Salmo 145:1-21
Pag-umaw ni David.
א [Aleph]
145 Papamurawayon taka, O sakuyang Diyos na Hadi,+Uumawon ko an saimong pangaran sagkod nuarin pa man.+
ב [Beth]
2 Bilog na aldaw takang uumawon;+Uumawon ko an saimong pangaran sagkod nuarin pa man.+
ג [Gimel]
3 Si Jehova nangungurog asin maninigo nanggad na umawon;+An saiyang kadakulaan dai kayang siyasaton.*+
ד [Daleth]
4 Uumawon kan gabos na henerasyon an saimong mga gibo;Isasaysay ninda an makapangyarihan mong mga ginibo.+
ה [He]
5 Mataram sinda manungod sa mamuraway na kagayunan kan saimong kamahalan+Asin huhurop-hurupon ko an makangangalas mong mga ginibo.
ו [Waw]
6 Mataram sinda manungod sa kahanga-hanga mong mga ginibo,*Asin ipapahayag ko an kamurawayan mo.
ז [Zayin]
7 Mabulak-bugak an mga pag-umaw ninda mantang ginigirumdom an saimong abundang karahayan,+Asin maugma sindang makururahaw huli sa saimong katanusan.+
ח [Heth]
8 Si Jehova mapagmalasakit* asin mahihirakon,+Dai tulos naaanggot asin dakula an maimbod na pagkamuot.+
ט [Teth]
9 Si Jehova marahay sa gabos,+Asin an saiyang pagkahirak hiling-hiling sa gabos na ginigibo niya.
י [Yod]
10 Papamurawayon ka kan gabos mong gibo, O Jehova,+Asin uumawon ka kan mga maimbod sa saimo.+
כ [Kaph]
11 Ibabalangibog ninda an kamurawayan kan saimong pagkahadi+Asin mataram manungod sa saimong kakusugan,+
ל [Lamed]
12 Tanganing ipaisi sa mga tawo an makapangyarihan mong mga ginibo+Asin an mamuraway na kagayunan kan pagkahadi mo.+
מ [Mem]
13 An saimong pagkahadi sarong daing sagkod na pagkahadi,Asin an saimong pamamahala nagdadanay sa gabos na henerasyon.+
ס [Samekh]
14 Inaalalayan ni Jehova an gabos na natutumba+Asin itinitindog an gabos na nakaduko.+
ע [Ayin]
15 An gabos na mata nakahiling sa saimo na naglalaom;Tinatawan mo sinda kan saindang kakanon sa tamang panahon.+
פ [Pe]
16 Ibinubuka mo an saimong kamotAsin pinapaniguan mo an mawot kan lambang bagay na may buhay.+
צ [Tsade]
17 Matanos si Jehova sa gabos na dalan niya+Asin maimbod sa gabos na ginigibo niya.+
ק [Qoph]
18 Harani si Jehova sa gabos na nag-aapod sa saiya,+Sa gabos na sinserong* nag-aapod sa saiya.+
ר [Resh]
19 Pinapaniguan niya an mawot kan mga may pagkatakot sa saiya;+Dinadangog niya an paghagad ninda nin tabang, asin iliniligtas niya sinda.+
ש [Shin]
20 Binabantayan ni Jehova an gabos na namumuot sa saiya,+Pero an gabos na maraot pupuhuon niya.+
ת [Taw]
21 Ipapahayag kan sakuyang nguso an pag-umaw ki Jehova;+Lugod na umawon kan lambang bagay na may buhay* an saiyang banal na pangaran sagkod nuarin pa man.+
Mga Nota
^ O “sabuton.”
^ O “kahanga-hanga mong kapangyarihan.”
^ O “marahay an buot.”
^ O “na sa katotoohan.”
^ Sa literal, “kan gabos na laman.”
