Aịzaya 13:1-22
13 Ihe Chineke kpebiri ime Babịlọn,+ nke Aịzaya+ nwa Emọz nụrụ mgbe ọ hụrụ ọhụụ:
2 “Gwunyenụ ihe ga-agbara ndị mmadụ àmà+ n’ugwu bụ́ nkume nkume, nke na-enweghị ihe kpuchiri ya.
Kpọọnụ ha. Feerenụ ha aka,Ka ha bata n’ọnụ ụzọ nke ndị a ma ama.
3 Enyela m ndị m họpụtara* iwu.+
Akpọkọọla m ndị agha m, ndị ji nganga na-enwe aṅụrị,Ka m si n’aka ha gosi na iwe ji m.
4 Geenụ ntị! E nwere ndị nọ n’ugwu.
Ha na-eme mkpọtụ ka ndị dị ọtụtụ.
Geenụ ntị! Alaeze dị iche iche na-eme mkpọtụ.
Mba ndị a kpọkọtara na-emekwa mkpọtụ.+
Jehova nke ụsụụ ndị agha na-akpọkọta ndị agha ka ha gaa agha.+
5 Jehova ji ngwá agha ọ ga-eji gosi na iwe ji yaSi ebe dị anya na-abịa.+
O si na nsọtụ eluigwe na-abịaIbibi ụwa niile.+
6 Besienụ ákwá ike, n’ihi na ụbọchị Jehova dị nso.
N’ụbọchị ahụ, Onye Pụrụ Ime Ihe Niile ga-ebibi ihe niile dị n’ala unu.+
7 Ọ bụ ya mere aka niile ga-eji akụda,Obi awụnyekwa mmadụ ọ bụla n’afọ.+
8 Obi erughị ndị mmadụ ala.+
Ihe ọdụdọ na-adọ ha. Ahụ́ na-egbukwa ha mgbuKa nwaanyị na-amụ nwa.
Ha kporopụrụ anya na-ele ibe ha.
Ihu ha achagharịakwala n’ihi nhụsianya.
9 Ụbọchị Jehova na-abịa,Ọ ga-adị egwu n’ihi na ọ ga-eji iwe na ọnụma bịa.
Ihe a ga-eme ala a n’ụbọchị ahụ ga-eju ndị mmadụ anya.+
A ga-ebibikwa ndị mmehie nọ n’ala a.
10 Kpakpando ndị dị n’eluigwe, ma ndị nke a na-akpọ ìgwè kpakpando Kisịl,*+Agaghị enye ìhè ha na-enye.
Anyanwụ ga-agbakwa ọchịchịrị mgbe ọ na-awa,Ọnwa agaghịkwa enye ìhè ọ na-enye.
11 M ga-akwụ ndị bi n’ụwa ụgwọ ihe ọjọọ ha na-eme,+Kwụọkwa ndị ajọ omume ụgwọ mmehie ha.
M ga-eme ka ndị mpako kwụsị ịkpa nganga,M ga-ewedakwa ndị mpako na-achị n’aka ike ala.+
12 M ga-eme ka mmadụ efu dị ụkọ karịa ọlaedo a nụchara anụcha,+Meekwa ka mmadụ dị ụkọ karịa ọlaedo kacha mma.*+
13 N’ụbọchị mụnwa, bụ́ Jehova nke ụsụụ ndị agha, ga-ewe ezigbo iwe,M ga-eme ka eluigwe maa jijiji,+Meekwa ka ụwa mee mkpatụ, si na ntọala ya pụọ.
14 Onye ọ bụla ga-agbakwuru ndị nke ya,Onye ọ bụla ga-agbala n’ala ya,+Dị ka nne mgbada a na-achụ ọsọ, nakwa dị ka ìgwè atụrụ na-enweghị onye na-azụ ha.
15 A ga-amagbu onye ọ bụla a hụrụ,Jirikwa mma agha gbuo onye ọ bụla a nwụdere.+
16 A ga-anọ n’ihu ha kụgbuo ụmụ ha.+
A ga-akwakọrọ ihe niile dị n’ụlọ ha.
A ga-edinakwa ndị nwunye ha n’ike.
17 M ga-eme ka ndị Midia lụso ha agha.+
Ndị Midia ejighị ọlaọcha kpọrọ ihe.
Ha enweghịkwa mmasị ọ bụla n’ọlaedo.
18 Ha ga-eji ụta ha gbajaa ụmụ okorobịa.*+
Ha agaghị emere ụmụ ndị Babịlọn ebere.
Ha agaghịkwa emewe ụmụ ha ihe lee anya n’azụ.
19 Babịlọn, nke bụ́ alaeze kacha dị ebube,*+Ọmarịcha obodo ndị Kaldia* ji akpa nganga,+Ga-adị otú Sọdọm na Gọmọra dị mgbe Chineke bibiri ha.+
20 O nweghị ihe ga-eme ka mmadụ biri na ya ọzọ.
Ọ gaghịkwa abụ ebe a ga-ebi ebi n’ọgbọ niile.+
E nweghị onye Arab ga-ama ụlọikwuu ya ebe ahụ.
E nweghịkwa onye na-azụ atụrụ ga-ahapụ atụrụ ya ka ha nọrọ ebe ahụ zuo ike.
21 Anụ ọhịa ndị na-ebi n’ọzara ga-amakpu ebe ahụ.
Ikwiikwii ga-ejupụta n’ụlọ ha.
Enyí nnụnụ ga-ebikwa ebe ahụ,+Ewu ọhịa* ga na-awụgharịkwa ebe ahụ.
22 Anụ dị iche iche ga-anọ n’ụlọ elu ndị dị na ya na-eti mkpu.
Nkịta ọhịa ga na-anọkwa n’ọmarịcha obí eze ndị dị na ya.
Oge ihe ndị a ga-eme ya dị nso, a gaghịkwa agbatịkwuru ya ụbọchị.”+
Ihe E Dere n'Ala Ala Peeji
^ Na Hibru, “ndị m doro nsọ.”
^ O nwere ike ịbụ ìgwè kpakpando a na-akpọ Ọrayọn nakwa ndị ọzọ gbara ya gburugburu.
^ Ma ọ bụ “ọlaedo Ofa.”
^ Ya bụ, ụmụ okorobịa Babịlọn.
^ Ndị Kaldia bụ ndị Babịlọn.
^ Ma ọ bụ “ihe e ji chọọ alaeze niile mma.”
^ O nwere ike ịbụ, “Ndị mmụọ ọjọọ yiri ewu.”
