Salmo 30:1-12
-
An pagmundo nasalidahan nin pag-ugma
-
Sagkod sa bilog na buhay an pagigin inuuyunan nin Diyos (5)
-
Kanta para sa inagurasyon kan harong. Salmo ni David.
30 Papamurawayon taka, O Jehova, ta hinawas* mo ako;Dai mo tinugutan na mag-ugma an sakong mga kalaban sa pagkakahulog ko.+
2 O Jehova na sakuyang Diyos, naghagad ako sa saimo nin tabang, asin pinaumayan mo ako.+
3 O Jehova, hinawas mo ako* sa Lubungan.*+
Pinagdanay mo akong buhay; ilinigtas mo ako para dai ako mag-irarom sa kalot.*+
4 Magkanta nin mga pag-umaw* ki Jehova, kamong mga maimbod sa saiya,+Magpasalamat sa banal na pangaran* niya;+
5 Huling sa haliputon sanang panahon an mapasairarom sa saiyang kaanggutan,+Pero sagkod sa bilog na buhay an pagigin saiyang inuuyunan.*+
Tibaad may pagtangis sa banggi, pero pagkaaga, may kurahaw nin kaugmahan.+
6 Kan mayo akong problema, sinabi ko:
“Dai ako nuarin man matatanyog.”*
7 O Jehova, kaidtong yaon sa sako an pag-uyon* mo, pinakusog mo ako na arog sa sarong bukid.+
Pero kan itinago mo an lalawgon mo, natakot ako.+
8 Sa saimo, O Jehova, padagos akong nag-apod;+Asin ki Jehova, padagos akong nakimahirak para sa pag-uyon.
9 Ano an pakinabang kan sakong kagadanan,* kan sakong pagbaba sa kalot?*+
Uumawon ka daw kan alpog?*+ Isasaysay daw kaiyan an manungod sa saimong kaimbudan?+
10 Dangugon mo ako, O Jehova, asin kahirakan.+
O Jehova, magin kang sakuyang paratabang.+
11 Sinalidahan mo nin pagbayle an sakong pagmundo;Hinuba mo an sulot kong telang sako, asin kaugmahan an ibinado mo sa sako,
12 Tanganing makakanta ako* nin pag-umaw sa saimo asin dai magdanay na silensiyo.
O Jehova na sakuyang Diyos, uumawon taka sagkod lamang.
Mga Nota
^ O “binaton.”
^ O “an kalag ko.”
^ O “lubungan.”
^ O “Maggibo nin musika para.”
^ Sa literal, “sa girumduman.”
^ O “an pagkamit kan saiyang marahay na buot.”
^ O “masayasay; maripay-dipay.”
^ O “marahay na buot.”
^ Sa literal, “dugo.”
^ O “lubungan.”
^ O “kabo-kabo.”
^ O “an kamurawayan ko.”
