Ebangedi ya Mareka 1:1-45
-
Johane Mokolobetši o bolela ditaba tše dibotse (1-8)
-
Jesu o a kolobetšwa (9-11)
-
Sathane o leka Jesu (12, 13)
-
Jesu o thoma go bolela ditaba tše dibotse Galelia (14, 15)
-
O bitša barutiwa ba mathomo (16-20)
-
O raka letemona (21-28)
-
Jesu o fodiša batho ba bantši Kaperenaume (29-34)
-
O rapela lefelong leo le se nago batho (35-39)
-
Motho yo a nago le bolwetši bja lephera o a fodišwa (40-45)
1 Ditaba tše dibotse tša mabapi le Jesu Kriste Morwa wa Modimo di thoma mo.
2 Ka pukung ya moporofeta Jesaya go ngwadilwe gore: “(Bona! Ke roma moromiwa wa ka yo a tlago go go lokišetša tsela gore a go ete pele.)+
3 Go na le motho yo a goeletšago a le lešokeng o re: ‘Lokišang tsela ya Jehofa!* Le dire gore ditsela tša gagwe di lekalekane.’”+
4 Johane Mokolobetši o be a le lešokeng, a ruta batho gore ba kolobetšwe go bontšha gore ba a itshola e le gore ba lebalelwe dibe tša bona.+
5 Batho ka moka bao ba bego ba etšwa tikologong ya Judea le bao ba bego ba dula Jerusalema ba be ba eya go yena gomme a ba kolobetša* Nokeng ya Jorodane. Ba be ba ipobola dibe tša bona pele ga batho.+
6 Johane yena o be a apere diaparo tšeo di dirilwego ka boya bja kamela gomme a itlemile letheka+ ka lepanta leo le dirilwego ka mokgopa. O be a eja ditšie le todi ya dinose tša naga.+
7 O be a bolela, a re: “Ka morago ga ka go tla yo a mphetago ka maatla, yoo ke sa swanelegego go inama ka tlemolla+ marala a dieta* tša gagwe.
8 Nna ke le kolobeditše ka meetse, eupša yena o tla le kolobetša ka moya o mokgethwa.”+
9 Matšatšing ao, Jesu o ile a tla a etšwa Natsaretha ya Galelia gomme Johane a mo kolobetša Nokeng ya Jorodane.+
10 Gateetee ge a se na go emelela ka meetseng, o ile a bona magodimo a bulega gomme moya o mokgethwa o theogela go yena o le bjalo ka leeba.+
11 Ke moka lentšu la tšwa legodimong la re: “O Morwa wa ka, yo ke mo ratago. Ke go amogetše.”+
12 Ka yona nako yeo, moya wa Modimo o ile wa dira gore Jesu a ye lešokeng.
13 Ka gona o ile a dula moo lešokeng ka matšatši a 40 gomme gona moo, Sathane o ile a mo leka.+ Gona moo lešokeng go be go na le dibata tša naga, eupša barongwa ba be ba mo hlankela.+
14 Bjale ka morago ga ge Johane a swerwe, Jesu o ile a ya Galelia,+ a bolela ditaba tše dibotse tša Modimo+
15 a re: “Nako yeo go boletšwego ka yona e fihlile le Mmušo wa Modimo o batametše. Itsholeng+ gomme le dumele ditaba tše dibotse tša Modimo.”
16 Ge a dutše a sepela kgauswi le Lewatle la Galelia, o ile a bona Simone le Andrea+ morwarragwe ba lahlela dinnete tša go rea dihlapi ka lewatleng+ ka gobane e be e le barei ba dihlapi.+
17 Ka gona Jesu a re go bona: “Ntšhaleng morago, ke tla le dira barei ba batho.”+
18 Ka yona nako yeo, ba tlogela dinnete tša bona ba mo šala morago.+
19 Ge a se na go tloga moo, o ile a bona Jakobo morwa wa Tsebedeo a na le morwarragwe, e lego Johane. Ba be ba le ka sekepeng ba lokiša dinnete tša bona,+
20 gomme Jesu a ba bitša ntle le go senya nako. Ka gona ba tlogela Tsebedeo tatago bona ka sekepeng a na le banna bao ba bego ba mo šomela ke moka ba latela Jesu.
21 Ba tloga ba ya Kaperenaume.
Ge Sabatha e se na go thoma, o ile a tsena ka sinagogeng gomme a thoma go ruta.+
22 Batho ba ile ba makatšwa ke tsela yeo a bego a ruta ka yona ka gobane o be a ruta bjalo ka motho yo a nago le maatla a bolaodi, e sego bjalo ka ditsebi tša molao.*+
23 Ka yona nako yeo, ka sinagogeng ya bona go be go na le monna yo a bego a tsenwe ke letemona, gomme o be a goeletša, a re:
24 “O tlile go dira eng mo wena Jesu wa Monatsaretha?+ Na o tletše go re fediša? Ke tseba gabotse gore o mang, o Mokgethwa wa Modimo.”+
25 Eupša Jesu a kgalemela letemona leo a re: “Homola gomme o tšwe go yena!”
26 Ka morago ga gore letemona leo le mo tšutlatšutle le go goeletša ka lentšu le legolo, le ile la tšwa go yena.
27 Bjale, batho ka moka ba be ba maketše kudu moo ba ilego ba thoma go boledišana ba re: “Ke dilo mang tše? Na ke tsela e mpsha ya go ruta? O na le maatla a go laola meoya e mebe gomme e a mo kwa.”
28 Ka gona, ka yona nako yeo, dilo tšeo Jesu a di dirilego tša tlala mafelong ka moka ao a lego tikologong ya Galelia.
29 Ke moka Jesu, Jakobo le Johane ba tloga sinagogeng gotee le Simone le Andrea gomme ba ya mo go dulago Simone le Andrea.+
30 Bjale mogwegadi+ wa Simone* o be a robetše gomme a swerwe ke letadi,* ke moka ba napa ba botša Jesu ka bolwetši bjoo bo mo swerego.
31 Ka gona Jesu a ya go yena. A mo swara ka seatla gomme a mo tsoša. Bolwetši bjoo bja gagwe bja fola ke moka a thoma go ba direla dijo.
32 Ge e šetše e le mantšiboa, letšatši le sobetše, batho ba ile ba mo tlišetša batho bao ba bego ba babja ebile ba na le matemona.+
33 Batho ba motse ka moka ba be ba kgobokane mojakong wa ntlo ya Simone le Andrea.
34 Ka gona, o ile a fodiša batho ba bantši bao ba bego ba swerwe ke malwetši a fapafapanego,+ a ntšha matemona a mantši, eupša o be a sa dumelele matemona ao gore a bolele ka gobane matemona ao a be a tseba gore ke yena Kriste.*
35 Letšatšing le le latelago, e sa le ka masa, ge go be go sa swifetše, o ile a tsoga a ya ka ntle lefelong leo le bego le se na batho gomme a thoma go rapela.+
36 Le ge go le bjalo, Simone le batho bao a bego a na le bona ba be ba mo nyaka
37 gomme ba mo hwetša ke moka ba re go yena: “Batho ka moka ba a go nyaka.”
38 Eupša a re go bona: “A re yeng lefelong le lengwe, metseng yeo e lego kgauswi, gore ke yo bolela ditaba tše dibotse moo ka gobane ke tletše sona seo.”+
39 Ke moka a sepela le Galelia ka moka ga yona, a bolela ditaba tše dibotse disinagogeng tša bona ka moka ebile a raka matemona.+
40 Le gona, go ile gwa tla monna yo mongwe yoo a bego a na le bolwetši bja lephera, a mo kgopela a khuname a re: “Ge e ba o rata, o ka mphodiša.”*+
41 Ge a realo, Jesu o ile a mo kwela bohloko ke moka a otlolla letsogo la gagwe, a mo kgwatha a re: “Ke a rata! Fola.”+
42 Ke moka lephera la tloga go yena ka yona nako yeo gomme a fola.
43 Pele monna yoo a ka sepela, Jesu o ile a mmotša tsebe-go-kwa
44 a re: “O se ke wa botša motho ka taba ye, eupša eya go moperisita gore a go bone, gomme o ntšhe dilo tšeo Moshe a laetšego gore motho yoo a fodišitšwego lephera a di ntšhe,+ e le gore ba bone gore o fodile.”+
45 Monna yo o ile a sepela ke moka a thoma go bolela kudu ka taba yeo gomme a e tlatša nageng moo Jesu a ilego a se sa kgona go tsena motseng ntle le gore batho ba mo lemoge, eupša o ile a dula ka ntle mafelong ao a lego thokwana. Le ge go le bjalo, ba ile ba tla go yena ba etšwa mahlakoreng ka moka.+
