Ezikiel 47:1-23
47 O mechara kpọghachite m n’ọnụ ụzọ ụlọ nsọ.+ M nọkwa ebe ahụ hụ mmiri si n’okpuru ọnụ ụzọ ụlọ nsọ ahụ sọrọ na-aga n’ebe ọwụwa anyanwụ,+ n’ihi na ụlọ nsọ ahụ chere ihu n’ebe ọwụwa anyanwụ. Mmiri ahụ si n’akụkụ aka nri ụlọ nsọ ahụ, n’ebe ndịda nke ebe ịchụàjà, sọrọ na-agbada.
2 O mechara si n’ọnụ ụzọ ámá nke dị n’ebe ugwu+ kpọpụta m n’èzí, kpọgharịakwa m n’ọnụ ụzọ ámá dị ná mpụta, nke chere ihu n’ebe ọwụwa anyanwụ.+ M nọkwa ebe ahụ hụ ka mmiri si n’akụkụ aka nri ọnụ ụzọ ámá ahụ na-agbapụta.
3 Mgbe nwoke ahụ ji eriri e ji atụ̀ ihe gaa n’ebe ọwụwa anyanwụ,+ tụọ mmiri dị ebe ahụ, ọ tụtara otu puku (1,000) kubit.* Ọ gwakwara m ka m gafee mmiri ahụ. Mmiri ahụ rukwara m n’ikiri ụkwụ.
4 Ọ tụtakwara otu puku (1,000) kubit ọzọ, sịkwa m gafee mmiri ahụ, mmiri ahụ eruzie m n’ikpere.
Ọ tụtakwara otu puku (1,000) kubit ọzọ, sịkwa m gafee mmiri ahụ, ya eruzie m n’úkwù.
5 Ọ tụtakwara otu puku (1,000) kubit ọzọ. Ma, mmiri ahụ bụzi iyi, nke na enweghịzi m ike isi na ya gafere, n’ihi na o toola otú mmadụ nwere ike igwu ya egwu. Ọ bụzi iyi a na-enweghị ike iji ụkwụ si na ya gafere.
6 Ọ jụziri m, sị: “Nwa nke mmadụ, ị̀ hụrụ ihe a?”
Ọ gwakwara m ka m gara ije gaghachi n’akụkụ mmiri ahụ.
7 Mgbe m gaghachiri, m hụrụ ọtụtụ osisi n’akụkụ abụọ nke mmiri ahụ.+
8 Ọ gwaziri m, sị: “Mmiri a na-asọga n’ebe ọwụwa anyanwụ. Ọ ga-esikwa n’Araba*+ sọrọ gbadaa, sọba n’oké osimiri. Ya sọba n’oké osimiri,+ ọ ga-eme ka mmiri ya dị mma.
9 Ọtụtụ ihe e kere eke* dị ndụ ga-adịrị ndụ na-aga n’ebe ọ bụla mmiri ahụ sọrutere. Ọtụtụ azụ̀ ga-adị, n’ihi na mmiri ahụ ga-asọrute ebe ahụ. A ga-emekwa ka mmiri oké osimiri ahụ dị mma. Ihe ọ bụla nke dị n’ebe iyi ahụ sọrutere ga-adị ndụ.
10 “Ndị na-akụ azụ̀ ga-eguzo n’akụkụ ya malite n’En-gedi+ ruo En-egleyim, bụ́ ebe ndị a na-agbasa ụgbụ ka ọ kọọ. Ụdị azụ̀ dị iche iche na-adị n’Oké Osimiri Mediterenian* ga-ejukwa na ya.+
11 “E nwere ebe dị iche iche mmiri na-adọ na ya nakwa ebe ndị dị apịtị apịtị. A gaghị eme ka ebe ndị ahụ dị mma. Ha ga-abụ nnu nnu.+
12 “Ụdị osisi niile na-amị mkpụrụ a na-eri eri ga-eto n’akụkụ abụọ n’iyi ahụ. Akwụkwọ ha agaghị akpọnwụ akpọnwụ. Ha agaghịkwa akwụsị ịmị mkpụrụ. Ha ga na-amị mkpụrụ ọhụrụ kwa ọnwa, n’ihi na ha na-amịrị mmiri si n’ụlọ nsọ ahụ na-asọpụta.+ A ga na-eri mkpụrụ ha eri, jirikwa akwụkwọ ha na-agwọ ọrịa.”+
13 Ọkaakaa Onyenwe anyị Jehova kwuru, sị: “Ala a ka unu ga-ekere onwe unu ka ọ bụrụ ihe ebo iri na abụọ nke Izrel ketara. A ga-ekenye ndị si n’ezinụlọ Josef ibé ala abụọ.+
14 Ala a ga-abụ nke unu. Ihe otu onye ga-eketa ka ibe ya ga-eketa. Aṅụrụ m iyi na m ga-enye nna nna unu hà ala a.+ Ugbu a, a na-ekere unu ya ka ọ bụrụ ala unu ketara.
15 “Ókè ya n’ebe ugwu bụ: Malite n’Oké Osimiri Mediterenian* gawa n’ụzọ e si aga Hetlọn,+ gawakwa n’ebe e si aga Zidad,+
16 Hemat,+ Berota,+ Sibreyim, nke dị n’agbata ala Damaskọs na ala Hemat, ruo Heza-hatikọn, nke dị n’ókè Haụran.+
17 Otú a ka o si bụrụ na ókè ya malitere n’oké osimiri ruo Heza-inọn,+ n’ókè Damaskọs n’ebe ugwu, ruokwa n’ókè Hemat.+ Ebe ndị a bụ ókè ya n’ebe ugwu.
18 “N’ebe ọwụwa anyanwụ, ókè ya dị malite n’agbata Haụran na Damaskọs gawa n’Osimiri Jọdan, n’agbata Gilied+ na ala Izrel. Unu ga-atụ̀ ala ahụ malite n’ókè ya n’ebe ugwu gawa n’oké osimiri* dị n’ebe ọwụwa anyanwụ. Ebe ndị a bụ ókè ya n’ebe ọwụwa anyanwụ.
19 “Ókè ya n’ebe ndịda dị malite na Tema ruo na mmiri Meribat-kedesh,+ ruo na Ndagwurugwu,*+ ruokwa n’Oké Osimiri Mediterenian.* Ebe ndị a bụ ókè ya n’ebe ndịda.
20 “Ókè ya n’ebe ọdịda anyanwụ bidoro n’Oké Osimiri Mediterenian,* malite n’ókè ya n’ebe ndịda ruo ebe chere Libo-hemat ihu.*+ Ebe ndị a bụ ókè ya n’ebe ọdịda anyanwụ.”
21 “Keerenụ onwe unu ala a. Kenyenụ ebo nke ọ bụla n’ebo iri na abụọ n’Izrel nke ha.
22 Unu ga-ekere ya onwe unu ka ọ bụrụ ihe unu ketara. Unu ga-ekenyekwa ndị mbịarambịa bi n’ala unu, ndị mụrụ ụmụ n’ala unu. Unu ga-ewerekwa ha ka ụmụ amaala Izrel. Ha ga-eso unu keta ala otú ebo niile n’Izrel ketara.
23 N’ebo ọ bụla onye mbịarambịa bi ka unu ga-enye ya ala.” Ọ bụ Ọkaakaa Onyenwe anyị Jehova kwuru ihe a.
Ihe E Dere n'Ala Ala Peeji
^ Ma ọ bụ “n’ọzara.”
^ Ma ọ bụ “mkpụrụ obi.”
^ Na Hibru, “n’Oké Osimiri ahụ.”
^ Na Hibru, “n’Oké Osimiri ahụ.”
^ Ya bụ, Oké Osimiri Nnu.
^ Gụọ Nkọwa Okwu.
^ Na Hibru, “n’Oké Osimiri ahụ.”
^ Na Hibru, “n’Oké Osimiri ahụ.”
^ Ma ọ bụ “ebe e si abanye Hemat.”
