Kutollo Yeo e Utolletšwego Johane 2:1-29
2 “Ngwalela morongwa+ wa phuthego ya Efeso+ o re: Yo a swerego dinaledi tše šupago ka letsogong la gagwe le letona, ebile a sepela gare ga dihlomelamabone tše šupago tša gauta,+ o re:
2 ‘Ke tseba dilo tšeo o di dirago, mošomo wa gago le tsela yeo o kgotleletšego ka yona, gotee le gore ga o kgone go kgotlelela batho ba babe, le gore o leka bao ba rego ke bona baapostola mola e se baapostola+ gomme wa hwetša gore ba be ba bolela maaka.
3 Le gona, o na le kgotlelelo ebile o kgotleletše mathata a mantši ka baka la leina la ka+ gomme ga se wa fela maatla.+
4 Eupša ke go solela gore o tlogetše go bontšha lerato leo o bego o na le lona peleng.
5 “‘Bjale, gopola gore o wele o le maemong afe gomme o itshole,+ o be o dire dilo tšeo o bego o di dira peleng. Ge e ba o sa itshole,+ ke tlo tla go wena gomme ka tloša sehlomelamabone sa gago+ lefelong la sona.
6 Eupša go na le seo o se dirago gabotse, o hloile dilo tšeo di dirwago ke sehlopha sa bodumedi sa Nikolase+ tšeo le nna ke di hloilego.
7 Anke yo a nago le tsebe a kwe seo moya o mokgethwa o se botšago diphuthego:+ Yo a fenyago+ ke tla mo dumelela go ja dienywa tšeo di lego mohlareng wa bophelo,+ woo o lego paradeiseng ya Modimo.’
8 “Ngwalela morongwa wa phuthego ya Simirina o re: ‘Wa Mathomo le wa Mafelelo,’+ yoo a ilego a hlokofala gomme a buša a phela, o re:+
9 ‘Ke tseba gore o a tlaišega le gore o a diila, eupša o humile.+ Ke tseba le batho bao ba go rogago bao ba rego ke bona Bajuda, eupša e se Bajuda go e na le moo e le sehlopha sa* Sathane.+
10 O se ke wa tšhošwa ke dilo tšeo o lego kgauswi le go tlaišwa ka tšona.+ Tseba gore Diabolo o tla dula a dira gore ba bangwe ba lena ba lahlelwe kgolegong e le gore le lekwe kudu, le gona le tla tlaišega ka matšatši a lesome. Wena dula o botega go fihlela o hlokofala gomme ke tla go fa moputso* wa bophelo.+
11 Anke yo a nago le tsebe a kwe+ seo moya o mokgethwa o se botšago diphuthego, ge o re: Yo a tlago go fenya,+ lehu la bobedi le ka se mo dire selo le gatee.’+
12 “Ngwalela morongwa wa phuthego ya Peregamo o re: Yo a nago le sabola e telele ya magale a mabedi, o re:+
13 ‘Ke tseba mo o dulago gona, e lego moo go nago le setulo sa bogoši sa Sathane. Eupša o dula o botegela leina la ka+ ebile o ile wa dula o na le tumelo go nna+ gaešita le mehleng ya Antipase yo e lego hlatse ya ka yeo e botegago,+ yoo a ilego a bolawa+ motseng wa gabo lena moo Sathane a dulago gona.
14 ‘Le ge go le bjalo, ke go solela dilo tše sego kae. Ke go solela gore moo o lego gona o na le batho bao ba latelago thuto ya Bileama+ yoo a ilego a dira gore dithuto tša gagwe di dire gore Balaka+ a gokeletše Baisiraele gore ba je nama yeo e bego e hlabetšwe medingwana ya diswantšho le go itshwara gampe ka tša thobalano.*+
15 Ka tsela yeo e swanago, o na le bao ba latelago dilo tšeo di rutwago sehlotswaneng sa bodumedi sa Nikolase.+
16 Ka gona itshole. Ge e ba o sa itshole, ke tla tla go wena kapelapela gomme ka lwa le bona ka sabola e telele yeo e tšwago molomong wa ka.+
17 “‘Anke yo a nago le tsebe a kwe seo moya o mokgethwa o se botšago diphuthego ge o re:+ Yo a tlago go fenya,+ ke tla mo fa a mangwe a manna ao a utilwego,+ ka ba ka mo fa le leswikana le lešweu leo go lona go ngwadilwego leina le leswa leo go se nago yo a le tsebago, eupša le tsebja ke yoo a le amogelago a nnoši.’
18 “Ngwalela morongwa wa phuthego ya Thiathira+ o re: Morwa wa Modimo yoo mahlo a gagwe a swanago le kgabo ya mollo+ le yoo maoto a gagwe a swanago le koporo yeo e sa tswakwago le selo, o re:+
19 ‘Ke tseba dilo tšeo o di dirago, lerato la gago, tumelo ya gago, kamoo o hlankelago Modimo ka gona le kgotlelelo ya gago ebile ke tseba le gore dilo tšeo o di dirilego gona bjale di kaone go feta dilo tšeo o di dirilego peleng.
20 “‘Eupša ke go solela gore o tlogetše mosadi yo a bitšwago Isebele,+ yoo a rego ke yena moporofeta wa mosadi, a ruta bahlanka ba ka gore ba itshware gampe ka tša thobalano+ le gore ba je nama yeo e hlabetšwego medingwana ya diswantšho gomme a ba aroša.
21 Ke mo file nako ya gore a itshole, eupša ga a nyake go itsholela boitshwaro bja gagwe bjo bobe bja tša thobalano.*
22 Ke kgauswi le go mo dira gore a babje kudu, le gona ke tla dira gore bao ba hlotlolago* le yena ba welwe ke masetlapelo a magolo. Eupša ge ba ka itsholela dilo tšeo a ba dirišitšego tšona, ba ka se welwe ke masetlapelo a magolo.
23 Le gona, ke tla bolaya bana ba gagwe ka bolwetši bjo bo bolayago, e le gore diphuthego ka moka di tsebe gore ke nna ke hlahlobišišago pelo ya motho le seo a se naganago ka garegare ga gagwe.* Yo mongwe le yo mongwe wa lena ke tla mo nea go ya le ka seo a se dirilego.+
24 “‘Eupša lena ka moka bao le lego Thiathira, le lena ka moka bao le sa dumelego seo Isiraele a se rutago, gotee le lena bao le sa kago la tseba “dilo tšeo di tseneletšego” tša Sathane,+ ke re: Ga ke le rweše morwalo o mongwe.
25 Ka mo go swanago, swarelelang dilong tše dibotse tšeo le nago le tšona go fihlela ge ke boa.+
26 Yo a fenyago gomme a kwa dilo tšeo ke di laetšego go fihlela mafelelong, ke tla mo fa maatla a go laola ditšhaba.+
27 Le gona, o tla buša batho ka molamo wa tšhipi+ e le gore ba tle ba pšhatlagane go swana le dibjana tša letsopa, go swana le ge Tate le yena a mphile maatla a go laola.
28 Le gona ke tla mo nea naledi yeo e tšwelelago pele letšatši le hlaba.+
29 Anke yo a nago le tsebe a kwe seo moya o mokgethwa o se botšago diphuthego.’
Mengwalo ya Tlase
^ Phetolelo ya lentšu ka lentšu e re, “sinagoge ya.”
^ Phetolelo ya lentšu ka lentšu e re, “mphapahlogo.”
^ Bona Tlhaloso ya Mantšu.
^ Ka Segerika ke por·neiʹa. Bona Tlhaloso ya Mantšu go “Go itshwara gampe ka tša thobalano.”
^ Bona Tlhaloso ya Mantšu go “Bohlotlolo.”
^ Goba, “le maikwelo a ka garegare.” Phetolelo ya lentšu ka lentšu e re, “dipshio.”
