Talinhaga 7:1-27
7 Aki ko, sunudon mo an sakong mga tataramon,Asin pahalagahan mong marhay* an sakong mga tugon.+
2 Sunudon mo an sakong mga tugon asin padagos kang mabuhay;+Ingatan mo an sakong instruksiyon* nin siring sa alinawnaw* kan saimong mata.
3 Ibugkos mo an mga iyan sa saimong mga muro;Isurat mo an mga iyan sa tabla kan saimong puso.+
4 Sabihon mo sa kadunungan, “Ika an sakuyang tugang na babayi,”
Asin apudon mo an pakasabot na “sakuyang paryente,”
5 Tanganing bantayan ka laban sa babaying pakawala,*+Laban sa babaying imoral* asin sa mahalnas* na mga tataramon niya.+
6 Sa bintana kan harong ko,Sa sala-sala kan bintana ko, nagdungaw ako,
7 Asin mantang pinagmamasdan ko an mga tawong inosente sa buhay,*Narisa ko sa grupo nin mga hoben an sarong hoben na lalaki na mayong marahay na pagmansay.*+
8 Nag-agi siya sa kalye harani sa blokeng iniistaran kan babayi,Asin naglakaw siya sa direksiyon kan harong kaini
9 Kan nag-aagaw an liwanag asin diklom, kan an aldaw pasinarom,+Mantang pabanggi na asin padiklom.
10 Dangan nakahiling ako nin babaying nagsabat sa saiya,Nakasulot nin siring sa hostes,*+ asin tuso an puso niya.
11 Matabil asin agresibo siya.+
Dai siya nagpipirmi* sa harong niya.
12 Ngunyan nasa luwas siya, uruatyan nasa mga plasa na;Nag-aabang siya harani sa lambang kanto.+
13 Pinugol niya an hoben asin hinadukan;Daing supog niya ining sinabihan:
14 “Kinaipuhan kong magdulot nin mga atang sa pakikikabtang.+
Ngunyan na aldaw, nautob ko na an sakong mga promesa.
15 Iyan an dahilan kaya ako nagluwas tanganing sabaton ka,Tanganing hanapon ka, asin nanumpungan taka!
16 Binikladan ko nin magagayon na kobre-kama an higdaan ko,Makulor na telang lino hali sa Ehipto.+
17 Binugtakan ko nin mira, aloe,* asin sinamon+ an sakong kama.
18 Mus na, magpakalunod kita sa pagkamuot sagkod aga;Sa init kan pagkamuot, mag-ugma kitang duwa,
19 Huli ta mayo sa harong si agom;Nagbiyahe siya sa lugar na harayuon.
20 Sarong bag nin kuwarta an saiyang dinara,Asin sa kabilugan pa kan bulan an puli niya.”
21 Linalansi niya an hoben paagi sa matibay na pang-eengganyar.+
Inaakit niya siya paagi sa mahalnas na pananaram.
22 Tulos na nagsunod sa saiya an hoben, siring sa torong baka na pasiring sa bunuan,Siring sa sarong lulong na papadusahan sa pandog,*+
23 Sagkod na sarong pana an luminagbas sa katoy niya;Siring sa gamgam na naghihidaling maglaog sa litag, dai niya aram na iyan an ikakagadan niya.*+
24 Asin ngunyan, mga aki ko, magdangog kamo sa sako;Tawan nindo nin atensiyon an mga tataramon na sinasabi ko.
25 Dai mo pagtugutan an saimong puso na sumiko pasiring sa saiyang mga dalan.
Dai ka maglagaw-lagaw sa saiyang mga agihan,+
26 Huli ta dakul na an nagkagaradan huli sa saiya,+Asin gulpi na an ginaradan niya.+
27 An harong niya pasiring sa Lubungan;*Pababa iyan sa mga tagong kuwarto nin kagadanan.
