Ndị njinia na-emepụta robọt na-agbalị imepụta robọt ga-enyekwuru ndị dọkịta aka ịwa mmadụ ahụ́ n’emepeghị ebe buru ibu n’ahụ́ onye ahụ. Otu ihe ha lekwasịrị anya na-achọ imepụta ngwá ọrụ a bụ aka Octopus nke na-emegharị ka ihe na-enweghị ọkpụkpụ.

 Ihe ị ga-echebara echiche: Octopus nwere ike iji aka ya dị asatọ nke o nwere ike ịgbatị agbatị dọrọ ihe, jide ya ma jikpaa ihe ahụ ma n’ebe kpagidere akpagide. Ihe Octopus na-eme abụghị naanị ịhịgharị aka ya gaa n’ebe ọ bụla ọ chọrọ, o nwekwara ike ime ka akụkụ ọ bụla n’aka ya sie ike otú ọ bụla ọ chọrọ.

 Ndị na-eme nnyocha kwuru na imepụta robọt aka ya na-ahịgharị ka nke Octopus ga-enyere ndị dọkịta ezigbo aka ịwa mmadụ ahụ́ n’emepeghị ebe buru ibu n’ahụ́ onye ahụ. Ụdị ngwá ọrụ a ga-eme ka ọ dị mfe ịwa ahụ́ ndị gaara esi ezigbo ike ma e si n’ụzọ ndị ọzọ waa ya.

 Ihe a bụ otú aka Octopus si emegharị

E mepụtala rọbọt nwere ike imegharị aka ya ka nke Octopus. A na-ejikwa ya awa ahụ́. Otu n’ime aka rọbọt ndị ahụ dị inch ise nwere ike iwelite akụkụ ahụ́ ndị na-esichaghị ike n’akpataraghị akụkụ ahụ́ ndị ahụ nsogbu ọ bụla mgbe aka ya nke ọzọ na-awa ahụ́. Dr. Tommaso Ranzani, onye so ná ndị mepụtara robọt ahụ kwuru, sị: “O doro anyị anya na nke a bụ mmalite. Anyị na-atụ anya na rọbot ndị ọhụrụ a ka ga-emepụta ga-enwe ihe ọhụrụ ndị na-adịghị na nke mbụ a ga-eme ka ọ na-arụ ọrụ nke ọma karị.”

 Gịnị ka i chere? Aka Octopus ọ̀ nọkatara dịrị ka è kere ya eke?