Talinhaga 16:1-33
16 An tawo an nag-aandam kan mga kaisipan kan puso niya,*Pero an itinatao niyang simbag* hali ki Jehova.+
2 Gabos na dalan nin sarong tawo tama* sa paghiling niya,+Pero sinisiyasat ni Jehova an mga motibo.*+
3 Ipagkatiwala mo ki Jehova an ano man na ginigibo mo,*+Asin magigin mapanggana an saimong mga plano.
4 An gabos na bagay ginibo ni Jehova para mautob an saiyang katuyuhan,Pati ngani an pagkalaglag kan mga maraot sa aldaw kan saindang kapahamakan.+
5 An lambang mapalangkaw an puso makababaldi ki Jehova.+
Makakasigurado ka* na dai siya makakalibre sa padusa.
6 Paagi sa maimbod na pagkamuot asin kaimbudan, an kasalan nababayadan,+Asin paagi sa pagkaigwa nin pagkatakot ki Jehova an saro minarayo sa karatan.+
7 Pag nauuyunan ni Jehova an mga dalan nin sarong tawo,Pinangyayari Niyang makipagkatuninungan sa saiya dawa an mga kalaban niya.+
8 Mas marahay pa an kakadikit pero may katanusan+Kisa sa dakulang ginaganar pero mayong hustisya.+
9 Puwedeng planuhon nin sarong tawo sa saiyang puso an dalan niya,Pero si Jehova an naggigiya sa mga lakad niya.+
10 Dapat na nasa mga ngabil nin sarong hadi an ipinasabong na desisyon;*+An hustisya dai niya dapat nuarin man biribidon.+
11 An daing dayang mga panimbang asin timbangan hali ki Jehova;An mga pantimbang na yaon sa bag gabos gibo niya.+
12 Makababaldi para sa mga hadi an maraot na mga gibo-gibo,+Huling paagi sa katanusan naeestablisar nin marigon an trono.+
13 Ikinakaugma kan mga hadi an matanos na pananaram.
Namumutan ninda an tawong nagtataram nin sadiyosan.+
14 An grabeng kaanggutan kan hadi siring sa mensahero nin kagadanan,+Pero an tawong madunong pinapahupa* iyan.+
15 Igwa nin buhay sa liwanag kan lalawgon kan hadi;An pag-uyon niya siring sa panganuron na nagtataong uran sa tigsuli.*+
16 An pagkaigwa nin kadunungan mas marahay nanggad kisa sa bulawan!+
An pagkamit nin pakasabot an mas dapat pilion kisa sa pirak.+
17 An tinampo kan mga matanos minalikaw parayo sa kun ano an maraot.
An siisay man na nagbabantay sa saiyang dalan iniingatan an saiyang buhay.*+
18 Pagigin orgulyoso nguna bago an pagbagsak,Asin kapalangkawan* nguna bago an pagkatumba.+
19 Mas marahay na magin mapakumbaba* kaiba kan mga mahuyo+Kisa makipagbanga sa sinamsaman kan mga mapalangkaw.
20 An saro na nagpapahiling nin pakasabot sa sarong bagay magigin mapanggana,*Asin maugma an saro na nagtitiwala ki Jehova.
21 An saro na may madunong na puso aapudon na tawong may pakasabot,+Asin an saro na nagtataram nin mabuot* nagdadagdag nin pangungumbinsir.+
22 An pakasabot sarong burabod nin buhay para sa mga igwa kaiyan,Pero an mga mangmang dinidisiplina kan sainda mismong kamangmangan.
23 An puso kan madunong nagtatao nin pakasabot sa saiyang nguso,+Asin nagdadagdag nin pangungumbinsir sa saiyang pananaram.
24 An marahay na mga tataramon harong nin putyukan,Mahamis sa kalag* asin nakakapaumay sa mga tulang.+
25 Igwa nin dalan na garo baga tama sa paghiling nin sarong tawo,Pero kagadanan an puro kaiyan.+
26 An ganang magkakan* nin sarong trabahador nagpapahigos sa saiya,Huling pigtutulod siya kan pagkagutom* niya.+
27 Nagkakalot nin maraot an daing kuwentang tawo;+An saiyang tataramon siring sa nakakapasong kalayo.+
28 An sarong paraparibok* nagkakawsa nin dai pagkauruyon,+Asin an sarong parapakaraot pinagsusuway an mga dayupot na mag-amigo.+
29 Sinusutsutan nin tawong madahas an saiyang kapwaAsin ginigiyahan siya sa dalan na sala.
30 Ikinikimlat* niya an saiyang mata mantang nagpapakana siya nin maraot.
Kinakagat niya an saiyang mga ngabil mantang naggigibo siya nin ikakaraot.
31 An uban korona nin kagayunan*+Pag yaon iyan sa dalan nin katanusan.+
32 An saro na dai tulos naaanggot+ mas marahay kisa sa sarong makusog na lalaki,Asin an saro na kinokontrol an timplada kan saiyang payo* mas marahay kisa sa saro na minasakop nin siyudad.+
33 An burunutan ginigibo sa katiklupan kan gubing sa bandang paa,+Pero an lambang desisyon na ginibo paagi kaiyan hali ki Jehova.+
Mga Nota
^ O “an tamang simbag.” Sa literal, “an simbag kan dila.”
^ Sa literal, “An mga pag-aareglar kan puso nasa tawo.”
^ Sa literal, “dalisay.”
^ Sa literal, “espiritu.”
^ Sa literal, “Ipaligid mo pasiring ki Jehova an saimong mga ginigibo.”
^ Sa literal, “Kamot sa kamot.”
^ O “an desisyon nin Diyos.”
^ O “linilikayan.”
^ Sa Ingles, spring.
^ O “kalag.”
^ Sa literal, “mapalangkaw na espiritu.”
^ Sa literal, “magin hamak an espiritu.”
^ Sa literal, “makakanumpong nin marahay.”
^ O “an nakakaengganyar na pananaram.” Sa literal, “an hamis nin mga ngabil.”
^ Sa literal, “nguso.”
^ O “An kalag.”
^ O “parapakana.”
^ O “Ikinikindat; Ikinikiyat.”
^ O “kamurawayan.”
^ Sa literal, “namamahala sa saiyang espiritu.”
