Jeremaya 30:1-24
-
Chineke kwere nkwa ịkpọlata ndị Izrel, gwọọkwa ha (1-24)
30 Jehova gwara Jeremaya, sị:
2 “Mụnwa bụ́ Jehova Chineke Izrel kwuru, sị, ‘Dee ihe niile m na-agwa gị n’akwụkwọ.
3 Jehova kwukwara, sị, “Oge na-abịa mgbe m ga-achịkọta ndị m a dọọrọ n’agha, bụ́ ndị Izrel na ndị Juda.+ M ga-akpọlata ha n’ala m nyere ndị nna nna ha. Ha ga-ebirikwa na ya ọzọ.”+ Ọ bụ Jehova kwuru ihe a.’”
4 Ihe ndị a ka Jehova gwara ndị Izrel na ndị Juda.
5 Jehova kwuru, sị:
“Anyị anụla mkpọtụ ndị na-ama jijiji.
Ụjọ na-atụ ndị mmadụ, udo adịghịkwa.
6 Biko, chọpụtanụ ma nwoke ọ̀ na-amụ nwa.
Gịnịzi mere m ji ahụ ka nwoke ọ bụla siri ike na-ejide aka n’afọ*Ka nwaanyị na-amụ nwa?+
Gịnị mere ihu onye ọ bụla ji gbarụọ?
7 Ewoo! Ụbọchị ahụ bụ ụbọchị dị egwu.*+
E nweghị ụbọchị ọzọ dị ka ya.
Ọ bụkwa oge Jekọb ga-ata ahụhụ.
Ma m ga-azọpụta ya.”
8 Jehova nke ụsụụ ndị agha kwuru, sị, “N’ụbọchị ahụ, m ga-agbaji yok ha nya n’olu, dọbiekwa agbụ e kere ha ụzọ abụọ. Ndị ala ọzọ agaghịzi eji ha mere ndị ohu.
9 Ha ga na-efe Jehova bụ́ Chineke ha ofufe, na-ejekwara Devid, bụ́ onye m ga-ahọpụta ka ọ bụrụ eze ha, ozi.”+
10 Jehova kwukwara, sị, “Ohu m Jekọb, atụla ụjọ.
Izrel, atụkwala egwu.+
N’ihi na m ga-esi ebe dị anya zọpụta gị,Zọpụtakwa ụmụ gị n’ala a dọọrọ ha n’agha laa.+
Jekọb ga-alọta, ahụ́ ga-erukwa ya ala. E nweghị ihe ga-enye ya nsogbu.
E nweghịkwa onye ga-emenye ya ụjọ.”+
11 Jehova kwuru, sị, “M nọnyeere gị, ka m wee zọpụta gị.
Ma, m ga-ebibi mba niile m chụgara gị n’ala ha.+
Ma, agaghị m ebibi gị.+
Kama, m ga-adọ gị aka ná ntị* otú kwesịrị ekwesị.
M ga-atarịrị gị ahụhụ.”+
12 Jehova kwuru, sị:
“Ọkpụkpụ gị nke gbajiri agbaji enweghị ngwọta.+
Ahụ́ i merụrụ agaghị ala ala.
13 E nweghị onye na-arịọ ka a gwọọ ọnyá gị.
E nweghị otú a ga-esi gwọọ gị.
E nweghịkwa ike ịgwọta gị.
14 Ndị niile gị na ha na-eme enyi echefuola gị.+
Ha anaghịzi achọ gị.
N’ihi na apịala m gị ụtarị otú mmadụ si apịa onye iro ya.+
Ataala m gị ahụhụ otú onye obi tara mmiri si ata mmadụ ahụhụ,
N’ihi na njehie gị hiri nne, mmehie gị dịkwa ọtụtụ.+
15 Gịnị mere i ji eti mkpu maka ọkpụkpụ gị gbajiri agbaji?
Ahụ́ na-egbu gị mgbu agaghị akwụsịN’ihi na njehie gị hiri nne, mmehie gị dịkwa ọtụtụ.+
Ọ bụ mụnwa mere gị ihe a.
16 N’ihi ya, a ga-ebibi ndị niile chọrọ ibibi gị.+
A ga-adọrọkwa ndị iro gị niile n’agha.+
A ga-akwakọrọ ihe ndị na-akwakọrọ ihe gị.
M ga-enyefe ndị na-ebukọrọ ihe gị n’aka ndị ga-ebukọrọ ihe ha.”+
17 Jehova kwuru, sị, “M ga-eme ka ị gbakee. M ga-agwọkwa ọnyá gị,+N’agbanyeghị na ha niile jụrụ gị, na-asịkwa:
‘Lee Zayọn, nke ọ na-enweghị onye na-achọ ya.’”+
18 Jehova kwukwara, sị:
“M ga-akpọkọta ndị e si n’ụlọikwuu Jekọb dọrọ n’agha.+
M ga-emetere ụlọikwuu ya dị nsọ ebere.
A ga-arụghachi obodo ya n’ala ya dị mkputamkpu.+
Ụlọ elu ya ga-adịkwa n’ebe o kwesịrị ịdị.
19 Ha ga na-abụ abụ ekele, na-achịkwa ọchị.+
M ga-eme ka ha mụbaa. Ha agaghịkwa adị ntakịrị.+
M ga-eme ka ha dị ọtụtụ,*Ha agaghịkwa adị ole na ole.+
20 Ụmụ Jekọb ga-adị otú ha dị n’oge gboo.
M ga-eme ka ha kwụrụ chịm n’ihu m.+
M ga-ata ndị niile na-emegbu Jekọb ahụhụ.+
21 Jehova kwuru, sị, “Otu n’ime ndị ya ga-abụ onye ukwu.
Otu n’ime ụmụ ya ga-abụkwa onye ọchịchị.
M ga-akpọ onye ukwu ahụ ka ọ bịa nso. Ọ ga-abịakwutekwa m.
N’ihi na ònye ga-anwa anwa bịakwute m ma ọ́ bụghị onye m kpọrọ ka ọ bịa?”
22 “Unu ga-abụ ndị m.+ Mụnwa ga-abụkwa Chineke unu.”+
23 Jehova ga-amalite iwe iwe otú oké ifufe si amalite ife.+
Otú ahụ oké ifufe si efesi ike ka ọ ga-esi wesa ndị ajọ omume iwe.
24 Iwe Jehova agaghị adajụRuo mgbe o mere ihe dị ya n’obi.+
Unu ga-aghọta ihe a n’oge ikpeazụ.+
Ihe E Dere n'Ala Ala Peeji
^ Ma ọ bụ “gbanyere aka n’úkwù.”
^ Na Hibru, “oké ụbọchị.”
^ Ma ọ bụ “m ga-agbazi gị.”
^ O nwere ike ịbụ, “ka a na-akwanyere ha ùgwù.”
