Gịnị Mere Ọtụtụ Di na Nwunye Ji Etisa?

“Ndị Farisii wee bịakwute [Jizọs], buru n’uche ka ha nwaa ya ọnwụnwa, sị: ‘Iwu ọ̀ kwadoro ka nwoke gbaa nwunye ya alụkwaghịm n’ihi ụdị ihe ọ bụla?’”—Matiu 19:3.

ỤFỌDỤ ndị dịrị ndụ n’oge Jizọs jụrụ ajụjụ ma di na nwunye hà nwere ike ibigide n’agbaghị alụkwaghịm ma ọ bụkwanụ ma hà kwesịrị ime otú ahụ. Jizọs zara ha, sị: “Ọ̀ bụ na unu agụghị na onye kere ha site ná mmalite mere ha nwoke na nwaanyị wee sị, ‘N’ihi ya, nwoke ga-ahapụ nna ya na nne ya wee rapara n’ahụ́ nwunye ya, ha abụọ ga-abụ otu anụ ahụ́’? Nke mere na ha abụkwaghị anụ ahụ́ abụọ, kama ha bụ otu. Ya mere, ihe Chineke kekọtara, mmadụ ọ bụla atọsala ya.” * (Matiu 19:4-6) O doro anya na Chineke bu n’obi ka alụmdi na nwunye ghara itisa.

N’ọtụtụ mba taa, ịgba alụkwaghịm ‘na-atọsa’ ihe dị ka alụmdi na nwunye anọ n’ime iri ọ bụla. Ndụmọdụ ndị Baịbụl nyere banyere alụmdi na nwunye hà emeela nnọọ ochie nke na ha abakwaghị uru? Ọ̀ ga-abụ na alụmdi na nwunye na-etisa n’ihi na e nwere ihe dị njọ na ya?

Tụlee ihe atụ a: Ezinụlọ abụọ zụrụ otu ụdị ụgbọala. Otu na-elekọta ụgbọala nke ha nke ọma ma na-eji nwayọọ akwọ ya. Ụgbọala ha emebighị. Ezinụlọ nke ọzọ anaghị etinye ego ọ bụla ma ọ bụ oge ha n’ilekọta ụgbọala ha, na-akwọkwa ya ọnwụ ọnwụ. Ụgbọala ha mebiri, ha ahapụkwa ya. Olee ihe mere ụgbọala nke abụọ ahụ ji mebie—ọ̀ bụ ụgbọala ahụ kpatara ya ka ọ̀ bụ ndị nwe ya? O doro anya na ọ bụ ndị nwe ya kpatara ya.

N’otu aka ahụ, na ọtụtụ alụmdi na nwunye na-etisa apụtaghị na alụmdi na nwunye adịghị mma. Ọtụtụ nde alụmdi na nwunye bụ́ ndị na-aga nke ọma gosiri na nke a bụ eziokwu. Alụmdi na nwunye ndị ahụ na-ewetara ndị mmadụ, ezinụlọ dị iche iche, na obodo dị iche iche obi ụtọ na ahụ́ iru ala. Ma, dị ka ụgbọala, ọ bụrụ na mmadụ chọrọ ka alụmdi na nwunye ya ghara itisa, o kwesịrị ka ọ na-elekọta ya anya mgbe niile.

Ma alụmdi na nwunye unu ọ̀ ka malitere ọhụrụ ma ọ̀ nọọla ọdụ, ndụmọdụ Baịbụl nyere banyere otú e si elekọta ya ma na-eme ka o sikwuo ike ga-enyere nnọọ unu aka. Lee ihe atụ ụfọdụ na peeji ndị na-esonụ.

[Ihe e dere n’ala ala peeji]