29 UGUSHYINGO 2023
U BURUSIYA

Abavandimwe batanu bo mu Burusiya bahamijwe icyaha n’urukiko rwo mu gace ka Saratov

FUNGURA

Ku itariki ya 23 Ugushyingo 2023, urukiko rw’akarere ka Balakovskiy, mu gace ka Saratov rwatanze umwanzuro w’urubanza ruregwamo abavandimwe bakurikira: Aleksey Bogatov, Yevgeniy Fomashin, Vladimir Mavrin, Andrey Murych na Sergey Tyurin. Abo bavandimwe uko ari batanu bahamijwe icyaha. Aleksey na Vladimir bakatiwe igifungo gisubitse cy’imyaka itandatu. Andrey, Sergey, na Yevgeniy baciwe amande y’amadolari 3.362 y’Amanyamerika (ni ukuvuga arenga 4.000.000 RWF). Nta n’umwe muri bo wajyanywe muri gereza.

Icyo twamuvugaho

Yevgeniy Fomashin

Igihe yavukiye: 1977 (Balakovo)

Ibimuranga: Yakoraga iby’amashanyarazi

Igihe yigaga Bibiliya yakozwe ku mutima n’amasezerano ya Bibiliya avuga ko ku isi hazabaho amahoro n’umutekano. Yabatijwe mu mwaka wa 2013. Yize ururimi rw’amarenga kugira ngo afashe abafite ubumuga bwo kutumva bo mu gace k’iwabo

Ibyo yavuze

Ni gute inkuru z’abavandimwe bafunzwe kera zagufashije?

Igihe nari muri gereza, nibutse ko umuvandimwe Konstantin Bazhenov, Aleksey Budenchuk, Gennadiy German, Roman Gridasov, Feliks Makhammadiyev na Aleksey Miretskiy na bo bari bafungiwe muri iyo gereza muri 2018 na 2019. Ukwizera kwabo kwarankomeje. Nanone nkomeje guterwa inkunga n’abavandimwe na bashiki bacu benshi babaye indahemuka igihe babaga bahanganye n’ibigeragezo. Ni nk’aho tuba turi kumwe muri ibyo bigeragezo mpanganye na byo.

Andrey Murych

Igihe yavukiye: 1991 (Balakovo)

Ibimuranga: Akora mu ruganda rukora ibyuma

Nyirakuru ni we wamubwiye bwa mbere ibya Bibiliya. Yashimishijwe no kumenya ubuhanuzi bwo muri Bibiliya. Yabatijwe mu mwaka wa 2007

Yashakanye na Anastasiya mu mwaka wa 2009. Bafite umwana w’umukobwa

Ibyo yavuze

Ni iki cyagufashije kwihangana igihe wari muri gereza?

Ikintu cyangoye cyane igihe nari mfunze, ni ugukomeza kugira ibyishimo cyane cyane mu mezi abiri ya mbere. Ikintu cyamfashije ni ukumenya ko imyifatire yanjye, cyane cyane muri ibyo bihe bitoroshye, yari kugaragaza ko nshimira Yehova kubera ibyo yankoreye byose. Gukomeza kuba indahemuka kandi ufite ibyishimo ni bwo buryo bwiza bwo kugaragaza ko ushimira Yehova. Namenye neza ko Yehova ashobora kumfasha ngahangana n’ikintu icyo ari cyo cyose. Yehova ashobora kumpa amahoro mu bibazo byose mpura na byo.

Sergey Tyurin

Igihe yavukiye: 1994 (Balakovo)

Ibimuranga: Yakoze akazi kajyanye n’iby’amashanyarazi

Nyirakuru ni we watangiye kumubwira ibya Bibiliya. Yasobanukiwe ko gukurikiza amahame yo muri Bibiliya ari byo bituma umuntu agira imibereho ishimishije. Yabatijwe mu mwaka wa 2012

Yashakanye na Yelizaveta mu mwaka wa 2018

Ibyo yavuze

Ni iki wize igihe watotezwaga uzira ukwizera kwawe?

Nize ibintu bitatu. Icya mbere, ni uko buri gihe Yehova aba yiteguye kumfasha. Azi ibyo nkeneye cyane, kandi azi igihe gikwiriye cyo kubimpa. Icya kabiri, ni uko kwiringira amasezerano ya Yehova ari iby’ingenzi kugira ngo ngire amahoro yo mu mutima. Nubwo ibigeragezo bitugora, bimara igihe gito ugereranyije n’imigisha y’iteka tuzabona. Vuba aha sinzaba nibuka na kimwe muri ibyo bibazo nahuye na byo. Icya gatatu, ni uko ubumwe dufite ari ubw’ingenzi cyane. Ubwo bumwe butuma twihanganira ibigeragezo kandi buraturinda.

Abo bavandimwe uko ari batanu bagaragaje ukwizera, batwereka ko dushobora kwihanganira ibigeragezo mu gihe twishingikirije ku Mana.—2 Timoteyo 1:8.

Uko ibintu byakurikiranye

Ku itariki ya 11 Gashyantare 2022

Urubanza rwaratangiye
Ku itariki ya 23 Werurwe 2022

Abapolisi basatse amazu y’abo bavandimwe batanu. Buri wese bamuhase ibibazo maze bajya kubafunga
Ku itariki ya 25 Werurwe 2022

Abo bavandimwe bajyanywe muri gereza
Ku itariki 23 Mutarama 2023

Abo bavandimwe barafunguwe ariko bababuza gukora ingendo
Ku itariki ya 21 Nyakanga 2023

Urubanza rwaratangiye
Ku itariki ya 23 Ugushyingo 2023

Bahamijwe icyaha

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU