Isaias 53:1-12
53 Siisay an nagtubod sa nadangog hali sa samuya?*+
Asin kun manungod sa takyag ni Jehova,+ kiisay iyan ihinayag?+
2 Matubo siyang siring sa sarong sadit na sanga+ sa atubangan niya,* siring sa sarong gamot hali sa alang na daga.
Mayo siyang kahanga-hangang tindog, ni ano man na kagayunan;+Asin pag nahihiling mi siya, an itsura niya dai nakakaengganyar sa samo na magrani sa saiya.*
3 Hinamak siya asin linikayan nin mga tawo,+Sarong tawo na nakatagama* sa mga kulog asin pamilyar sa kamatian.
Garo man sana nakatago sa samo an lalawgon niya.*
Hinamak siya, asin ibinilang mi siyang daing halaga.+
4 Talagang siya mismo an nagdara kan samuyang mga kamatian,+Asin pinasan niya an samuyang mga kulog.+
Pero ibinilang mi siyang dinamat, linugad nin Diyos asin pinasakitan.
5 Alagad tinusok+ siya huli sa samong paglapas;+Pinasakitan siyang marhay huli sa samong mga pagkakasala.+
Tinios niya an padusa tanganing magkaigwa kami nin katuninungan,+Asin huli sa mga lugad niya kami naumayan.+
6 Gabos kami nagkaralagalag siring sa mga karnero,+Nagkanya-kanyang dalan an kada saro,Asin ipinasan sa saiya ni Jehova an pagkakasala niyamo gabos.+
7 Ginipit siya+ asin pinabayaan niyang pasakitan siya nin grabe,+Pero dai niya ibinuka an saiyang nguso.
Dinara siya sa bunuan siring sa sarong karnero,+Siring sa sarong babaying karnero na nagdanay na silensiyo sa atubangan kan mga paragunting kaini,Asin dai niya ibinuka an saiyang nguso.+
8 Huli sa pamumugol* asin paghusgar hinali siya;Asin siisay an magkakainteres sa mga detalye kan saiyang ginikanan?*
Huling hinali siya sa daga kan mga buhay;+Dahil sa paglapas kan sakuyang banwaan sinapar niya an hampak.*+
9 Asin tinawan siya* nin lubungan kaiba kan mga maraot,+Asin kaiba kan mga mayaman* kan siya magadan,+Dawa ngani mayo siyang ginibong sala*Asin mayo nin pandadaya sa saiyang nguso.+
10 Alagad kabutan* ni Jehova na magsakit siya nin grabe, asin itinugot niyang magdusa siya.
Kun itatao mo an saiyang buhay* bilang dulot para sa pagkakasala,+Mahihiling niya an saiyang mga gikan,* mapapalawig niya an saiyang mga aldaw,+Asin paagi sa saiya magigin mapanggana an ikinakaugmang marhay* ni Jehova.+
11 Huli sa saiyang grabeng pagsakit,* mahihiling niya an resulta asin mauugma.
Paagi kan saiyang kaaraman, an matanos kong lingkod+Magdadara sa dakul na tawo nin matanos na kamugtakan,+Asin papasanon niya an saindang mga pagkakasala.+
12 Huli kaiyan, tatawan ko siya nin kahirasan kaiba kan dakul,Asin ihihiras niya an samsam sa mga matitibay na parapakilaban,Huling ibinubo niya an saiyang buhay* sagkod sa kagadanan+Asin ibinilang siyang saro sa mga paralapas;+Dinara niya an kasalan kan dakul na tawo,+Asin nangultanan siya para sa mga paralapas.+
Mga Nota
^ O posibleng “nagtubod sa nadangog mi?”
^ Posibleng nanunungod sa sarong nagmamasid o sa Diyos.
^ O “mayo nin espesyal sa itsura niya para magustuhan mi siya.”
^ O “nakakasabot.”
^ O posibleng “Garo siya sarong tawo na habong hilingon kan mga tawo.”
^ O “ginadan siya.”
^ O “kan saiyang nagin buhay?” Sa literal, “kan saiyang henerasyon?”
^ O “panggigipit.”
^ O “Asin may saro na matao sa saiya.”
^ Sa literal, “nin sarong mayaman na tawo.”
^ O “kadahasan.”
^ O “kalag.”
^ O “an kabutan; an kamawutan.”
^ Sa literal, “saiyang banhi.”
^ O “ikinaugma.”
^ O “sa kapurisawan kan saiyang kalag.”
^ O “kalag.”
