Salmo 7:1-17
-
Si Jehova sarong matanos na Hukom
-
“Husgaran mo ako, O Jehova” (8)
-
Panambitan* ni David na inawit niya ki Jehova manungod sa mga sinabi ni Cus na Benjaminita.
7 O Jehova na sakuyang Diyos, sa saimo ako nagpapaili.+
Iligtas mo ako sa gabos na nagpepersegir sa sako asin isalbar mo ako.+
2 Ta kun dai, gugutay-gutayon ninda ako* arog kan ginigibo nin sarong leon,+Asin tatabagon* ako sagkod na mayo nang makakapagligtas sa sako.
3 O Jehova na sakuyang Diyos, kun ako man nakagibo nin kasalan,Kun nagin man akong bakong makatanusan,
4 Kun ginibuhan ko nin maraot an naggibo sa sako nin karahayan,+O kun sinamsaman ko an sakong kalaban* na mayo man nin dahilan,
5 Pabayaing lapagon ako* asin abutan nin sarong kalaban;Pabayaing timak-timakan niya ako* sa daga sagkod na magadanAsin papangyarihon na mapara sa alpog an sakong kamurawayan. (Selah)
6 Tumindog ka huli sa saimong kaanggutan, O Jehova;Atubangon mo tabi an kabangisan kan sakong mga kalaban;+Magmata ka alang-alang sa sakuya, asin ipagbuot mong ipautob an hustisya.+
7 Pabayai an mga nasyon na palibutan ka;Asin mahiro ka laban sa sainda hali sa kaitaasan.
8 Sesentensiyahan ni Jehova an mga tawo.+Husgaran mo ako, O Jehova, sigun sa katanusan ko
Asin sigun sa integridad ko.+
9 An mga karatan kan mga maraot tabi na saimong tapuson.
Pero an saro na matanos tabi na saimong parigunon,+Huling ika an matanos na Diyos+ na nagsisiyasat kan mga puso+ asin kan kauruiraruming mga emosyon.*+
10 An Diyos iyo an kalasag ko,+ an Paraligtas kan mga matanos an puso.+
11 An Diyos sarong matanos na Hukom,+Asin sa aroaldaw, ihinahayag nin Diyos an mga paghukom* niya sa mga maraot.
12 Kun may siisay man na dai magsulsol,+ tinatais niya an saiyang espada;+Kinukurba niya* asin inaandam an saiyang busog.+
13 Ihinahanda niya an saiyang nakakagadan na mga armas;Inaandam niya an saiyang nagkakalayong mga pana.+
14 Hilinga an saro na bados sa karatan;Nangingidam siya nin kariribukan asin nangangaki nin mga kaputikan.+
15 Nagkakalot siya asin mas pinapararom pa iyan,Pero nahuhulog siya sa mismong kalot na ginibo niya.+
16 Mabalik sa saiya mismong payo an ginibo niyang kariribukan;+Mabagsak sa tuktok kan payo niya an saiyang kadahasan.
17 Uumawon ko si Jehova huli sa saiyang hustisya;+Makanta ako nin mga pag-umaw* sa pangaran ni Jehova+ na Kahuruhalangkawi.+
Mga Nota
^ O “Awit nin pagmundo.”
^ O “an kalag ko.”
^ O “lalalayon.”
^ O posibleng “Mantang pinaligtas ko an saro na kinakalaban ako.”
^ O “an kalag ko.”
^ Sa literal, “an buhay ko.”
^ O “na minabalo sa mga puso asin sa mga bato.”
^ O “idinadaklag nin Diyos an mga pagkondenar.”
^ O “Kinakabitan niya nin lubid.”
^ O “Magibo ako nin musika para.”
