Jeremia 31:1-40
31 Jehofa a re, “Ka nako eo, ke tla nna Modimo wa malapa otlhe a Iseraele, mme bone ba tla nna batho ba me.”+
2 Seno ke se Jehofa a se buang:
“Setšhaba se se falotseng tšhaka se ne sa utlwelwa botlhoko kwa nagengFa Iseraele a ne a ya kwa lefelong la gagwe la go ikhutsa.”
3 Jehofa o ne a iponatsa mo go nna a le kgakala a bo a re:
“Ke go ratile ka lorato lo lo nnelang ruri.
Ke gone ka moo ke neng ka go gogela kwa go nna ka lorato lo lo sa kgaotseng.*+
4 Ke sa ntse ke tla go aga sesha mme o tla agega.+
Wena kgarebane ya Iseraele, o tla letsa meropana ya gago gapeO bo o bina o itumetse.*+
5 O tla jala masimo a morara* gape mo dithabeng tsa Samarea;+Bajadi ba tla jala ba bo ba itumelela go ja maungo a bone.+
6 Gonne letsatsi le tla goroga, la fa balebeledi mo dithabeng tsa Eferaime ba tla tlhaeletsa ba re:
‘Emang, a re tlhatlogeleng kwa Siona, kwa go Jehofa, Modimo wa rona.’”+
7 Gonne seno ke se Jehofa a se buang:
“Goelang kwa go Jakobe ka boitumelo.
Goang ka boipelo ka gonne lo okametse ditšhaba.+
Itsiseng molaetsa ono; isetsang Modimo pako mme lo re,‘Ao tlhe Jehofa, boloka batho ba gago, masalela a Iseraele.’+
8 Ke ba busa go tswa kwa lefatsheng la bokone.+
Ke tla ba phutha mmogo go tswa kwa dikarolong tse di kgakala thata tsa lefatshe.+
Mo go bone go tla bo go na le difofu le ditlhotsa,+Mosadi yo o moimana le yo o belegang, botlhe fela.
Ba tla boela fano e le phuthego e kgolo.+
9 Ba tla tla ba lela.+
Ke tla ba busetsa fano fa ba kopa gore ke ba amogele.
Ke tla ba kaela kwa melatswaneng ya metsi,+Mo tseleng e e papietsweng e ba se kitlang ba kgopiwa mo go yone.
Gonne ke Rraagwe Iseraele, mme Eferaime ke leitibolo la me.”+
10 Lona ditšhaba, utlwang lefoko la ga Jehofa,Lo bo lo le bolele mo ditlhaketlhakeng tse di kgakala, lo re:+
“Ene yo o gasamisitseng Iseraele, o tla boa a mo phutha mmogo.
O tla mo tlhokomela fela jaaka modisa a tlhokomela letsomane la gagwe.+
11 Gonne Jehofa o tla rekolola Jakobe+E bile o tla mo golola* mo seatleng sa yo o nonofileng go mo feta.+
12 Ba tla tla ba bo ba goa ka boitumelo mo Thabeng ya Siona+E bile ba tla itumelela bomolemo jwa ga* Jehofa,Ba tla itumelela mabele le beine e ntšha+ le leokwane,E bile ba tla itumelela dikwanyana tsa letsomane le dinamane tsa motlhape.+
Ba tla nna jaaka tshingwana e e nosediwang sentle,+E bile ga ba kitla ba tlhola ba nna bokoa gape.”+
13 “Ka nako eo kgarebane e tla bina e itumetse,Makawana le bannabagolo le bone ba tla bina mmogo.+
Ke tla dira gore khutsafalo ya bone e fetoge boitumelo.+
Ke tla ba gomotsa ke bo ke dira gore ba itumele mo boemong jwa go hutsafala.+
14 Ke tla naya baperesiti letlepu la dijo,*E bile batho ba me ba tla kgotsofadiwa ke bomolemo jwa me,”+ go bua Jehofa.
15 “Seno ke se Jehofa a se buang:
‘Go utlwala lentswe kwa Rama,+ selelo sa khutsafalo le go lela mo go botlhoko:
Ragele o lelela bomorwawe.*+
O ganne go gomodiwa ka ntlha ya bomorwawe,Ka gonne ba sa tlhole ba le gone.’”+
16 Seno ke se Jehofa a se buang:
“‘O se ka wa lela,Ke tla go duela ka ntlha ya se o se dirileng,’ go bua Jehofa.
‘Ba tla boa ba tswa kwa lefatsheng la mmaba.’+
17 ‘E bile go na le tsholofelo ka bokamoso jwa gago,’+ go bua Jehofa.
‘Bomorwao ba tla boela kwa nageng ya bone.’”+
18 “Eleruri ke utlwile Eferaime a hutsafala a re,‘Ke ne ke tshwana le namane e e iseng e katisiwe,O ne wa nkotlhaya mme ke ne ka reetsa kotlhao.
Mpusetse kwa go wena, mme ke tla boa ka bonako,Ka gonne o Jehofa, Modimo wa me.
19 Gonne fa ke sena go boela kwa go wena ke ne ka ikwatlhaya;+Fa ke sena go lemoga boleo jwa me, ke ne ka hutsafala thata.*
Ke ne ke tlhabilwe ke ditlhong, e bile ke tlontlologile,+Ka ntlha ya ditiro tse ke neng ka di dira fa ke le mosha.’”
20 “A Eferaime ga se morwa yo o botlhokwa mo go nna, ngwana yo ke mo ratang thata?+
Gonne le fa gone ke mo kgalemela gangwe le gape, ke sa ntse ke mo gopola.
Ke gone ka moo ke fuduegang maikutlo* ka ntlha ya gagwe.+
Mme eleruri ke tla mo tlhomogela pelo,” go bua Jehofa.+
21 “Itlhomele matshwao a tsela,Mme o ipeele mesupatsela.+
Tlhoma matlho a gago mo tseleng e kgolo, tsela e o tshwanetseng go tsamaya mo go yone.+
Boa, wena kgarebane ya Iseraele, boela kwa metseng eno ya gago.
22 O tla okaoka ka lobaka lo lo kae, wena morwadi yo o sa ikanyegeng?
Gonne Jehofa o bopile sengwe se sesha mo lefatsheng:
Mosadi o tla latelela monna ka tlhoafalo.”
23 Seno ke se Jehofa wa masomosomo, Modimo wa Iseraele, a se buang: “Gape ba tla bua lefoko leno mo nageng ya Juda le mo metseng ya yone fa ke phutha batshwarwa ba bone: ‘E kete Jehofa a ka go segofatsa, wena lefelo la tshiamo,+ wena thaba e e boitshepo.’+
24 Mme batho ba Juda le ba metse yotlhe ya yone ba tla nna mmogo mo go lone, balemirui le ba ba disang matsomane.+
25 Gonne ke tla lapolosa yo o lapileng, e bile ke tla nonotsha mongwe le mongwe yo o bokoa.”+
26 Foo ke ne ka thanya ke bo ke bula matlho, mme ke ne ke robetse monate tota.
27 Jehofa a re, “Metlha e etla ya fa ke tla jala peo* ya motho le peo ya leruo mo setšhabeng sa Iseraele le mo setšhabeng sa Juda.”+
28 “Mme fela jaaka ke ne ke ba lebeletse gore ke ba kumole, ke ba rutlolole, ke ba dige, ke ba senye ke bo ke ba utlwise botlhoko,+ ka tsela e e tshwanang ke tla nna ke ba lebeletse gore ke ba age ke bo ke ba jale,”+ go bua Jehofa.
29 “Mo metlheng eo ga ba kitla ba tlhola ba re, ‘Borre ba ne ba ja morara o o botšarara, mme meno a barwa a ne a nna bosisi.’*+
30 Mme ka nako eo, mongwe le mongwe o tla swela phoso ya gagwe. Ope fela yo o jang morara o o botšarara, meno a gagwe ke one a a tla nnang bosisi.”
31 “Metlha e etla,” go bua Jehofa, “e mo go yone ke tla dirang kgolagano e ntšha le batho ba Iseraele le batho ba Juda.+
32 Ga e kitla e tshwana le kgolagano e ke neng ka e dira le borraabonemogolo mo letsatsing la fa ke ne ke ba ntsha kwa lefatsheng la Egepeto,+ ‘kgolagano ya me e ba neng ba e tlogela,+ le fa gone e ne e le nna fela mong* wa bone,’ go bua Jehofa.”
33 “Gonne eno ke kgolagano e ke tla e dirang le batho ba Iseraele morago ga metlha eo,” go bua Jehofa. “Ke tla tsenya molao wa me mo go bone,+ e bile ke tla o kwala mo dipelong tsa bone.+ Ke tla nna Modimo wa bone, mme bone ba tla nna batho ba me.”+
34 “Mme mongwe le mongwe ga a kitla a tlhola a ruta moagelani wa gagwe e bile mongwe le mongwe ga a kitla a tlhola a ruta morwarraagwe, a re, ‘Itse Jehofa!’+ ka gonne botlhe ba tla nkitse, go simolola ka yo monnye go fitlha ka yo mogolo,”+ go bua Jehofa. “Gonne ke tla ba itshwarela molato wa bone, e bile ga nkitla ke tlhola ke gakologelwa boleo jwa bone.”+
35 Seno ke se Jehofa a se buang,Yo o dirileng letsatsi gore go nne lesedi motshegare,Yo o dirileng melao ya ngwedi le dinaledi gore go nne lesedi bosigo,Yo o fuduang lewatle a bo a dira gore makhubu a lone a fuduege,Yo leina la gagwe e leng Jehofa wa masomosomo:+
36 “‘E re ka melao eno e ka se ka ya palelwa,’ go bua Jehofa,‘Ditlogolwana tsa Iseraele di tla nna setšhaba fa pele ga me ka metlha.’”+
37 Seno ke se Jehofa a se buang: “‘Fela jaaka magodimo a ka se ka a lekanngwa le metheo ya lefatshe e ka se ka ya sekasekiwa, ga nkitla ke gana ditlogolwana tsa Iseraele ka ntlha ya sotlhe se ba se dirileng,’ go bua Jehofa.”+
38 “Bonang! Metlha e etla,” go bua Jehofa, “e mo go yone Jehofa a tla agelwang motse+ go simologa kwa Toreng ya Hananele+ go ya kwa Kgorong ya Sekhutlo.+
39 Mme mogala o o lekanyang+ o tla tlhamalalela kwa thoteng ya Garebe, mme o tla fapogela kwa ntlheng ya Goa.
40 E bile mokgatšha otlhe* wa ditoto le wa melora,* le masimo otlhe go ya go fitlha kwa Mokgatšheng wa Kiderone,+ go ya go fitlha kwa khoneng ya Kgoro ya Dipitse+ go ela kwa botlhaba, o tla nna sengwe se se boitshepo mo go Jehofa.+ Ga o kitla o tlhola o kumolwa kgotsa o digwa.”
Dintlha Tse di Kwa Tlase
^ Kgotsa “ke neng ka tswelela ke go bontsha lorato lo lo sa kgaotseng.”
^ Kgotsa “o ya go bina kwa bathong ba ba tshegang.”
^ Kgotsa “diterebe; moretlwa.”
^ Kgotsa “namola.”
^ Kgotsa “dilo tse di molemo tse di tswang kwa go.”
^ Seheb., “monono.”
^ Kgotsa “bana ba gagwe.”
^ Kgotsa “ke ne ka faphola serope sa me.”
^ Seheb., “mala.”
^ Kgotsa “losika.”
^ Seheb., “a ne a fela bogale.”
^ Kgotsa gongwe “monna.”
^ Kgotsa “lebala lotlhe le le kwa tlase.”
^ Kgotsa “melora e e mafura,” go tewa melora e e kolobeditsweng ke mafura a ditlhabelo.
