Ditiro tša Baapostola 20:1-38
20 Bjale ge mpherefere woo o fela, Paulo o ile a bitša barutiwa gomme ka morago ga gore a ba kgothatše o ile a ba laela a ya Matsedonia.
2 Ka morago ga gore a sepele ditikologo tšeo a tšama a kgothatša batho bao ba lego moo, o ile a fihla Gerika.
3 A fetša dikgwedi tše tharo a le moo. Eitše ge a sa re o ya Siria ka sekepe a kwa gore Bajuda ba loga maano a go mmolaya,+ a boela morago Matsedonia.
4 O be a sepela le Sopatere morwa wa Piro yo a tšwago Berea, Aristareko+ le Sekundo bao ba tšwago Thesalonika, Gayo yo a tšwago Derebe, Tigiko+ le Torofimo+ bao ba tšwago profenseng ya Asia gotee le Timotheo.+
5 Banna ba ba ile ba re eta pele gomme ba fihla ba re emela Teroa,
6 eupša rena re ile ra tloga Filipi ka sekepe ka morago ga Monyanya wa Dinkgwa tše di sa Omelwago.+ Ke moka ka morago ga matšatši a mahlano ra fihla go bona kua Teroa, gomme ra fetša matšatši a šupago re le moo.
7 Letšatšing la pele* la beke, re ile ra kgobokana gore re thabele dijo. Ka ge Paulo a be a tlo sepela letšatšing le le latelago, o ile a thoma go ruta batho bao ba bego ba kgobokane moo, a bolela nako e telele go fihlela gare ga mpa ya bošego.
8 Ka phapošing ya ka godimo yeo re bego re kgobokane go yona go be go na le mabone a mantši.
9 Mošemane yo a bitšwago Oitiko o be a dutše lefasetereng, eupša ge Paulo a le gare a ruta o ile a swarwa ke boroko, a wela fase go tšwa lebatong la boraro gomme ge ba fihla go yena ba hwetša a hlokofetše.
10 Eupša Paulo a ya lebatong la ka tlase, a robala godimo ga mošemane yoo, a mo gokarela+ a re: “Le se ke la tshwenyega ka gobane o boetše o a phela.”+
11 Ke moka Paulo a ya lebatong la ka godimo a tšea dijo a ja. A tšwela pela a ruta go ba go fihla ka masa ke moka a sepela.
12 Batho bao ba bego ba le moo ba ile ba sepela le Oitiko. Ba be ba homotšegile kudu ka baka la ge a be a phela.
13 Rena re ile ra sepela ka sekepe ra ya Aso, moo re bego re nyaka go yo tšea Paulo. Paulo o ile a re laela gore re kopane le yena Aso ka ge yena a be a tlo ya moo ka maoto.
14 Re ile ra kopana le yena Aso, ra mo tšea gomme ra ya Mitilene.
15 Letšatšing leo le latelago re ile ra ya lefelong leo le lebanego le Kiyo, letšatšing leo le latelago leo ra ya Samose ke moka gosasa ga gona ra ya Mileto.
16 Paulo o be a sa nyake go tsena Efeso,+ ka gobane o be a sa nyake go senya nako profenseng ya Asia. Ka gobane o ile a dira ka pela gore ge a be a ka kgona a fihle Jerusalema+ ka letšatši la Monyanya wa Pentekoste.
17 Ge a le Mileto o ile a romela molaetša Efeso wa gore bagolo ba phuthego ba bitšwe.
18 Ge ba fihla go yena o ile a re go bona: “Le tseba gabotse tsela yeo ke itshwerego ka yona gare ga lena ga e sa le ke fihla mo profenseng ya Asia,+
19 ke hlankela Morena ka boikokobetšo,+ ke lla ebile ke tlaišega ka ge Bajuda ba be ba nyaka go mpolaya.
20 Le ge go le bjalo ga sa nka ka tlogela go le botša dilo tšeo di tlago go le hola le go le ruta pele ga batho+ le ka ntlo le ntlo.+
21 Eupša ke ile ka nea bohlatse bjo bo feletšego go Bajuda le go Bagerika gore ba swanetše go itshola,+ ba rapele Modimo le go dumela go Morena wa rena Jesu Kriste.+
22 Gona bjale moya o mokgethwa o ntaela gore ke ye Jerusalema le ge ke sa tsebe gore ke tlo diragalelwa ke eng moo.
23 Seo ke se tsebago ke gore moya o mokgethwa o mpoditše gantši gore metseng ka moka yeo ke yago go yona ke tlo tlaišwa le go golegwa.+
24 Le ge go le bjalo, ga ke tšee bophelo bja ka bo le bohlokwa kudu, sa bohlokwa kudu ke gore ke fetše bophelo bja ka ka moka+ ke hlankela Modimo le gore ke fetše modiro wo Morena Jesu a mphilego wona, wa gore ke bolele ka mo go feletšego ditaba tše dibotse tša botho bjo bogolo bja Modimo.
25 “Ke a tseba gore le ka se sa mpona gape lena ka moka bao ke ilego ka le botša ditaba tše dibotse tša Mmušo wa Modimo.
26 Ka baka leo lehono ke le biditše mo ka moka gore le tle le hlatsele gore ga ke na molato wa madi a batho ba.+
27 Ka gobane ke le boditše gore morero wa Modimo ka batho ke ofe.+
28 Itlhokomeleng+ le be le hlokomele mohlape ka moka woo moya o mokgethwa o le filego maikarabelo a gore le o hlokomele,*+ le be le diše phuthego ya Modimo+ yeo a e rekilego ka madi a Morwa wa gagwe.+
29 Ke a tseba gore ka morago ga ge ke sepetše, go tlo tla diphiri tše šoro+ tšeo di tlago go tlaiša mohlape.
30 Le gona banna ba bangwe mo gare ga lena ba tlo bolela maaka e le gore barutiwa ba bangwe ba ba latele.+
31 “Dulang le phakgame le gopola gore ke feditše mengwaga e meraro+ ke kgothatša yo mongwe le yo mongwe wa lena ka megokgo bošego le mosegare.
32 Bjale ke le bea ka diatleng tša Modimo gore a le hlokomele le go le nea lentšu la botho bja gagwe bjo bogolo, e lego lentšu leo le tlago go le aga le go le nea bohwa gare ga batho ka moka bao ba dirilwego ba bakgethwa.+
33 Ga se ka leka go tšeela motho silifera, gauta goba diaparo.+
34 Le a tseba gore ke šomile ka thata gore ke be le dilo tšeo ke nago le tšona+ e le gore ke kgone go itlhokomela le go hlokomela bao ba nago le nna.
35 Ke le bontšhitše gore go šoma ka tsela ye,+ go tlo dira gore le kgone go thuša bao ba hlokago thušo gare ga lena. Le se ke la lebala seo Morena Jesu a ilego a se bolela ge a be a re: ‘Go fa go thabiša kudu+ go feta go fiwa.’”
36 Ka morago ga gore Paulo a bolele dilo tše o ile a khunama le bona ka moka a rapela.
37 Batho bao ba bego ba le moo ba ile ba thoma go lla kudu, ba gokarela Paulo le go mo khisa,
38 ka gobane ba be ba kwešitšwe bohloko kudu ke mantšu ao a ilego a a bolela a gore ba ka se sa mmona gape.+ Ke moka ba mo felegetša sekepeng.
