Jizọs Ọ̀ Bụ Chineke Pụrụ Ime Ihe Niile?

Ihe ndị mmadụ na-azakarị:

▪ “Eenụ, Jizọs bụ Chineke Pụrụ Ime Ihe Niile.”

▪ “Jizọs bụ Chineke nke bịara n’ụdị mmadụ.”

Olee ihe Jizọs kwuru?

▪ “Ọ bụrụ na unu hụrụ m n’anya, unu ga-aṅụrị ọṅụ na m na-alakwuru Nna m, n’ihi na Nna m ka m ukwuu.” (Jọn 14:28) Jizọs kwuru na ya na Nna ya ahaghị.

▪ “Ana m arịgokwuru Nna m na Nna unu nakwa Chineke m na Chineke unu.” (Jọn 20:17) Jizọs ekwughị na ya bụ Chineke, kama o kwuru na Chineke bụ Onye ọzọ.

▪ “Ihe m kwuru esighị n’echiche m, kama ọ bụ Nna m bụ́ onye zitere m nyere m iwu ihe m ga-akọ na ihe m ga-ekwu.” (Jọn 12:49) Ihe Jizọs kụziri esighị n’uche nke ya, kama o si n’uche Nna ya.

JIZỌS kwuru na ya bụ Ọkpara Chineke, o kwughị na ya bụ Chineke Pụrụ Ime Ihe Niile. Ọ bụrụ na Jizọs bụ Chineke, ònye ka o kpekuru ekpere mgbe ọ nọ n’ụwa? (Matiu 14:23; 26:26-29) N’eziokwu, anyị ekwesịghị iche na Jizọs ma ụma na-eme ka ọ̀ na-agwa onye ọzọ okwu mgbe ọ na-agwa onwe ya okwu.

Mgbe mmadụ abụọ n’ime ndị na-eso ụzọ Jizọs gwara Jizọs ka o nye ha ọkwá pụrụ iche n’Alaeze ya, ọ gwara ha, sị: “Ọ bụghị m na-eme ka a nọdụ n’aka nri m na n’aka ekpe m, kama ọ dịịrị ndị Nna m kwadebeere ya.” (Matiu 20:23) Jizọs ọ̀ ghaara ha ụgha mgbe ọ gwara ha na ya enweghị ikike imere ha ihe ha rịọrọ ya? Mbanụ! Kama nke ahụ, o ji umeala n’obi kwuo na ọ bụ naanị Chineke nwere ikike ikpebi ihe ndị dị otú ahụ. Jizọs kwudịrị na e nwere ihe ụfọdụ yanwa na ndị mmụọ ozi na-amaghị, kama naanị Nna ya maara ha.—Mak 13:32.

Ọ̀ bụ naanị mgbe ahụ Jizọs nọ n’ụwa ka Chineke ka ya ukwuu? Mba. Ọbụnadị mgbe a kpọlitechara Jizọs n’ọnwụ, Baịbụl kwuru na ọ nọ n’okpuru Chineke. Pọl onyeozi chetaara anyị na “Chineke bụkwa isi nke Kraịst.” (1 Ndị Kọrịnt 11:3) Baịbụl kwuru na n’ọdịnihu, “mgbe a ga-edoworị ihe niile n’okpuru ya, mgbe ahụ, Ọkpara ahụ n’onwe ya ga-edokwa onwe ya n’okpuru Onye ahụ nke doro ihe niile n’okpuru ya, ka Chineke wee bụrụ ihe niile n’ebe onye ọ bụla nọ.”—1 Ndị Kọrịnt 15:28.

O doro anya na Jizọs abụghị Chineke Pụrụ Ime Ihe Niile. Ọ bụ ya mere Jizọs ji kpọọ Nna ya “Chineke m.”—Mkpughe 3:2, 12; 2 Ndị Kọrịnt 1:3, 4. *

[Ihe e dere n’ala ala peeji]

[Ihe odide gbatụrụ okpotokpo nke dị na peeji nke 7]

Jizọs kwuru na e nwere ihe ụfọdụ naanị Nna ya maara, bụ́ ndị ya na ndị mmụọ ozi na-amaghị