IGICE CYA 74
Yesu aba Mesiya
Yohana yabwirizaga abantu avuga ati: “Hari undi muntu ukomeye kundusha ugiye kuza.” Igihe Yesu yari afite imyaka nka 30 yavuye i Galilaya ajya ku Ruzi rwa Yorodani, aho Yohana yabatirizaga. Yesu yashakaga ko Yohana amubatiza, ariko Yohana yaramubwiye ati: “Si njye ugomba kukubatiza. Ahubwo ni wowe ugomba kumbatiza.” Yesu yabwiye Yohana ati: “Yehova ashaka ko umbatiza.” Hanyuma bajya mu Ruzi rwa Yorodani maze Yohana yibiza Yesu mu mazi.
Yesu amaze kuburuka mu mazi, yarasenze. Icyo gihe ijuru ryarakingutse maze umwuka w’Imana umuzaho umeze nk’inuma. Nuko Yehova avugira mu ijuru ati: “Uri Umwana wanjye nkunda. Ndakwemera!”
Igihe umwuka wa Yehova wazaga kuri Yesu ni bwo yari abaye Kristo cyangwa Mesiya. Ubwo ni bwo yari agiye gutangira umurimo Yehova yamwohereje gukora ku isi.
Yesu akimara kubatizwa, yagiye mu butayu amarayo iminsi 40. Avuyeyo yagiye kureba Yohana. Igihe Yohana yabonaga aje amusanga, yaravuze ati: “Dore Umwana w’Intama w’Imana uzakuraho icyaha cy’abatuye isi.” Ibyo Yohana yavuze byatumye abantu bamenya ko Yesu ari we Mesiya. Ese uzi ibyabaye kuri Yesu igihe yari akiri mu butayu? Reka tubirebe mu gice gikurikira.
“Mu ijuru havugira ijwi rigira riti: ‘uri Umwana wanjye nkunda. Ndakwemera!’”—Mariko 1:11
Ibindi wamenya
YESU NI INZIRA, UKURI N’UBUZIMA
Yesu abatizwa
Kuki Yesu yasabye ko abatizwa kandi atarigeze akora icyaha?
IBIBAZO BISHINGIYE KURI BIBILIYA
Kubatizwa bisobanura iki?
Muri Bibiliya harimo inkuru nyinshi zivuga iby’umubatizo wo mu mazi menshi. Inagaragaza akamaro ku kubatirizwa mu mazi menshi n’icyo bisobanura.
