Maka Ndị Na-agụ Akwụkwọ Anyị

OBI dị anyị ụtọ ịgwa gị na anyị ga-agbanwetụ otú Ụlọ Nche na-adị malite na nke a i ji n’aka. Tupu anyị ekwuo ihe ndị a ga-agbanwe, ka anyị kwuo ihe ndị a na-agaghị agbanwe.

Magazin a ka bụ Ụlọ Nche nke Na-ekwusa Alaeze Jehova. N’ihi ya, Ụlọ Nche ka ga na-enye Jehova, bụ́ ezi Chineke, otuto, jirikwa ozi ọma nke Alaeze Chineke na-akasị ndị na-agụ ya obi. Isiokwu ndị dị na peeji nke ise ruo na nke itoolu na magazin a i ji n’aka kwuru ihe Alaeze ahụ bụ na mgbe ọ ga-abịa. Ụlọ Nche ka ga na-eme ka ndị na-agụ ya nwee okwukwe na Jizọs Kraịst, na-akwado eziokwu dị na Baịbụl, jirikwa amụma Baịbụl na-akọwa ihe ihe ndị na-eme n’ụwa pụtara, dị ka ọ na-eme kemgbe ọtụtụ iri afọ.

Gịnịzi ka a ga-agbanwe na ya? Ka anyị kwuo ihe ụfọdụ na-akpali mmasị ndị ga na-apụta n’Ụlọ Nche nke abalị mbụ n’ọnwa ọ bụla. *

Kwa ọnwa, a ga-ebipụta ọtụtụ isiokwu ndị ga-akpali ndị mmadụ iche echiche. A ga na-akọ akụkọ dị ụtọ n’isiokwu bụ́ “Ị̀ Maara?” Akụkọ ndị a ga-eme ka a ghọtakwuo akụkọ Baịbụl ndị a ga-ebipụta na ya. Isiokwu bụ́ “Bịaruo Chineke Nso” ga na-atụle ihe a kapịrị ọnụ ndị anyị nwere ike ịmụta banyere Jehova n’ebe dị iche iche na Baịbụl. Isiokwu bụ́ “Ajụjụ Ndị Na-agụ Akwụkwọ Anyị Jụrụ” ga na-aza ajụjụ dị iche iche metụtara ihe ndị dị na Baịbụl. Dị ka ihe atụ, ọtụtụ ndị na-ajụ, sị, “Alaeze Chineke ọ̀ dị n’ime obi gị?” Ị ga-ahụ azịza ya na peeji nke iri na atọ.

A ga-enwe isiokwu ndị a ga na-ebipụta mgbe mgbe bụ́ ndị ga-abara ezinụlọ dị iche iche uru. A ga na-ebipụta isiokwu bụ́ “Ihe Ndị Na-eme Ka E Nwee Obi Ụtọ n’Ezinụlọ” ugboro anọ n’afọ. Isiokwu a ga na-ekwu nsogbu ndị a na-enwekarị n’ezinụlọ, gosikwa otú Baịbụl nwere ike isi nyere anyị aka dozie nsogbu ndị ahụ. Isiokwu bụ́ “Kụziere Ụmụ Gị Ihe,” nke ndị mụrụ ụmụ ga na-agụrụ ụmụ ha, ga na-apụta otu ugboro n’ọnwa abụọ. Isiokwu ọzọ a ga-ebipụta n’ọnwa ọ bụla a na-ebipụtaghị “Kụziere Ụmụ Gị Ihe” ga-abụ isiokwu bụ́ “Maka Ndị Na-eto Eto.” Ọ ga na-edepụtara ndị na-eto eto ihe ndị ha ga-eji na-amụ Baịbụl.

E nwekwara isiokwu ole na ole ndị ọzọ a ga na-ebipụta ugboro anọ n’afọ. Isiokwu bụ́ “Ṅomie Okwukwe Ha” ga na-agba anyị ume iso ihe nlereanya nke ndị a kọrọ akụkọ ha na Baịbụl setịpụrụ. Dị ka ihe atụ, na peeji nke iri na asatọ ruo na peeji nke iri abụọ na otu n’Ụlọ Nche a, ị ga-agụ akụkọ na-akpali mmasị a kọrọ banyere Ịlaịja, hụkwa otú anyị nwere ike isi ṅomie okwukwe ya. Isiokwu bụ́ “Akwụkwọ Ozi Si n’Aka . . . ” ga na-akọ akụkọ ndị ozi ala ọzọ kọrọ nakwa nke ndị ọzọ nọ n’ebe dị iche iche n’ụwa. Isiokwu bụ́ “Ihe Anyị Mụtara n’Aka Jizọs” ga na-eleba anya n’ihe ndị dị oké mkpa a kụziri na Baịbụl. Nke a ga na-apụta n’ụzọ dị mfe nghọta.

Anyị nwere obi ike na Ụlọ Nche ga-anọgide na-amasị ndị na-agụ ya bụ́ ndị na-ege ntị n’ihe Baịbụl kwuru ma chọọ ịma ihe ọ na-akụzi n’ezie. Anyị nwere olileanya na magazin a ga-enyere gị aka ka ị mụta eziokwu na-agụ gị agụụ nke dị na Baịbụl.

NDỊ BIPỤTARA YA

[Ihe e dere n’ala ala peeji]