OLILEANYA MARA EZIGBO MMA. Onye kere anyị kwere nkwa inye anyị ndụ ebighị ebi n’ụwa ebe a. Mana, ọ na-esiri ọtụtụ ndị ike ikweta ihe a. Ha na-ekwu na ‘onye ọ bụla ga-anwụ anwụ, nakwa na e kere mmadụ, ọ́ dịtụ ndụ, ya anwụọ.’ Ndị ọzọ kwetara na mmadụ ga-adịli ndụ ebighị ebi, mana na ọ bụghị n’ụwa a. Ha sịrị na mmadụ ga-adị ndụ ebighị ebi naanị ma ọ nwụọ gaa eluigwe. Gịnị ka gịnwa chere?

Tupu gị azaa ajụjụ a, legodị ihe Baịbụl zara n’ajụjụ atọ ndị a: Gịnị ka otú e si kee mmadụ na-egosi gbasara afọ ole Chineke chọrọ ka ọ dịruo ndụ? Gịnị ka Chineke bu n’obi kee ụwa na mmadụ? Olee otú ọnwụ si bata n’ụwa?

Ụmụ mmadụ pụrụ nnọọ iche n’ihe niile Chineke kere n’ụwa. Olee otú ha si pụọ iche? Baịbụl gosiri na ọ bụ naanị mmadụ ka e kere “n’onyinyo” Chineke, nakwa ‘n’oyiyi’ ya. (Jenesis 1:26, 27) Gịnị ka nke a pụtara? Ọ pụtara na e kere ụmụ mmadụ, ha enwee àgwà ndị Chineke nwere. Àgwà ndị dị ka ịhụnanya na ikpe ziri ezi.

Ihe ọzọ bụ na e kere ụmụ mmadụ, ha enwee ikike iche echiche na ịma ihe ọma na ihe ọjọọ. Ha na-achọkwa ịmata Chineke, nakwa ka ha na ya dị ná mma. Ọ bụ ya mere obi ji adị anyị ụtọ ma anyị hụ ihe ndị Chineke kere na otú ha si maa mma. Ọ bụkwa ya mere egwú, abụ, na ihe e sere ese ji eme anyị obi ụtọ. Nke ka nke bụ na ọ bụ naanị ụmụ mmadụ nwere ike ife Chineke. Ihe ndị a niile mere ka ụmụ mmadụ dị ezigbo iche n’ihe ndị ọzọ niile e kere eke dị ndụ n’ụwa.

Chegodị ihe a: Chineke ọ̀ ga-eke ụmụ mmadụ n’ụzọ pụrụ iche otú a, keekwa ha otú ha ga-enwe ike ịna-emekwu nke ọma ma ọ bụrụ na ọ chọrọ ka ha dị ndụ naanị afọ ole na ole n’ụwa? Nke bụ́ eziokwu bụ na ihe mere Chineke ji kee ụmụ mmadụ otú a bụ ka ha biri n’ụwa ma na-enwe obi ụtọ ruo mgbe ebighị ebi.

Ụfọdụ na-ekwu na e nweghị mgbe Chineke kere mmadụ ka ọ dịrị ndụ ebighị ebi n’ụwa. Ha na-ekwu na ihe mere e ji kee ụwa bụ ka a nọrọ na ya nwalee ndị mmadụ iji mata onye ruru eru ịga eluigwe ka ya na Chineke biri ruo ebighị ebi. Ma, ọ bụrụ na ihe a ha na-ekwu bụ eziokwu, ihe ọ pụtara ọ́ bụghị na ọ bụ Chineke na-akpata ihe ọjọọ niile juru n’ụwa? Ma, ọ bụghị otú a ka  Chineke dị. Baịbụl kwuru gbasara Chineke, sị: “N’ihi na ụzọ ya niile bụ ikpe ziri ezi. Chineke nke kwesịrị ntụkwasị obi, onye ikpe na-ezighị ezi na-adịghị n’ebe ọ nọ; Onye ezi omume na onye ziri ezi ka ọ bụ.”—Diuterọnọmi 32:4.

Baịbụl mere ka ihe Chineke bu n’obi kee ụwa doo anya. Ọ sịrị: “Eluigwe bụ eluigwe Jehova, ma ụwa ka o nyere ụmụ mmadụ.” (Abụ Ọma 115:16) N’eziokwu, Chineke kere ụwa a mara mma ka ụmụ mmadụ biri na ya ruo mgbe ebighị ebi. O kere ihe niile ga-eme ka anyị nwee obi ụtọ ma dị ndụ ebighị ebi na ya.—Jenesis 2:8, 9.

“Eluigwe bụ eluigwe Jehova, ma ụwa ka o nyere ụmụ mmadụ.”—Abụ Ọma 115:16

Baịbụl mekwara ka ihe Chineke bu n’obi kee ụmụ mmadụ doo anya. Ọ gwara di na nwunye mbụ, sị: ‘Jupụtanụ ụwa, meekwanụ ka ọ dịrị n’okpuru unu, ka . . . ihe ọ bụla e kere eke dị ndụ nke na-agagharị n’elu ala nọrọkwa n’okpuru unu.’ (Jenesis 1:28) Ọ bụ ezigbo ihe ọma ka e meere ha nye ha ọrụ ilekọta ụwa na ime ka ụwa niile ghọọ Paradaịs. N’eziokwu, ihe Chineke bu n’obi kee Adam na Iv bụ ka ha na ụmụ ha ga-amụta dịrị ndụ ebighị ebi n’ụwa, ọ bụghị n’eluigwe.

Gịnịzi mere anyị ji anwụ anwụ? Baịbụl gosiri na otu mmụọ ozi, e mechara kpọwa Setan, gbara mbọ imebi ihe Chineke haziri n’ogige Iden. Olee otú o si mee ya?

Setan mere ka nne na nna anyị mbụ bụ́ Adam na Iv soro ya nupụrụ Chineke isi. Ọ gwara ha na e nwere ihe ọma Chineke na-achọghị ka ha nweta, ya bụ, iji aka ha na-ekpebiri onwe ha ihe ọma na ihe ọjọọ. Ha kwetara ihe o kwuru ma soro ya nupụrụ Chineke isi. Gịnị ka ihe a ha mere kpataara ha? Ka oge na-aga, ha nwụrụ, otú ahụ Chineke gwara ha. Ha enweghịzi olileanya ịdị ndụ ebighị ebi na Paradaịs.—Jenesis 2:17; 3:1-6; 5:5.

Nnupụ isi Adam na Iv kpataara mmadụ niile nsogbu ha nọ na ya ruo taa. Baịbụl kwuru, sị: “Mmehie si n’aka otu mmadụ [ya bụ, Adam] bata n’ụwa, ọnwụ esikwa ná mmehie bata, ọnwụ wee si otú ahụ gbasaa ruo mmadụ niile.” (Ndị Rom 5:12) Ihe mere anyị ji anwụ anwụ bụ na anyị ketara mmehie n’aka nne na nna anyị mbụ, ọ bụghị n’ihi na ọ bụ nzube Chineke, nke ụfọdụ ndị na-ekwu na ọ bụ ihe omimi.

Isi ahụ e nupụụrụ Chineke n’Iden emeghị ka ihe o bu n’obi kee ụwa na ụmụ mmadụ gbanwee. Chineke nyere anyị ihe ga-eme ka anyị nwere onwe anyị n’aka mmehie na ọnwụ n’ihi na ọ hụrụ anyị n’anya, na-ekpekwa ikpe ziri ezi. Pọl onyeozi kwuru, sị: “Ụgwọ ọrụ nke mmehie na-akwụ bụ ọnwụ, ma onyinye nke Chineke na-enye bụ ndụ ebighị ebi site n’aka Kraịst Jizọs Onyenwe anyị.” (Ndị Rom 6:23) N’ihi na Chineke hụrụ anyị n’anya, “o nyere Ọkpara ọ mụrụ naanị ya [ya bụ, Jizọs Kraịst], ka e wee ghara ibibi onye ọ bụla nke nwere okwukwe na ya, kama ka o nwee ndụ ebighị ebi.” (Jọn 3:16) Jizọs ji obi ya niile chụọ ndụ ya n’àjà iji gbapụta ụmụ mmadụ, si otú a weghachi ihe niile Adam tụfuru. a

N’oge na-adịghị anya, ụwa ga-aghọ paradaịs otú Chineke kwere ná nkwa. Ị ga-eso na ndị ga-ebi na paradaịs ma ọ bụrụ na i mee ihe Jizọs kwuru. Ọ sịrị: “Sinụ n’ọnụ ụzọ ámá dị warara banye; n’ihi na okporo ụzọ nke na-eduba ná mbibi sara mbara ma dị obosara, ndị na-esikwa na ya abanye dị ọtụtụ; ma ọnụ ụzọ ámá nke na-eduba ná ndụ dị warara, okporo ụzọ ya dịkwa mkpagide, ndị na-achọta ya dịkwa ole na ole.” (Matiu 7:13, 14) N’eziokwu, ihe ị họọrọ ime ugbu a ga-ekpebi ma ị̀ ga-adị ndụ n’ọdịnihu. Olee ihe ị ga-eme?