Isaias 27:1-13
27 Sa aldaw na iyan, si Jehova, paagi kan saiyang daing patawad asin dakula saka matibay na espada,+Mabaling kan saiyang atensiyon sa Leviatan,* an halas na marikas magkamang,Sa Leviatan, an nagkukurukurikot na halas,Asin gagadanon niya an higanteng hayop na yaon sa dagat.
2 Sa aldaw na iyan magkanta kamo para sa babayi:*
“Sarong ubasan nin nagsasabo-sabong arak!+
3 Ako, si Jehova, an nag-iingat sa saiya.+
Sa gabos na panahon binabaribian ko siya.+
Aldaw-banggi ko siyang iniingatan,Tanganing dai siya madanyaran nin siisay man.+
4 Dai na ako sa saiya naaanggot.+
Siisay an malaban sa sako gamit an mga matunok na palungpong asin mga duot?
Titimak-timakan ko an mga iyan asin susuluon gabos.
5 Kun habo niyang mangyari iyan, mangapot siya sa sakong masarig na depensa.*
Makipagkatuninungan siya sa sakuya;Sa sakuya makipagkatuninungan siya.”
6 Sa maabot na mga aldaw magkakagamot an Jacob,An Israel mamumurak asin masaringsing,+Asin papanuon ninda nin bunga an daga.+
7 Dapat daw siyang hampakon kan hampak kan saro na naghahampak sa saiya?
O dapat daw siyang gadanon arog kan paggadan sa mga ginaradan sa saiya?
8 Makikipaglaban ka sa babayi nin may nakakakubhan na kurahaw sa panahon na papahalion mo siya.
Papalayason niya siya paagi kan saiyang makusugon na huyop sa aldaw na maghuyop an duros hali sa sirangan.+
9 Kaya sa paaging ini an pagkakasala kan Jacob mababayadan,+Asin ini an kabilugan na magigin bunga pag hinali an saiyang kasalan:
Gigibuhon niya an gabos na gapo sa altarNa magin siring sa pinurulbos na mga tisang gapo,Asin mayo nin matatadang mga sagradong poste* o mga pigsusuluan nin insenso.+
10 Huli ta an siyudad na may matibay na depensa matitiwangwang;An mga pasabsaban papabayaan asin babayaan na siring sa kaawagan.+
Diyan masabsab asin maluko an ugbon na bakaAsin uubuson kaini an saiyang mga sanga.+
11 Pag an saradit niyang sanga magkaaralang,Maarabot an mga babayi asin babarion an mga iyan,Dangan mapalaad nin kalayo paagi kaiyan.
Huli ta an banwaan na ini mayo nin pakasabot.+
Iyan an dahilan kaya an saindang Kaggibo dai mapahiling nin pagkahirak sa sainda,Asin an Saro na naghaman sa sainda dai mapahiling nin pabor sa sainda.+
12 Sa aldaw na iyan, O banwaan nin Israel, kun paanong rinarapas nin saro an mga bunga nin sarong kahoy asin saro-sarong tinitipon iyan, titipunon man kamo ni Jehova, kamo na nagkawararak puon sa nagsusulog na tubig kan Salog* sagkod sa Sulugan na Kababan* nin Ehipto.+
13 Sa aldaw na iyan, papatanugon an sarong dakulang hamudyong,+ asin idtong mga naghihingagdan na sa daga nin Asiria+ saka idtong nagkawararak sa daga nin Ehipto+ maarabot asin maduruko ki Jehova sa banal na bukid sa Jerusalem.+
Mga Nota
^ Minalataw na nanunungod sa Israel, na pinepersonipikar digdi bilang sarong babayi asin iinaagid sa sarong ubasan.
^ O “sakong kuta.”
^ An buot sabihon, an Eufrates.
