Umwami w’u Buyuda witwaga Yehoshafati yasenye ibicaniro bya Bayali, arimbura n’ibigirwamana byari mu gihugu. Yashakaga ko abantu bamenya amategeko ya Yehova. Ni yo mpamvu yohereje abayobozi n’Abalewi mu Buyuda bwose kugira ngo bigishe abantu amategeko ya Yehova.

Abantu bo mu bihugu byari bikikije u Buyuda batinyaga kubutera, kuko bari bazi ko Yehova yari ashyigikiye abantu be. Ibaze ko bigeze no kuzanira Umwami Yehoshafati impano. Icyakora Abamowabu, Abamoni n’abo mu karere ka Seyiri bateye Yehoshafati. Yehoshafati yari azi ko akeneye ko Yehova amufasha. Yatumyeho abagabo, abagore n’abana ngo baze i Yerusalemu, maze asengera imbere yabo ati: “Yehova, ntitwatsinda utadufashije. Turakwinginze, tubwire icyo dukora.”

Yehova yasubije iryo sengesho, arababwira ati: “Ntimutinye. Nzabafasha. Muzajye ku rugamba, mwihagararire gusa maze murebe uko nzabakiza.” Yehova yabakijije ate?

Ku munsi wakurikiyeho, Yehoshafati yatoranyije abaririmbyi, abategeka kugenda imbere y’abasirikare baririmba. Bavuye i Yerusalemu bagera i Tekowa, aho bari kurwanira.

Mu gihe abaririmbyi basingizaga Yehova barangurura amajwi y’ibyishimo, Yehova na we yarabatabaye. Yateje urujijo mu Bamoni n’Abamowabu baricana, ntiharokoka n’umwe. Icyakora Yehova yarinze abaturage b’u Buyuda, abasirikare n’abatambyi. Abo mu bihugu byari bikikije u Buyuda bose bumvise ibyo Yehova yari yakoze, bamenya ko yari agikomeje gushyigikira abantu be. None se muri iki gihe Yehova arinda abantu be ate? Akoresha uburyo bwinshi agakiza abamusenga. Icyakora ntakenera ko abantu bamufasha.