Isaias 5:1-30
5 Tuguti tabi akong magkanta sa sakong namumutanNin sarong kanta manungod sa sakong namumutan asin sa saiyang ubasan.+
Igwa kaidto nin ubasan an sakong namumutan sa sarong mabungang gilid nin bulod.
2 Binungkal niya iyan asin hinalian nin mga gapo.
Tinanuman niya iyan nin balagon nin primera klaseng pulang ubas,Nagtugdok siya nin sarong tore sa tahaw kaiyan,Asin nagtuki siya diyan nin pugaan nin ubas.+
Dangan padagos siyang naglaom na magbubunga iyan nin mga ubas,Pero nagbunga lang iyan nin layas na ubas.+
3 “Asin ngunyan, kamong mga nag-iistar sa Jerusalem asin kamong mga taga Juda,Magin hukom tabi kamo sa pag-ultanan ko asin kan sakong ubasan.+
4 Ano pa an puwede kong gibuhon para sa ubasan koNa dai ko pa nagigibo?+
Ata nang linauman kong magbunga iyan nin mga ubas,Taano ta nagbunga lang iyan nin mga layas na ubas?
5 Ngunyan, tugutan tabi nindo akong sabihon sa saindoKun ano an gigibuhon ko sa ubasan ko:
Hahalion ko an mga tanom na kudal kaiyan,Asin susuluon iyan.+
Gagabaon ko an kudal na gapo kaiyan,Asin titimak-timakan iyan.
6 Gigibuhon ko iyan na tiwangwang;+Dai iyan tatakrasan o aasadahon.
Matatahuban iyan nin mga matunok na palungpong asin mga duot,*+Asin pagbubutan ko an mga panganuron na dai iyan pauranan.+
7 Huli ta an ubasan ni Jehova na pamayo nin mga hukbo iyo an nasyon* nin Israel;+An mga taga Juda iyo an plantasyon* na kinawilihan niyang marhay.
Padagos siyang naglaom para sa hustisya;+Alagad, hilinga! nagkaigwa nin inhustisya;Para sa katanusan,Alagad, hilinga! pag-agrangay huli sa kasakitan.”+
8 Hirak man kan mga isinusugpon an sarong harong sa saro pang harong+Asin kan mga isinusumpay an sarong uma sa saro pang uma+Sagkod na mayo na nin espasyong natatadaAsin kamo na sana an nag-iistar sa daga!
9 Nadangog kong suminumpa si Jehova na pamayo nin mga hukboNa dakul na harong, dawa pa darakula asin magagayon,An magigin dahilan na an mga tawo tarakigan,Na mayo nang nag-iistar.+
10 Huli ta an apat na ektarya* nin ubasan maprodusir sana nin sarong bath* nin arak,Asin an sarong homer* nin banhi maprodusir sana nin sarong takad na epa.*+
11 Hirak man kan mga nagmamata nin amay na aga tanganing mag-inom nin inumon na de-alkohol,+Na nagpapamatanga pa sagkod na papagkalayuhon kan arak an pagmati ninda!
12 May arpa sinda asin instrumentong de-kuwerdas,Tamburin, plawta, asin arak sa mga bangkete ninda;Pero dai ninda iniisip an mga ginigibo ni Jehova,Asin dai ninda nahihiling an gibo kan mga kamot niya.
13 Kaya an sakuyang banwaan puwersahan na dadarahon sa ibang nasyon*Huli sa kawaran nin kaaraman;+An mamuraway nindang mga tawo magkakagurutom,+Asin an gabos nindang namamanwaan magkakaaralang huli sa paha.
14 Kaya pinahiwas kan Lubungan* an sadiri* kaiyanAsin an bunganga kaiyan ibinukang marhay na daing sagkudan;+Asin an kagayunan* kan siyudad na iyan, an mariribok niyang kadaklan, asin an mga maribok na nag-uurugma diyanSiyertong mabaraba duman.
15 Asin an tawo maduko,An tawo ibababa,Asin an mga mata kan mapalangkaw ibababa.
16 Si Jehova na pamayo nin mga hukbo papamurawayon kan gigibuhon niyang paghukom;*An tunay na Diyos, an Banal na Diyos,*+ papakangbanalon an sadiri niya paagi kan katanusan.+
17 Asin an mga kordero masarabsab na garo yaon sinda sa saindang pasabsaban;An mga dayuhan na residente makarakan sa tiwangwang na mga lugar kan mga pinatabang hayop.
18 Hirak man kan mga ginuguyod an saindang pagkakasala paagi sa mga lubid nin pandadayaAsin an saindang kasalan paagi sa mga pisi nin kareta;
19 Idtong mga nagsasabi: “Rikasan na Niya an saiyang gibo;Lugod na mag-abot na iyan tulos tanganing mahiling mi iyan.
Lugod na mangyari an katuyuhan* kan Banal na Diyos kan IsraelTanganing maaraman mi iyan!”+
20 Hirak man sa mga nagsasabing an marahay maraot asin an maraot marahay,+Sa mga riniribayan nin kadikluman an liwanag asin nin liwanag an kadikluman,Sa mga ibinibilang na mapait an mahamis asin na mahamis an mapait!
21 Hirak man sa mga madunong sa sadiri nindang mga mataAsin mapagmansay sa sadiri nindang paghiling!+
22 Hirak man sa mga makukusog sa pag-inom nin arakAsin sa mga tawong eksperto sa paghalo nin mga inumon na de-alkohol,+
23 Sa mga tawong ipinapahayag na daing sála an sarong maraot huli sa suhol+Asin sa mga tawong ipinapanguri an hustisya sa sarong matanos!+
24 Kaya, kun paanong tinutumtom kan dila nin kalayo an pinaggapasanAsin nagkukurupos sa laad an duot na alang,An sainda man na mga gamot magkakaralapa,Asin an saindang mga burak magkakawararak na siring sa pulbos,Huling isinikwal ninda an katugunan* ni Jehova na pamayo nin mga hukboAsin dai ninda iginalang an tataramon kan Banal na Diyos kan Israel.+
25 Iyan an dahilan kaya naglalaad an kaanggutan* ni Jehova laban sa saiyang banwaan,Asin iuunat niya an saiyang kamot laban sa sainda asin papadusahan sinda.+
Magkakataranyog an kabukidan,Asin an mga bangkay ninda magigin siring sa basura sa mga dalan.+
Huli kan gabos na ini,* an saiyang kaanggutan dai nawawara,Kundi nakaunat pa man giraray an kamot niya tanganing magpadusa.
26 Iinitaas niya an senyal* para sa sarong harayong nasyon;+Suminiwit siya tanganing mag-arabot sinda hali sa mga puro kan daga;+Asin hilinga! nagdadangadang sinda nin marikason.+
27 Mayong pagal sa sainda o nasisingkog.
Mayo ni saro na pigtutungka o nagtuturog.
An paha ninda sa habayan* bakong haluwag,Ni patod man an mga sintas kan saindang mga sandalyas.
28 Mapapanas an gabos nindang pana,Asin nakakurba na* an gabos nindang busog.
An mga kuko kan mga kabayo ninda siring sa matagason na gapo,Asin an mga ruweda ninda siring sa duros nin bagyo.+
29 An pag-ungal ninda siring kan sa sarong leon;Minaungal sindang siring sa mga durudakula nang leon.*+
Nagngangarob sinda asin dinadasmagan an saindang biktimaSaka tinatabag* iyan, asin mayo nin magliligtas kaiyan.
30 Sa aldaw na iyan, magngangarob sinda sa ibabaw kaiyanSiring sa pagngarob kan dagat.+
An siisay man na pinagmamasdan an daga makakahiling nin nakakapurisaw na kadikluman;Dawa an liwanag duminiklom huli sa mga panganuron.+
Mga Nota
^ O “awot.”
^ Sa literal, “harong.”
^ O “mga tanom.”
^ Sa literal, “sampulong padis,” an buot sabihon, an hiwas kan uma na kayang araduhon nin sampulong padis na torong baka sa sarong aldaw.
^ Hilingon an Apendise B14.
^ Hilingon an Apendise B14.
^ Hilingon an Apendise B14.
^ O “an sakuyang banwaan ididistiyero.”
^ O “mga respetadong tawo.”
^ O “kalag.”
^ O “kan saiyang hustisya.”
^ O “Saro na Banal.”
^ O “desisyon; kabutan.”
^ O “instruksiyon.”
^ Nanunungod sa karatan kan banwaan nin Diyos.
^ O “dagit.”
^ O “senyal na poste.”
^ O “iksan.”
^ O “andam nang pumana.”
^ O “durudakula nang leon na may bunday.”
^ O “linalalay.”
