog huli sa sako,O Diyos kan Israel.
7 Nagtios ako nin panunuya huli sa saimo;+An pagkasupog tuminahob sa lalawgon ko.+
8 Nagin akong sarong estranghero sa sakong mga tugang,Sarong dayuhan sa mga aki kan sakong ina.+
9 An kaigutan para sa saimong harong naglaad sa laog ko,+Asin an mga panunuya kan mga nagtutuya sa saimo sinapar ko.+
10 Kan magpakumbaba ako* na may kaibang pag-ayuno,*Pinagtuya-tuya ako.
11 Kan magsulot ako nin telang sako,Pinag-ulog-ulog* ninda ako.
12 Ako an pinag-uulayan kan mga nagtutukaw sa may trangkahan kan siyudad,Asin ako an nagin tema kan mga kanta kan mga paraburat.*
13 Alagad, lugod na an pamibi ko makaabot sa saimo,O Jehova, sa panahon nin pag-ako.+
Huli sa abundang maimbod na pagkamuot mo, O Diyos,Simbaga ako paagi sa masasarigan na mga pagliligtas na ginigibo mo.+
14 Iligtas mo ako sa lamaw;Dai mo ako pabayaan na maglubog.
Iligtas mo ako sa mga nauungis sa sakoAsin sa hararom na katubigan.+
15 Dai mo pabayaan na ianod ako kan nagraragasang baha,+O na halunon ako kan kararuman,O na sarahan ako kan bunganga kan bubon.*+
16 Simbaga ako, O Jehova, ta marahay an maimbod na pagkamuot mo.+
Sigun sa abunda mong pagkahirak umatubang ka tabi sa sako,+
17 Asin dai mo itago sa saimong lingkod an lalawgon mo.+
Simbagon mo tulos ako, ta nasa kasakitan ako.+
18 Magrani ka sako asin iligtas mo ako;*Tubuson mo ako nin huli sa mga kalaban ko.
19 Aram mo kun paano ako tinuya-tuya, hinalian nin onra, saka pinasupog.+
Nahihiling mo an gabos kong kalaban.
20 Linugad nin panunuya an puso ko, asin an lugad dai nauumayan.*
Naglaom ako na may makikidumamay, pero mayo man,+Asin nin mga pararanga, pero mayo akong nanumpungan.+
21 Alagad bilang kakanon tinawan ninda ako nin hilo,*+Asin para sa sakong pagkapaha, tinawan ninda ako nin sukà* para inumon.+
22 Lugod na an saindang lamesa magin litag sa sainda,Asin an saindang abundansiya magin siod sa sainda.+
23 Lugod na an mga mata ninda magdiklom tanganing dai sinda makahiling,Asin an saindang mga piad pirmi mong pakubog-kubugon.
24 Iula mo sa sainda an kaanggutan* mo,Asin abutan lugod sinda kan saimong pagkaungis na nagkakalayo.+
25 Lugod na magin tiwangwang an kampo* ninda;Lugod na mawaran nin nag-iistar an mga tolda ninda.+
26 Huli ta linalapag ninda an saro na saimong kinulgan,Asin padagos nindang isinasaysay an mga pagsakit kan saimong mga linugadan.
27 Dagdagan mo pa nin pagkakasala an saindang pagkakasala,Asin mayo lugod sindang magin kahirasan sa saimong katanusan.
28 Lugod na mapara sinda sa libro kan mga buhay,*+Asin lugod na dai sinda mailista kaiba kan mga matanos.+
29 Alagad nasasakitan ako asin nakukulgan.+
O Diyos, lugod na protektaran ako kan saimong nagliligtas na kapangyarihan.
30 Makanta ako nin mga pag-umaw sa pangaran nin Diyos,Asin ibabantog ko nin may pasasalamat an saiyang kadakulaan.
31 Mas makakapaugma ini ki Jehova kisa sa sarong torong baka,Kisa sa sarong torilyong baka na may mga sungay asin baak an kuko.+
32 Mahihiling ini kan mga mahuyo asin mag-uurugma sinda.
Kamong mga naghahanap sa Diyos, lugod na mabuhayan an saindong buot.*
33 Huli ta nagdadangog si Jehova sa mga dukha,+Asin dai niya hahamakon an nabihag niyang banwaan.+
34 Lugod na umawon siya kan langit asin daga,+Kan mga dagat asin kan gabos na naghihiro diyan.
35 Huli ta ililigtas nin Diyos an Sion+Asin itutugdok niya giraray an mga siyudad kan Juda,Asin mairistar sinda diyan asin magigin sadiri ninda iyan.*
36 An mga gikan kan saiyang mga lingkod mamanahon iyan,+Asin an mga namumuot sa saiyang pangaran+ mairistar diyan.
Mga Nota
^ O “ta an katubigan uminabot na sa kalag ko.”
^ O “mga kalaban ko na mayo man nin dahilan.”
^ O “an kalag ko.”
^ O posibleng “Kan magtangis ako asin mag-ayuno.”
^ Sa literal, “Nagin sarong sarabihon.”
^ O “parabuyong.”
^ O “kalot.”
^ O “Magrani ka sa kalag ko asin bawion mo iyan.”
^ O “asin haros mawaran na ako nin paglaom.”
^ O “nakakahilo (nakakahudong) na tinanom.”
^ O “maalsom na arak.”
^ O “grabeng kaanggutan.”
^ O “napapaderan na kampo.”
^ O “libro nin buhay.”
^ O “puso.”
^ An buot sabihon, an kadagaan.
