Ọpụpụ 39:1-43
39 Ha jikwa eri na-acha anụnụ anụnụ na ajị anụ e sijiri odo odo na eri na-acha uhie uhie+ kpaa uwe+ dị iche iche nke ọma maka ije ozi n’ebe nsọ.+ Ha wee kpaa uwe nsọ+ Erọn, dị nnọọ ka Jehova nyere Mozis n’iwu.
2 O wee jiri ọlaedo, eri na-acha anụnụ anụnụ na ajị anụ e sijiri odo odo na eri na-acha uhie uhie na ezigbo eri linin a kpara akpa, kwee efọd+ ahụ.
3 Ha wee kụọ mbadamba ọlaedo dị iche iche ka ha dị fere fere, o wee bepụta eri ndị ọ ga-akpakọta ha na eri ahụ na-acha anụnụ anụnụ na ajị anụ ahụ e sijiri odo odo na eri ahụ na-acha uhie uhie na ezigbo eri linin ahụ, dị ka nke onye na-akpa ihe n’ákwà kpara.+
4 Ha wee dụọ ubu ya bụ́ ndị e jikọtara ejikọta. E jikọtara ya ejikọta na nsọtụ ya abụọ.
5 Otú e si kwee efọd ahụ ka e si kwee eriri ya nke dị n’elu ya iji na-ekesi ya ike, e jikwa otu ihe ahụ e ji kwee efọd ahụ, bụ́ eri na-acha anụnụ anụnụ na ajị anụ e sijiri odo odo na eri na-acha uhie uhie na ezigbo eri linin a kpara akpa, kwee ya,+ dị nnọọ ka Jehova nyere Mozis n’iwu.
6 Ha wee kwụnye nkume ọnịks+ n’ihe mbadamba e ji ọlaedo kpụọ, bụ́ ndị a kanyere aha ụmụ Izrel na ha dị ka ihe a kanyere na mgbaaka e ji aka ihe akara.+
7 O wee tinye ha n’ubu efọd ahụ ka ha bụrụ nkume ncheta+ nye ụmụ Izrel, dị nnọọ ka Jehova nyere Mozis n’iwu.
8 O wee kwee akpa obi+ ahụ dị ka ihe onye na-akpa ihe n’ákwà kpara, dị ka e si kwee efọd ahụ, nke e ji ọlaedo, eri na-acha anụnụ anụnụ na ajị anụ e sijiri odo odo na eri na-acha uhie uhie na ezigbo eri linin a kpara akpa, kwee.+
9 O nwere akụkụ anọ há nhata ma a pịajie ya. Ha mere akpa obi ahụ ka ọ dị otu ntụ ọbụ aka n’ogologo nakwa otu ntụ ọbụ aka n’obosara, ma a pịajie ya.+
10 Ha wee tinye ya ahịrị nkume anọ. Ahịrị nke mbụ bụ rubi, topaz na emerad.+
11 Ahịrị nke abụọ+ bụ tọkwọiz na safaya+ na jaspa.+
12 Ahịrị nke atọ+ bụ nkume leshem, aget na ametist.
13 Ahịrị nke anọ+ bụ krisolaịt na ọnịks+ na jed. E tinyere ha n’oghere ha bụ́ ndị e ji ọlaedo mee.
14 Nkume ndị ahụ dị ole aha ụmụ Izrel dị. Ha dị iri na abụọ dị ka aha ha si dị, ndị a kanyere dị ka ihe a kanyere na mgbaaka e ji aka ihe akara, ebo nke ọ bụla, dị ka aha ya si dị, maka ebo iri na abụọ ahụ.+
15 Ha wee jiri ọlaedo a na-agwaghị agwa mee ụdọ ígwè, dị ka eriri, n’elu akpa obi ahụ.+
16 Ha wee jiri ọlaedo kpụọ ihe mbadamba abụọ, jirikwa ọlaedo kpụọ ihe abụọ yiri mgbaaka ma tinye ihe abụọ ahụ yiri mgbaaka na nsọtụ abụọ nke akpa obi ahụ.+
17 E mesịa, ha ganyere eriri abụọ ahụ e ji ọlaedo kpụọ n’ihe abụọ ahụ yiri mgbaaka dị na nsọtụ akpa obi ahụ.+
18 Ha wee ganye isi abụọ nke eriri abụọ ahụ n’ihe mbadamba abụọ ahụ. Ha wee kegide ha n’ubu efọd ahụ, n’ihu ya.+
19 Ọzọ, ha ji ọlaedo kpụọ ihe abụọ yiri mgbaaka ma kwụnye ha na nsọtụ abụọ nke akpa obi ahụ, n’ọnụ ọnụ ya nke dị n’ime, n’akụkụ chere efọd ahụ ihu.+
20 Ha wee jiri ọlaedo kpụọ ihe abụọ yiri mgbaaka ma si n’okpuru kwụnye ha n’ubu abụọ nke efọd ahụ, n’ihu ya, n’akụkụ ebe a dụkọtara ya adụkọta, n’elu eriri efọd ahụ.+
21 N’ikpeazụ, ha ji eriri na-acha anụnụ anụnụ kekọta ihe ahụ yiri mgbaaka nke dị n’akpa obi ahụ na ihe ahụ yiri mgbaaka nke dị n’efọd ahụ, ka o wee na-adị n’elu eriri efọd ahụ, ka akpa obi ahụ gharakwa isi n’elu efọd ahụ dapụ, dị nnọọ ka Jehova nyere Mozis n’iwu.+
22 O wee kwee uwe na-enweghị aka+ nke efọd ahụ, nke onye na-ekwe ákwà kwere, e ji naanị eri na-acha anụnụ anụnụ kwee ya.
23 Uwe ahụ na-enweghị aka nwere oghere n’etiti ya, dị ka oghere na-adị n’uwe agha. A dụrụ ọnụ ọnụ oghere ya adụ gbaa gburugburu ka ọ ghara ịdọka adọka.+
24 Ha wee jiri eri na-acha anụnụ anụnụ na ajị anụ e sijiri odo odo na eri na-acha uhie uhie kpaa mkpụrụ pọmigranet n’ọnụ ọnụ ala uwe ahụ na-enweghị aka, ndị a kpakọtara akpakọta.+
25 Ha jikwa ọlaedo a na-agwaghị agwa kpụọ mgbịrịgba ma tinye mgbịrịgba ndị ahụ n’agbata mkpụrụ pọmigranet+ ndị dị gburugburu ọnụ ọnụ ala uwe ahụ na-enweghị aka, n’agbata mkpụrụ pọmigranet ndị ahụ;
26 otu mgbịrịgba na otu mkpụrụ pọmigranet, otu mgbịrịgba na otu mkpụrụ pọmigranet gbaa gburugburu ọnụ ọnụ ala uwe ahụ na-enweghị aka,+ maka ije ozi, dị nnọọ ka Jehova nyere Mozis n’iwu.
27 Ọzọ, ha ji ezigbo eri linin kwee uwe mwụda dị iche iche,+ ndị onye na-ekwe ákwà kwere, maka Erọn na ụmụ ya ndị ikom,
28 jirikwa ezigbo eri linin kwee ákwà a na-eke n’isi+ na ákwà ịchọ mma a na-afụ n’isi+ na uwe úkwù+ nke e ji ezigbo eri linin a kpara akpa kwee,
29 na ákwà a na-eke n’úkwù+ nke e ji ezigbo eri linin a kpara akpa na eri na-acha anụnụ anụnụ na ajị anụ e sijiri odo odo na eri na-acha uhie uhie kwee, nke onye na-ekwe ákwà kwere, dị nnọọ ka Jehova nyere Mozis n’iwu.
30 N’ikpeazụ, ha ji ọlaedo a na-agwaghị agwa mee ihe mbadamba na-egbuke egbuke, ihe àmà dị nsọ nke nraranye ma kanye ihe n’elu ya dị ka ihe a kanyere na mgbaaka e ji aka ihe akara: “Ịdị nsọ bụ nke Jehova.”+
31 Ha wee ganye ya eriri na-acha anụnụ anụnụ iji kegide ya n’elu ákwà ahụ a na-eke n’isi,+ dị nnọọ ka Jehova nyere Mozis n’iwu.
32 Ọrụ niile nke ụlọikwuu ahụ, ya bụ, ụlọikwuu nzute, wee gwụ, n’ihi na ụmụ Izrel nọ na-eme ihe niile Jehova nyere Mozis n’iwu.+ Ha mere nnọọ otú ahụ.
33 Ha wee butere Mozis ụlọikwuu ahụ,+ ihe niile e ji rụọ ya+ na arịa ya niile,+ nko ya,+ awara osisi ya,+ osisi ntụhie+ ya na ogidi ya na ntọala ya ndị nwere oghere,+
34 na ihe mkpuchi ya nke e ji akpụkpọ ebule e sijiri+ ọbara ọbara mee na ihe mkpuchi ya nke e ji akpụkpọ anụ sil+ mee na ákwà mgbochi ya,+
35 na igbe+ ihe àmà ahụ na okporo osisi+ ya na ihe mkpuchi ya,+
36 na tebụl ahụ,+ na arịa ya niile+ na achịcha a na-eche n’ihu Chineke,
37 na ihe ndọba oriọna+ ahụ nke e ji ọlaedo a na-agwaghị agwa rụọ, oriọna ya, bụ́ oriọna ndị dị n’ahịrị,+ na arịa ya niile+ na mmanụ ọkụ ya,+
38 na ebe ịchụàjà+ ahụ e ji ọlaedo rụọ na mmanụ e ji ete mmadụ mmanụ+ na ihe nsure ọkụ na-esi ísì ụtọ+ na ákwà ngebichi+ nke ọnụ ụzọ ụlọikwuu ahụ,
39 ebe ịchụàjà+ e ji ọla kọpa rụọ na ihe ahụ e ji ọla kọpa kpaa+ nke e tinyere n’ime ya, okporo osisi+ ya na arịa ya niile,+ efere+ na ihe ndọkwasị ya,+
40 ákwà ngechi+ ogige ahụ, ogidi+ ya na ntọala ya ndị nwere oghere+ na ákwà ngebichi+ nke ọnụ ụzọ ogige ahụ, ụdọ ụlọikwuu+ ya na mkpọ́ ụlọikwuu+ ya na arịa niile+ a rụrụ maka ije ozi n’ụlọ nsọ ahụ, maka ụlọikwuu nzute ahụ,
41 uwe+ ndị a kpara nke ọma maka ije ozi n’ebe nsọ ahụ, uwe+ nsọ nke Erọn onye nchụàjà na ụmụ ya ndị ikom ga-eyi na-arụ ọrụ dị ka ndị nchụàjà.+
42 Dị ka ihe niile Jehova nyere Mozis n’iwu si dị, otú ahụ ka ụmụ Izrel rụrụ ọrụ ahụ dum.+
43 Mozis wee hụ ọrụ ahụ dum, ma, lee! ha rụrụ ya dị ka Jehova nyere n’iwu. Otú ahụ ka ha mere. N’ihi ya, Mozis gọziri ha.+
