Talinhaga 26:1-28
26 Arog sa niyebe sa tig-init asin uran sa tig-aranihan,An onra bakong angay sa sarong mangmang.+
2 Kun paanong may dahilan na magdulag an sarong gamgam asin na maglayog an sarong balinsasayaw,An sarong maldisyon dai man minaabot na mayong tunay na dahilan.*
3 An latigo para sa kabayo, an renda para sa asno,+Asin an pamakol para sa likod nin mga mangmang na tawo.+
4 Dai mo pagsimbagon an mangmang sigun sa saiyang kamangmangan,Tanganing dai ka magin kalebel* niya.
5 Simbagon mo an mangmang sigun sa saiyang kamangmangan,Tanganing dai niya paghunaon na madunong siya.+
6 Siring sa saro na pinipilay an sadiri niyang bitis asin pigkukulgan an saiyang sadiri,*Arog kaiyan an saro na ipinagkakatiwala an mga bagay-bagay sa sarong mangmang.
7 Siring sa nagkikiang-kiang* na mga tabay kan tawong pilayAn talinhaga na nasa nguso nin mga mangmang.+
8 Siring sa paggakod nin gapo sa sarong lagpitawAn pagtao nin kamurawayan sa sarong mangmang.+
9 Siring sa matunok na tanom na napasakamot nin sarong burat*An talinhaga na nasa nguso nin mga mangmang.
10 Siring sa sarong parapana na basta na sanang minapatama*An saro na minatangdan sa sarong mangmang o sa mga nag-aagi lang.
11 Siring sa ayam na minabalik sa suka kaiyan,Inuutro lang kan sarong mangmang an saiyang kamangmangan.+
12 Nakahiling ka na nin tawo na naghuhunang madunong siya?+
Mas may pag-asa pa an sarong mangmang kisa saiya.
13 Nagsasabi an hugakon: “May durudakula nang leon sa tinampo,May leon duman sa plasa!”+
14 An pinto sigeng birik-birik sa mga bisagra* kaiyan,Asin an hugakon sigeng birik-birik sa saiyang higdaan.+
15 Iiniirarom kan hugakon an kamot niya sa laog kan pambangketeng mangko,Pero mapagalon para sa saiya na ibalik iyan sa saiyang nguso.+
16 An sarong hugakon naghuhuna na mas madunong siyaKisa sa pitong tawo na nagtatao nin mahusay na simbag.
17 Siring sa tawo na kinakaputan an mga talinga nin ayamAn saro na minaagi man sana pero naaanggot na marhay* sa iriwal na bako man saiya.+
18 Siring sa sarong bua na nagpapalayog nin nagkakalayong mga armas, mga pana, asin kagadanan*
19 An tawong pigloloko an saiyang kapwa tawo asin nagsasabi, “Nagkakalwag man sana ako!”+
20 Kun sain mayo nin gatong,* an kalayo napapalsok,Asin kun sain mayo nin parapakaraot, an iriwal minauntok.+
21 Kun paanong an uring para sa baga asin an panggatong para sa kalayo,An tawong mahilig makidiskutir nagpapalaad man nin iriwal.+
22 An mga tataramon nin sarong parapakaraot siring sa masisiram na pidaso nin kakanon;*Hinahalon an mga iyan nin diretso sa tulak.+
23 Siring sa pampakintab na plata na nakakalupkop sa sarong tipak nin gamit na dalipayAn mamumuton na mga tataramon hali sa sarong* maraot na puso.+
24 An saro na nauungis sa iba itinatago iyan paagi kan mga ngabil niya,Pero sa laog niya nagtatago siya nin pandadaya.
25 Dawa may kabuutan siyang nagtataram, dai ka magtiwala sa saiya,Huling may pitong makababalding bagay an nasa puso niya.*
26 Dawa ngani an saiyang pagkaungis natatahuban paagi sa pandadaya,An saiyang karatan ibubuyagyag sa katiripunan.*
27 An saro na naggigibo nin kalot mahuhulog diyan,Asin an siisay man na nagpapaligid nin gapo—maliligidan siya kaiyan.+
28 An putikon na dila ikinakaungis idtong mga nadanyaran mismo kaiyan,Asin an mabuladas na nguso nagdadara nin kapahamakan.+
Mga Nota
^ O posibleng “Dai man mangyayari an sarong bakong maninigong maldisyon.”
^ O “kapareho.”
^ Sa literal, “nag-iinom nin kadahasan.”
^ O “nagkakalay-kalay.”
^ O “buyong.”
^ O “parapana na pinapatamaan an gabos.”
^ O “paitukan.”
^ O posibleng “nakikiaram.”
^ O “nakakagadan na mga pana.”
^ O “kahoy.”
^ O “siring sa mga bagay na hinahalon nin may kapasluan.”
^ Sa literal, “An malaad na mga ngabil na may.”
^ O “Huling an saiyang puso biyong makababaldi.”
^ O “kongregasyon.”
