Salmo 50:1-23
Salmo ni Asaf.+
50 An Diyos nin mga diyos, si Jehova,*+ nagtaram na;Inaapod niya an dagaPuon sa pigsisirangan kan aldaw sagkod sa pigsusulnupan kaiyan.*
2 Hali sa Sion, na perpekto an kagayunan,+ an Diyos suminirang.
3 An satuyang Diyos maabot asin dai siya magdadanay na silensiyo.+Sa atubangan niya may minatumtom na kalayo,+
Asin sa palibot niya may makusog na bagyo na nangrarapado.+
4 Inaapod niya an kalangitan sa itaas asin an daga,+Tanganing mahukuman an saiyang banwaan:+
5 “Tipuna sa sakuya an mga maimbod sa sako,Sinda na mga nakikipagtipan sa sako paagi sa atang.”+
6 Ibinabalangibog kan kalangitan an saiyang katanusan,Huling an Diyos mismo Hukom.+ (Selah)
7 “Magdangog ka, O sakong banwaan, asin mataram ako;Israel, matestigo ako laban sa saimo.+
Ako an Diyos, an saimong Diyos.+
8 Dai taka sinasagwi huli kan saimong mga atang,Ni huli kan saimong mga bílog na dulot na pigtututong na pirming yaon sa sakong atubangan.+
9 Dai ko kaipuhan kumua nin torong baka sa harong mo,Ni nin mga kanding* sa mga turil mo.+
10 Huli ta sakuya an lambang layas na hayop sa kadlagan,+Dawa an mga hayop sa ibabaw nin sangribong kabukidan.
11 Midbid ko an lambang gamgam* sa kabukidan;+Sakuya an dai mabilang na hayop sa kalangtadan.
12 Kun ako gutom, dai ko iyan sa saimo ipapaisi,Huling sakuya an mabungang daga asin an gabos na yaon diyan.+
13 Kakakanon ko daw an karne nin mga torong bakaAsin iinumon ko daw an dugo nin mga kanding?+
14 Magdulot ka nin pasasalamat bilang saimong atang sa Diyos,+Asin utubon mo an saimong mga promesa sa Kahuruhalangkawi;+
15 Mag-apod ka sa sako sa panahon nin kasakitan.+
Ililigtas taka, asin papamurawayon mo ako.”+
16 Alagad sasabihon nin Diyos sa maraot:
“Ano an deretso mo para isaysay an mga regulasyon ko+O magtaram manungod sa tipan ko?+
17 Ikinakaungis mo baga an disiplina,*Asin pirmi mong binabaliwala* an mga tataramon ko.+
18 Pag nakakahiling ka nin parahabon,* inuuyunan mo siya,*+Asin pirmi kang nakikiiba sa mga parasambay.
19 Ginagamit mo an saimong nguso tanganing ipalakop an maraot,Asin an pandadaya nakadukot sa saimong dila.+
20 Nagtutukaw ka asin nagtataram laban sa sadiri mong tugang;+Ihinahayag mo an mga sála kan* aki kan sadiri mong ina.
21 Kan an mga bagay na ini ginibo mo, nagsilensiyo sana ako,Kaya inisip mong magigin arog lang ako sa saimo.
Pero ngunyan sasagwion taka,Asin sasabihon ko an mga akusasyon ko sa saimo.+
22 Tabi na pag-isipan nindo ini, kamong mga nakakalingaw sa Diyos;+Ta kun dai, gugutay-gutayon ko kamo, asin mayo nin magliligtas sa saindo.
23 An saro na nagdudulot nin pasasalamat bilang saiyang atang nagpapamuraway sa sako,+Asin kun manungod sa saro na marigon na nagsusunod sa tamang dalan,Papangyarihon kong mahiling niya an pagliligtas nin Diyos.”+
Mga Nota
^ O “An Banal na Diyos, an Diyos, si Jehova.”
^ O “Puon sa sirangan sagkod sa sulnupan.”
^ Sa literal, “mga lalaking kanding.”
^ O “bayong.”
^ Sa literal, “iinaapon sa likudan mo.”
^ O “instruksiyon.”
^ O “mahàbas.”
^ O posibleng “minaiba ka sa saiya.”
^ O “Pinapakaraot mo an.”
