Phafogela Bohlokwa bja Theto

NA O kile wa kwa motho a belaela ka gore ga se gantši mothwadi wa gagwe a mo reta? Na mohlomongwe le wena o kile wa belaela ka se? Goba ge e ba o le mofsa, na o boletše ka tsela ye ka batswadi ba gago goba barutiši ba gago?

Tše dingwe tša dipelaelo tše ge e le gabotse di a kwagala. Eupša Mojeremane yo mongwe yo a tlwaetšago batho go kgothatša ba bangwe o re ge bašomi ba belaela ka tsela ye, ga se gore ge e le gabotse ba ba ba tshwenywa ke go nyaka go retwa eupša ba tshwenywa ke gore mothwadi wa bona ga a ba kgahlegele. Go sa šetšwe gore boemo ke bofe, go molaleng gore go na le selo seo se hlaelago. Theto le maikwelo a go kgahlegelwa ka bobedi di bohlokwa e le gore re tle re thabele ditswalano tše di kgotsofatšago.

Go bjalo le borapeding. Phuthego ya Bokriste e swanetše go ba le moya wa theto, borutho le maikwelo a go kgahlegela ba bangwe. Ditho tša yona di ba le boemo bjo bjalo bjo bobotse le go bo kgomarela ka go latela tlhahlo ya Beibele. Lega go le bjalo, go sa šetšwe gore phuthego ya rena e ka ba e e-na le lerato go fihla bokgoleng bofe, ka mehla go a kgonega go kaonefatša. Re naganne ka se, anke re hlahlobeng mehlala e mebotse e meraro ya mabapi le theto: Mohlanka wa Modimo wa pele ga mehla ya Bokriste e lego Elihu, moapostola Paulo le Jesu Kriste ka boyena.

Keletšo e Botho le e Nago le Tlhompho

Elihu, yo mohlomongwe e lego wa leloko la kgole la Aborahama o kgathile tema e kgolo go thušeng Jobo gore a be le pono e leka-lekanego ka tswalano ya gagwe le Modimo. Elihu o be a le botho e bile a hlompha. O ile a letela ka go se fele pelo sebaka sa gagwe sa go bolela. Gomme gaešita le ge bao ba ipitšago bagwera ba Jobo ba be ba duletše go mo swaya diphošo, go e-na le gore Elihu le yena a fo mo nea tayo, o ile a reta Jobo ka baka la tsela ya gagwe ya go loka. O dirile bjalo ka borutho le go mmontšha go mo kgahlegela bjalo ka mogwera, a diriša leina la Jobo, ka go se swane le bao ba bangwe bao ba ilego ba se le diriše. Ka botho o ile a kgopela a re: “Wene Jobo, hlê theetša se ke se búaxo, O sêkêxêlê mantšu a-ka ohle tsêbê.” Ka go ipea boemong bja Jobo ka tlhompho, o boletše gore: “O tsebê xore le nna ke wa Modimo bo-ka wêna; le nna ke bopilwe ka letsopa.” Ke moka o ile a mo reta ka gore: “Xe O ka ba le ditaba, O tlo mphetola, wa bolêla; xobane nna ke rata xe O ka tšwa Ò se n’e molato.”—Jobo 33:1, 6, 32.

Ka kgopolo e itšego, go swara ba bangwe ka tsela e botho le ka tlhompho ke tsela ya go ba reta. Ge e le gabotse, re ba re botša yo a re theeditšego gore, ‘Ke nagana gore ke swanetše go go tšeela godimo e bile ke swanetše go go swara gabotse.’ Ka baka leo, re fetišetša maikwelo a borutho gomme re bontšha gore re a mo kgahlegela.

Go ba botho go bolela se se fetago go fo  latela melao ya boitshwaro bjo bobotse ka tsela ya molao. Gore re fihlelele dipelo tša ba bangwe, botho bja rena e swanetše go ba bjo bo botegago le bjo bo tšwago pelong. Bo swanetše go ba ponagatšo ya go kgahlegela motho le go mo rata e le ka kgonthe.

Go Reta ka Tsela e Bohlale

Moapostola Paulo o bontšhitše tema yeo e kgathwago ke go ba bohlale ge re reta ba bangwe. Ka mohlala, ge a be a dira boboledi kua Athene leetong la gagwe la bobedi la boromiwa, o ile a emelela Bokriste go bo-radifilosofi ba Bagerika. Ela hloko kamoo a ilego a swaragana ka bohlale le kabelo ye e thata. “Ba bangwe ba bo-radifilosofi ba Baepikure gotee le ba Bastoiki ba thoma go boledišana le yena ka go mo ganetša, gomme ba bangwe ba be ba re: ‘Ke eng seo moratharathi yo a ratago go se bolela?’ Ba bangwe ba re: ‘O bonagala e le yo a bolelago ka medingwana e šele.’” (Ditiro 17:18) Go sa šetšwe dipolelo tše bjalo, Paulo o ile a dula a theošitše maswafo gomme a araba ka gore: “Banna ba Athene, ke bona gore dilong ka moka le bonagala le ineetše kudu go boifeng medingwana go feta ba bangwe.” Go e na le go ba swaya phošo ka baka la go rapela ga bona medimo ya diswantšho, Paulo o ile a ba reta ka baka la go ineela bodumeding.—Ditiro 17:22.

Na Paulo e be e le moikaketši? Ga go bjalo le gatee. O be a tseba gore ga se yena yo a swanetšego go ahlola batheetši ba gagwe; o be a tseba gabotse gore yena ka boyena o kile a se tsebe therešo. Thomo ya gagwe e be e le go bolela molaetša wa Modimo, e sego go ahlola ba bangwe. O be a bile le phihlelo ya seo Dihlatse tše dintši tša Jehofa lehono di se hweditšego: Baemedi ba bangwe ba kgonthe ba bodumedi bja maaka ba feleletša ba le gare ga baemedi ba matla kudu ba bodumedi bja therešo.

Tsela yeo Paulo a ilego a swaragana le boemo ka yona e be e le e botse gomme e bile le mafelelo a mabotse. “Banna ba bangwe ba mo tlatša gomme ba fetoga badumedi bao gare ga bona go bego go bile go e-na le Dionisio, moahlodi wa kgoro ya Areopago, le mosadi yo a bitšwago Damarisi, le ba bangwe ka ntle le bona.” (Ditiro 17:34) Ruri Paulo o be a le bohlale ka go reta Baathene ka baka la ditumelo tša bona—gaešita le ge e le ya maaka—go e na le go ba swaya phošo ya gore ga ba na tsebo e nepagetšego! Gantši batho bao ba arošwago ke tsebišo e fošagetšego ba na le dipelo tše dibotse.

Ge a be a bitšwa gore a tle go ipolelela go Heroda Agaripa II, le gona mo Paulo o ile a diriša tsela e bohlale. Go be go tsebega gore Heroda o ba le dikopano tša botona le botshadi le kgaetšedi ya gagwe e lego Berenike, e lego selo seo ruri se ganwago ke Lentšu la Modimo. Lega go le bjalo, Paulo ga se a ka a mo sola ka tsela le ge e le efe. Go e na le moo, o ile a hwetša lebaka le lebotse la go reta Heroda. “Mabapi le dilo ka moka tšeo ke begwago ka tšona ke Bajuda, Kgoši Agaripa, ke ikwa ke thabile gore ke itwela pele ga gago letšatšing le, kudu-kudu ka ge o le setsebi mabapi le metlwae ka moka gotee le dikganetšano tša Bajuda.”—Ditiro 26:1-3.

Ruri re swanetše go diriša tsela e swanago e bohlale ge re dirišana le batho ba bangwe! Go reta moagišani, morutwana-gotee, goba mošomi-gotee go ka dira gore go be le ditswalano tša khutšo le go kgothaletša boitshwaro bjo bobotse. Ka go fihlelela pelo ka theto yeo e swanelago, ka dinako tše dingwe re ka kgona go tutuetša batho ba dipelo tše di botegago gore go e na le go diriša mabaka le ditiro tše di fošagetšego ba diriše tšeo di dumelelanago le tsebo e nepagetšego.

Mohlala wa Jesu o Phethagetšego wa go Reta ba Bangwe

Jesu o ile a reta ba bangwe. Ka mohlala, ka morago ga go tsošwa ga gagwe le go rotogela legodimong, Jesu, a hlahlwa ke Modimo, o ile a bolela le diphuthego tše šupago tša Asia Minor a diriša moapostola Johane. Ga se a ka a palelwa ke go reta bao ba bego ba swanelwa ke theto. Diphuthegong tša kua Efeso, Peregamo le Thiathira, o dirišitše dipolelwana tše bjalo ka: “Ke tseba ditiro tša gago, boitapišo bja gago le kgotlelelo ya gago, le gore ga o kgotlelele batho ba babe”, “o dula o kgomaretše leina la-ka, gomme ga se wa latola tumelo ya gago go nna” le “ke tseba ditiro tša gago, lerato la gago le tumelo le bodiredi  le kgotlelelo, le gore ditiro tša gago tša gona bjale ke tše dikgolo go feta tša pele.” Gaešita le kua Sarede, moo phuthego e bego e nyaka keletšo e matla, Jesu o ile a ela hloko batho bao ba bego ba swanelwa ke theto, a re: “Lega go le bjalo, o na le maina a ba sego kae Sarede bao ba sa kago ba šilafatša dikobo tša bona tša ka ntle, ba tla sepela le nna ba apere tše tšhweu, gobane ba swanela.” (Kutollo 2:2, 13, 19; 3:4) Ruri Jesu o beile mohlala o mobotse!

Ka go ekiša Jesu, ga se ra swanela go ahlola sehlopha sa batho ka baka la ge ba sego kae sehlopheng seo ba palelwa, e bile ga se ra swanela go nea tayo e nyakegago ka ntle le gore re nee le theto e swanetšego. Lega go le bjalo, ke mo gobotse go gopola gore ge re reta ka morero wa go nyaka go nea tayo, theto ya rena e ka feleletša e sa kwewa. Tlwaela go reta ba bangwe ge go kgonega! Ke moka, ge go ka nyakega keletšo ka dinako tše dingwe, e ka amogelwa ka pelo e tšhweu.

Bagolo Bao ba Neago Theto e Swanetšego

Cornelia, mosadi wa Mokriste yo ga bjale a hlankelago ofising ya lekala ya Dihlatse tša Jehofa kua Yuropa, o gopola mathomong a bo-1970 ge molebeledi wa mosepedi a be a mmotšiša nakong ya ketelo gore thuto ya gagwe ya motho ka noši le go bala dimakasine go tšwela pele bjang. O re, “Ke ile ka lewa ke dihlong.” Eupša o ile a bolela gore o be a sa kgone go bala sehlogo se sengwe le se sengwe sa makasine. O gopola ka gore: “Go e na le go ntshwaya diphošo tabeng ye, o ile a ntheta bakeng sa go bala seo ke bego ke kgona go se bala. Ke ile ka kgothatšwa kudu ke theto ya gagwe moo ke ilego ka ikemišetša go bala sehlogo se sengwe le se sengwe go tloga ka nako yeo.”

Ray, yo a hlankelago ofising ya lekala kua Yuropa, o gopola letšatši la gagwe la mathomo  la tirelo ya bobulamadibogo. Molebeledi yo a okamelago phuthegong yeo, e lego monna yo a nago le boikarabelo bja kgwebo le bja lapa gotee le boikarabelo bjo bontši ka phuthegong, o ile a tsena Holong ya Mmušo mantšiboeng ao, a leba go Ray gomme a mmotšiša gore, “Letšatši la gago la mathomo la tirelo ya bobulamadibogo le be le le bjang?” Ga bjale, ka morago ga nywaga e ka bago e 60, Ray o sa dutše a gopola go naganela ga mogolo yoo.

Go etša ge diphihlelo tšeo tše pedi di bontšha, tebogo ya kgonthe le e lerato bakeng sa seo ba bangwe ba se dirilego—e sego mantšu ao a fo bolelwago feela goba go fo tšhela motho phori mahlong—e ka ba le mafelelo a kgahlišago kudu. Ka phuthegong ya Bokriste, re na le mabaka a mantši kudu a go reta badumedi-gotee le rena. Nagana feela ka kganyogo ya bona ya go hlankela Jehofa, ditlhaloso tša bona tšeo di lokišeditšwego gabotse, tšwelopele ya bona ya go fenya letšhogo la go ema pele ga batho bakeng sa go bea dipolelo goba go tšea karolo dikarolong tša diboka, go ba ga bona mafolofolo boboleding le go ruteng le maiteko a bona a go gatelela mediro ya Mmušo le dipakane tša moya. Ge re reta ba bangwe, re putswa kudu. Go a re thabiša gomme go dira gore re dule re lebelela dilo ka tsela e botse.—Ditiro 20:35.

Bagolo ba phuthego ba dira gabotse ge ba reta phuthego ka baka la modiro wa yona o mobotse. Le gona ge go nyakega gore go newe keletšo, ba tla e nea ka moya wa lerato. Ka lehlakoreng le lengwe, ba phema go ba bao ba tshwenyegilego ka gore dilo ka moka di dirwe ka tsela e phethagetšego moo e lego gore selo le ge e le sefe seo se sa phethagalago se lebelelwa e le bofokodi bjo bogolo.

Bagolo ba Bakriste bao ba ekišago mohlala o botho wa tlhompho le wa lerato wo o bontšhitšwego ke Elihu, tsela e bohlale ya go bolela yeo e dirišitšwego ke Paulo gotee le go tshwenyega ka tsela e lerato mo go bontšhitšwego ke Jesu, ba tla ba mothopo wa kgothatšo ya kgonthe go bana babo bona. Theto e tla kgothatša ba bangwe gomme e tla tliša ditswalano tše di thabišago le tše di nago le botee. Ruri Jesu o swanetše go ba a ile a thaba kudu kolobetšong ya gagwe ge a be a e-kwa Tatagwe wa legodimong a mo reta ka mantšu a rego: “O Morwa wa-ka, morategi; ke go amogetše”! (Mareka 1:11) Anke re thabišeng dipelo tša bana babo rena ka mantšu a rena a theto ao a botegago le a tšwago pelong.

[Diswantšho go letlakala 15]

Tsela e bohlale ya go bolela e ile ya ba le mafelelo a mabotse go Paulo, e ka ba bjalo le go rena

[Seswantšho go letlakala 16]

Theto e borutho le e tšwago pelong e ka ba le mafelelo a kgahlišago