Baịbụl Ò Kwuru Maka Pọgatrị?

KPỌWA

Ihe Baịbụl kwuru

Mba, o kwughị. Okwu ahụ bụ́ “pọgatrị” adịghị na Baịbụl. O nweghịkwanụ ebe o kwuru na mkpụrụ obi ndị nwụrụ anwụ na-aga ka a nụchaa ha na pọgatrị. a Ka anyị leba anya n’ihe Baịbụl kwuru banyere mmehie na ọnwụ nakwa otú o si dị iche n’ozizi pọgatrị.

Ihe ga-asachapụ mmadụ mmehie bụ onye ahụ inwe okwukwe n’àjà mgbapụta Jizọs, ọ bụghị ịga n’ebe a na-akpọ pọgatrị. Baịbụl kwuru na “ọbara Jizọs bụ́ Ọkpara [Chineke] na-asachapụ anyị mmehie niile” nakwa na “Jizọs Kraịst . . . tọpụkwara anyị ná mmehie anyị site n’ọbara nke ya.” (1 Jọn 1:7; Mkpughe 1:5) Jizọs nyere “mkpụrụ obi ya ka ọ bụrụ ihe mgbapụta” maka mmehie ọtụtụ mmadụ.—Matiu 20:28.
Ndị nwụrụ anwụ amaghị ihe ọ bụla. “Ndị dị ndụ maara na ha ga-anwụ; ma ndị nwụrụ anwụ amaghị ihe ọ bụla ma ọlị.” (Ekliziastis 9:5) Onye nwụrụ anwụ enweghị ike ịma ụfụ ihe, n’ihi ya o nweghị otú a ga-esi eji ọkụ pọgatrị mee ka ọ dị ọcha.
O nweghị ahụhụ a na-ata onye nwụrụ anwụ maka mmehie ya. Baịbụl kwuru na “ụgwọ ọrụ nke mmehie na-akwụ bụ ọnwụ” kwuokwa na “a tọhapụwo onye nwụrụ anwụ ná mmehie ya.” (Ndị Rom 6:7, 23) Ọnwụ bụ ụgwọ ọrụ na ntaramahụhụ zuru ezu maka mmehie.

Olee ebe ozizi pọgatrị si?

Ndị Grik oge ochie kweere na e nwere Limbo, nweekwa pọgatrị. Otu nwoke a na-akpọ Clement onye Alegzandria kwetara ihe a ndị Grik oge ochie kweere. Nke a mere o ji kwuo na e nwere ike iji ọkụ nụchaa onye mmehie ya adị ọcha. Ma, akwụkwọ bụ́ The History of Christian Doctrines kwuru na ọ bụ poopu a na-akpọ Gregory nke Mbụ, kwuziri na e nwere ihe bụ ọkụ pọgatrị. Kwuokwa na ọ bụ ozizi a na-anaghị agbagha agbagha. Akwụkwọ a kwukwara na nwoke ahụ a na-akpọ Gregory bụ poopu malite n’afọ 590 ruo 604 Oge Anyị. Kwuokwa na “a na-akpọkarị ya ‘onye wepụtara pọgatrị.’” Ọ bụ ná nnọkọ ndị isi Chọọchị Katọlik nwere n’obodo Liọns n’afọ 1274 nakwa nke ha nwere na Flọrens n’afọ 1439 ka ha nọ kọwakwuo ihe ozizi pọgatrị bụ. Ha mechakwara kwughachi ya ná nnọkọ ọzọ e nwere na Trent n’afọ 1547.

a Akwụkwọ bụ́ Orpheus: A General History of Religions kwuru banyere pọgatrị na “o nweghị ihe ọ bụla e kwuru banyere ya n’oziọma Matiu, Mak, Luk na Jọn.” Akwụkwọ ọzọ bụ́ New Catholic Encyclopedia kwuru, sị: “E lebachaa anya n’ihe niile, ozizi pọgatrị ahụ chọọchị Katọlik na-akụzi gbadoro ụkwụ ná nkụzi ọdịbendị, ọ bụghị n’Akwụkwọ Nsọ.”—Second Edition, Volume 11, peeji nke 825.

b Gụọ New Catholic Encyclopedia, Second Edition, Volume 11, peeji nke 824.