EBE anyị bi n’ụwa nsogbu juru na ya, anyị ga-agba ezigbo mbọ ka anyị nwee ike inweta udo. Ọ bụ eziokwu na mgbe ụfọdụ, anyị nwere ike inwetụ udo, ọ na-esiri anyị ike ịnọgide na-enwe ya. Olee ihe Okwu Chineke kwuru nke ga-enyere anyị aka ịna-enwe udo? Oleekwa otú anyị ga-esi enyere ndị ọzọ aka inwe ya?

Anyị ga-enwe ezigbo udo ma obi na-eru anyị ala, nakwa ma anyị na ndị ọzọ na-adị n’ezigbo mma. Ihe kachanụ nke ga-eme ka anyị na-enwe udo bụ ma anyị na Chineke dịrị n’ezigbo mma. Olee otú anyị ga-esi eme ya?

Anyị rube isi n’iwu Jehova nyere anyị, anyị na-egosi ya na anyị tụkwasịrị ya obi, nakwa na anyị chọrọ ka anyị na ya dịrị n’ezigbo mma. (Jere. 17:7, 8; Jems 2:22, 23) Anyị mee otú ahụ, ọ ga-abịaru anyị nso ma mee ka obi ruo anyị ala. Aịzaya 32:17 kwuru, sị: “Ihe ezi omume ahụ ga-arụpụta bụ udo; ihe ga-esikwa n’ezi omume ahụ pụta bụ ịnọ jụụ na ịnọ n’obi iru ala ruo mgbe ebighị ebi.” Obi ga-eru anyị ala ma anyị si n’ala ala obi anyị na-erubere Jehova isi.—Aịza. 48:18, 19.

Ihe ọzọ ga-eme ka anyị nwee udo bụ mmụọ nsọ, nke bụ́ onyinye pụrụ iche Nna anyị nke eluigwe na-enye anyị.—Ọrụ 9:31.

Udo bụ ihe nke atọ Pọl kwuru okwu ya so ná “mkpụrụ nke mmụọ nsọ.” (Gal. 5:22, 23) Ebe ọ bụ mmụọ nsọ na-eme ka anyị nweta ezigbo udo, anyị ga-ekwe ka mmụọ nsọ na-edu anyị ka anyị nwee ike inweta ezigbo udo. Ka anyị leba anya n’ụzọ abụọ mmụọ nsọ nwere ike isi nyere anyị aka inweta udo.

 Nke mbụ, ịgụ Okwu Chineke mgbe niile ga-eme ka anyị nweta udo. (Ọma 1:2, 3) Ọ bụrụ na anyị na-echebara ihe ndị anyị gụrụ echiche, mmụọ nsọ ga-enyere anyị aka ịghọta otú Jehova si ele ihe ụfọdụ anya. Dị ka ihe atụ, anyị na-ahụ otú o si na-eme udo, nakwa ihe mere udo ji dị ya ezigbo mkpa. Anyị mee ihe ndị ahụ anyị mụtara n’Okwu Chineke, anyị ga na-enwekwu udo.—Ilu 3:1, 2.

Nke abụọ, anyị ga-arịọ Chineke ka o nye anyị mmụọ nsọ ya. (Luk 11:13) Jehova na-ekwe anyị nkwa na anyị rịọ ya ka o nyere anyị aka, ọ ga-eme ka ‘udo nke Chineke nke karịrị echiche niile na-eche obi anyị na ike iche echiche anyị nche site n’aka Kraịst Jizọs.’ (Fil. 4:6, 7) Ọ bụrụ na anyị arịọ Jehova ka o nye anyị mmụọ nsọ ya, Chineke anyị ga-eme ka obi ruo anyị ala, bụ́ ihe ọ na-emere naanị ndị ya na ha dị n’ezigbo mma.—Rom 15:13.

Olee otú ụfọdụ sirila mee ihe a Baịbụl kwuru ma gbanwee ndụ ha nke mere ka ha na-enwe udo, ha na Chineke na ndị mmadụ ana-adị n’udo?

Ụfọdụ ndị nọ n’ọgbakọ taa bụbu ndị “na-ewekarị oké iwe,” ma ugbu a, ha na-echebakwuru ndị mmadụ echiche, na-enwekwuru ha ndidi na obiọma, ma na-eme ka ha na ha dịrị n’udo, mgbe ha na ha na-emekọ ihe. * (Ilu 29:22) Ka anyị chọpụta otú ihe a si bụrụ eziokwu n’akụkọ gbasara ndị nkwusa abụọ e nyeere aka ha akwụsị ịna-ewe oké iwe, meekwa ka ha na ndị ọzọ na-adị n’udo.

Àgwà ọjọọ David na-akpa mere ka ọ na-ekwu okwu ọjọọ. Tupu ya enyefee Chineke ndụ ya, ọ na-akatọkarị ndị ọzọ, na-eji okwu ọjọọ asa ndị ezinụlọ ya ahụ́. Mgbe oge na aga, ọ chọpụtara na ya kwesịrị ịgbanwe ndụ ya ma na-eme udo. Gịnị nyeere ya aka ịna-eme udo? O kwuru, sị: “M malitere ime ihe Baịbụl kwuru ná ndụ m, ya emee ka mụ na ndị ezinụlọ m na-akwanyere ibe anyị ùgwù.”

Otú e si zụọ Rachel kpara àgwà ya aka ọjọọ. O kwuru, sị: “Mụ na iwe ọkụ ka na-alụ  n’ihi na m toro n’ezinụlọ ebe onye ọ bụla na-ewekarị iwe.” Gịnị nyeere ya aka ịna-emekwu udo? O kwuru, sị: “M na-ekpe ekpere mgbe niile ma na-arịọ Jehova ka o nyere m aka.”

Akụkọ gbasara David na Rachel bụ naanị ihe atụ abụọ na-egosi na anyị ga-enwe udo ma anyị na-eme ihe Baịbụl kwuru ma na-arịọ Chineke ka o jiri mmụọ nsọ ya nyere anyị aka. O doro anya na n’agbanyeghị àgwà ọjọọ juru n’ụwa a, anyị nwere ike inweta udo nke ga-eme ka anyị na ndị ezinụlọ anyị na ụmụnna anyị na-adị n’udo. Ma, Jehova na-agwa anyị ka anyị “na mmadụ niile dịrị n’udo.” (Rom 12:18) Ihe a ọ̀ ga-ekwe omume? Oleekwa uru anyị ga-erite ma anyị gbaa mbọ mee ka anyị na ndị ọzọ na-adị n’udo?

Mgbe anyị na-ekwusa ozi ọma, anyị na-agwa ndị mmadụ ka ha bịa rite uru n’udo Alaeze Chineke ga-eme ka anyị nwee. (Aịza. 9:6, 7; Mat. 24:14) Obi dị anyị ụtọ na ọtụtụ ndị emeela ihe a anyị na-agwa ha. Ha abụghịzi ndị ike ụwa na-agwụ ma ọ bụ ndị na-ewe oké iwe n’ihi otú ihe si kwụrụ n’ebe ha bi. Kama nke ahụ, ha nwere olileanya na ihe ga-adị mma n’ọdịnihu. Ha ‘na-achọ udo, na-achụsokwa ya.’—Ọma 34:14.

Ọ bụghị mmadụ niile na-ege anyị ntị mgbe mbụ anyị chọrọ izi ha ozi ọma. (Jọn 3:19) N’agbanyeghị nke ahụ, mmụọ Chineke na-enyere anyị aka imeda obi na ịkwanyere ha ùgwù mgbe anyị na-ezi ha ozi ọma. Anyị si otú ahụ na-eme ihe Jizọs kwuru na Matiu 10:11-13 banyere ihe anyị ga-eme ma anyị chọọ izi mmadụ ozi ọma. Ebe ahụ sịrị: “Mgbe unu na-abanye n’ụlọ, keleenụ ndị ezinụlọ ahụ; ọ bụrụkwa na ụlọ ahụ kwesịrị ekwesị, ka udo unu na-asị ka o nwee dịkwasị ya; ma ọ bụrụ na o kwesịghị ekwesị, ka udo nke si n’ebe unu nọ lọghachiri unu.” Anyị mee ihe Jizọs kwuru, anyị ga-enwe udo mgbe anyị na-apụ, burukwa n’obi na onye ahụ ga-emecha gee anyị ntị.

Anyị na-emekwa ka e nwekwuo udo ma anyị na-akwanyere ndị ọrụ gọọmenti ùgwù, ma ndị nke na-emegide anyị. Dị ka ihe atụ, otu gọọmenti dị n’otu mba Afrịka achọghị inye anyị ikike iwu Ụlọ Nzukọ Alaeze n’ihi na ha kpọrọ anyị asị. Mgbe a chọrọ idozi okwu ahụ n’udo, a họpụtara otu nwanna jerela ozi ala ọzọ n’obodo ahụ ka ọ gaa hụ onye na-anọchite anya obodo ahụ na Lọndọn dị n’Ịngland. Ọ gara ka ọ gwa ya gbasara ọrụ Ndịàmà Jehova na-arụ n’obodo ahụ n’enyeghị onye ọ bụla nsogbu. Olee ihe mechara mee?

Nwanna ahụ kwuru, sị: “Mgbe m ruru n’ebe a na-anabata ndị ọbịa n’ụlọ ọrụ ya hụ onye na-anabata ndị ọbịa, m kwuru n’obi m na o si n’agbụrụ m ma asụsụ ha. N’ihi ya, m kelere ya n’asụsụ obodo ya, ya eju ya anya, ya ajụọ m, sị, ‘Olee ihe butere gị ebe a?’ M medara obi gwa ya na m chọrọ ịhụ onyeisi ha. Ọ kpọziri onyeisi ahụ na telefon, ya abịa hụ m ma kelee m n’asụsụ obodo ha. Mgbe anyị kelechara, o medara obi gee m ntị mgbe m na-akọwara ya ozi ọma Ndịàmà Jehova na-ezi n’obodo ha n’enweghị onye ha na-enye nsogbu.”

Otú nwanna ahụ si kwanyere onyeisi ahụ ùgwù mgbe ọ na-akọwara ya gbasara Ndịàmà Jehova mere ka ọ ghọtakwuo ọrụ anyị ma gbanwee otú o sibu ele ya anya. Mgbe obere oge gachara, ndị ọchịchị wepụrụ iwu ha machiri anyị ịrụ Ụlọ Nzukọ Alaeze n’obodo ahụ. Obi tọrọ ụmụnna ezigbo ụtọ n’ihi ihe a merenụ. N’eziokwu, ịkwanyere ndị ọzọ ùgwù mgbe gị na ha na-emekọ ihe na-aba ezigbo uru, na-emekwa ka gị na ha na-adị n’udo.

Taa, Ndịàmà Jehova na ibe ha dị n’udo. Ị ga-eso mee ka a na-enwekwu udo ma ọ bụrụ na i nwee udo, bụ́ àgwà so ná mkpụrụ nke mmụọ nsọ. Nke kacha mkpa bụ na ihe gị ga na-amasị Jehova, ọ ga-emekwa ka i nweta udo nke ga-adịru mgbe ebighị ebi n’ụwa ọhụrụ ya.—2 Pita 3:13, 14.