NGOFEBRUWARI 25, 2022
EFRANSI
Incwadi KaMateyu Ngentetho Yezandla YaseFrance
NgoFebruwari 19, 2022, uMzalwana uDidier Koehler, olilungu leKomiti YeSebe yaseFrance, wakhulula Incwadi YeBhayibhile YeVangeli KaMateyu NgeNtetho Yezandla YaseFrance (LSF). Ungakwazi ukuyidawunlowuda ku-jw.org nakwiJW Library Sign Language app. Le yincwadi yokuqala yeNguqulelo Yehlabathi Elitsha, eye yakhululwa ngamaNgqina kaYehova ngeLSF.
Kuqikelelwa ukuba bayi-1 500 abantu abalubukelayo olu cwangciso lokukhululwa kwencwadi yeBhayibhile. Kwintetho yakhe, uMzalwana uKoehler wathi: “Kuba intetho yezandla yaseFrance ilulwimi oluthethwa ngezimbo zomzimba, xa umntu ezenza, udlulisa umyalezo. Ubuso bakhe, amehlo akhe, nomzimba zibonisa indlela aziva ngayo neyabantu athetha ngabo. Sitsho sikwazi ukubona yonke into ayithethayo! Le nto yenza kube lula ukuba nombono wento ekuthethwa ngayo eBhayibhileni!”
AmaNgqina kaYehova aqalisa ukwenza umsebenzi wokushumayela ngentetho yezandla yaseFrance ukususela ekupheleni kweminyaka yoo-1960. Pha koo-1972, kwabakho ibandla lokuqala lentetho yezandla yaseFrance kwindawo ekuthiwa kuseVincennes, eseParis eFrance. Ekuqaleni kweminyaka yoo2 000, iQumrhu Elilawulayo lavuma ukuba iKomiti YeSebe yaseFrance iqalise iofisi yokuguqulela yentetho yezandla yaseFrance. Ngo-2019, kanye ngaphambi kokuba kuqale ikhorona, iqela lokuguqulela lafudukela eBheteli eLouviers, eFrance. Namhlanje kukho amabandla entetho yezandla ayi-11 namaqela ayi-39 phantsi kwesebe laseFrance.
Enye yeentlanganiso zokuqala zebandla leNtetho Yezandla YaseFrance eVincennes, eFrance, pha koo-1972. Abavakalisi ebandleni babehlala bajongane endaweni yokuba omnye ahlale emva komnye. Le nto yayisenza umntu ngamnye abonwe xa ephendula
Iqela leLSF laqalisa ngencwadi yevangeli kaMateyu ukuguqulela. Eza kulandela ukukhululwa yekaYohane. Ezi ngxelo zimbini zobomi bukaYesu zaziwa kakhulu futhi kuba zingamabali kulula ukuziguqulela kunezinye iincwadi. Ngaphambi kokuba kukhululwe incwadi yevangeli kaMateyu, abavakalisi babenokukwazi ukubukela iivesi ezimbalwa zeBhayibhile ngentetho yezandla yaseFrance.
Udade ongevayo okwiqela lokuguqulela uthi: “Xa ndandingumntwana, ndandidla ngokujonga imifanekiso ekwincwadi ethi Oyena Mntu Ubalaseleyo Wakha Waphila, ndiyiphindaphinde. Xa ndabukela incwadi kaMateyu kwiLSF, ndaphinda ndakhumbula yonke loo mifanekiso ndandiyibona. Ngoku ndandiyazi eyona nto yayithethwa yiloo mifanekiso.”
Nomnye umguquleli wathi: “Ndandibawela nyhani ukuba kubekho iBhayibhile kwiLSF ukuze incede abazali bam abangevayo. Incwadi kaMateyu ngolwimi lwentetho yezandla yaseFrance, sisipho esihle kakhulu!”
Iqela lokuguqulela leNtetho Yezandla YaseFrance liyarekhoda kwistudio saseBheteli eLouviers, eFrance
Ukukhululwa kwale ncwadi yeBhayibhile ngeLSF kusivuyisa kakhulu. Le nto ibonisa ukuba nyhani uYehova umema bonke abantu ukuba ‘basele amanzi obomi mahala.’—ISityhilelo 22:17.
Mhlawumbi Ungayithanda Nale
IMIBUZO ABANTU ABAQHELE UKUYIBUZA
Ngaba AmaNgqina KaYehova AneBhayibhile Yawo?
Ukusebenzisa iinguqulelo ezahlukahlukeneyo kungayiphucula indlela oyifunda ngayo iBhayibhile. Kukho iingongoma ezintathu ezenza iNguqulelo Yehlabathi Elitsha YeZibhalo Ezingcwele kube luncedo ukuyisebenzisa xa ufunda.
INDLELA ESETYENZISWA NGAYO IMINIKELO YAKHO
Ukwenza Eyona Ncwadi Ibalulekileyo
Ayingomsebenzi olula ukuguqulela, ukuprinta nokudibanisa INguqulelo Yehlabathi Elitsha.