1-2. (a) Kutheni kusenokuba nzima ngabanye abantu esibafundelayo ukuba babe ngamaNgqina KaYehova? (b) Siza kuthetha ngantoni kweli nqaku?

 NGABA wawukhe awaqiniseka nokuba uyafuna na ukuba liNgqina LikaYehova? Kusenokwenzeka ukuba wawusoyika ukujikelwa ngabantu osebenza nabo, abahlobo okanye abantu bakowenu. Okanye wawucinga ukuba awuzukwazi ukuzenza izinto uThixo alindele ukuba uzenze. Ukuba kunjalo, usenokuba uyasiqonda isizathu sokuba kube nzima ngomntu omfundelayo ukuba ade abe liNgqina LikaYehova.

² UYesu wayeqonda ukuba izinto ezifana nezi zinokwenza umntu ayeke ukukhonza uYehova. (Mat. 13:​20-22) Kodwa zange abancame abantu ababengaqinisekanga nokuba bamlandele na. Kunokuba abancame, wabonisa abafundi bakhe iindlela abanokubanceda ngazo abantu abanjalo ukuba (1) baziqonde izinto ezenza kube nzima ukuba bakhonze uYehova, (2) baye bemthanda uYehova, (3) bamenze abe ngoyena ubalulekileyo ebomini babo, (4) bayazi nento amabayenze xa bechaswa. Sisebenzisa incwadi ethi Phila Ubomi Obumnandi Ngonaphakade! sinokuyenza njani into uYesu awayixelela abafundi bakhe xa sinceda umntu esimfundelayo ukuba abe liNgqina LikaYehova?

MNCEDE AZIQONDE IZINTO EZENZA KUBE NZIMA UKUBA AKHONZE UYEHOVA

3. Yintoni esenokuba yenza kwanzima ngoNikodemo ukuba abe ngumfundi kaYesu?

³ Kwaba nzima komnye umlawuli wamaYuda owayesaziwa kakhulu, uNikodemo, ukuba abe ngumfundi kaYesu. Kwiinyanga nje ezimalunga neziyi-6 uYesu eqalisile ukushumayela, uNikodemo wayesazi ukuba uYesu uthunywe nguThixo. (Yoh. 3:​1, 2) Sekunjalo, kuba ‘wayesoyika amaYuda,’ wakhetha ukudibana noYesu  engabonwa. (Yoh. 7:13; 12:42) Mhlawumbi wayecinga ukuba zininzi izinto aza kulahlekelwa zizo ukuba uye wangumfundi kaYesu. a

4. UYesu wamnceda njani uNikodemo waqonda ukuba yintoni uThixo ayilindeleyo kuye?

⁴ UNikodemo wayewazi uMthetho owawubhalwe nguMoses, kodwa wayefuna ukuncedwa aqonde ukuba yintoni uYehova ayilindeleyo kuye. Wamnceda njani uYesu? UYesu wayekulungele ukuchitha ixesha lakhe enceda abantu, yiloo nto waye wakwazi ukudibana noNikodemo ebusuku. Zange amfihlele uNikodemo izinto ekufuneka azenze ukuze abe ngumfundi wakhe. Wathi kufuneka aguquke kwizono zakhe, abhaptizwe emanzini, aze abe nokholo kuNyana kaThixo.​—Yoh. 3:​5, 14-21.

5. Unokumnceda njani umntu omfundelayo ayiqonde into emenza angade abe liNgqina?

⁵ Nokuba umntu omfundelayo uyazazi iZibhalo, usenokudinga uncedo ukuze aqonde ukuba yintoni emenza angade abe liNgqina. Kusenokwenzeka ukuba uphazanyiswa ngumsebenzi wakhe okanye ngabantu bakowabo. Ngoko zenzele ixesha lokumnceda. Usenokummema ukuba niyokuphunga okanye nikhe nolule imilenze. Ngamaxesha anjengala, unokukwazi ukumnceda ukuba athethe ekhululekile ngeengxaki anazo. Mkhuthaze ukuba atshintshe nantoni na ekufuneka ayitshintshe. Loo nto ayenze kuba ethanda uYehova, angayenzeli ukuvuyisa wena.

6. Unokumnceda njani umntu omfundelayo abe nesibindi sokuzenza izinto azifundayo? (1 Korinte 16:13)

⁶ Xa umntu omfundelayo eqinisekile ukuba uYehova uza kumnceda aphile ngendlela iBhayibhile ethi makaphile ngayo, uza kuba nesibindi sokuzenza izinto azifundayo. (Funda ama-1 Korinte 16:13.) Kaloku wena ufana notitshala kuye. Khawucinge ngela xesha wawusengumntan’ esikolo. Ngutitshala onjani owawumthanda kakhulu? Mhlawumbi ngutitshala owayenomonde, ekunceda ubone ukuba ungakwazi ukuzenza izinto ekufuneka uzenze. Ngendlela efanayo ke, umntu okwazi kakuhle ukufundisa iBhayibhile, akapheleli nje ekufundiseni izinto uThixo afuna sizenze. Wenza umntu amfundelayo aqiniseke ukuba uYehova uza kumnceda akwazi ukutshintsha izinto ekufuneka azitshintshe ebomini bakhe. Unokuyenza njani wena loo nto?

MNCEDE AYE EMTHANDA UYEHOVA

7. UYesu wabanceda njani abantu ababemmamele baya bemthanda uYehova?

⁷ UYesu wayesazi ukuba ukuze abafundi bakhe bakwazi ukuzenza izinto abazifundileyo, kwakufuneka bamthande uThixo. Wayedla ngokubafundisa izinto ezaziza kubanceda baye bemthanda uTata wabo osezulwini. Ngokomzekelo, wafanisa uYehova nendoda ebapha izinto ezilungileyo abantwana bayo. (Mat. 7:​9-11) Kusenokwenzeka ukuba abanye kubantu ababemamele uYesu zange babe naye utata onjalo. Khawucinge indlela abamele ukuba baziva ngayo xa uYesu wayebenzela umzekelo wotata onothando, owamkela unyana wakhe owayenze izinto ezininzi ezimbi. Babeyibona indlela uYehova abathanda ngayo abantwana bakhe abasemhlabeni.​—Luka 15:​20-24.

8. Unokumnceda njani umntu omfundelayo aye emthanda uYehova?

⁸ Nawe unokumnceda umntu omfundelayo aye emthanda uYehova ngokusoloko uthetha ngeempawu zikaThixo xa umfundisa. Qho xa nifunda, mncede abone ukuba le nto ayifundayo ibonisa njani ukuba uyathandwa nguYehova. Xa nithetha ngedini likaYesu, mncede aqonde ukuba uYehova zange ancame uNyana wakhe kuba nje ethanda bonke abantu, kodwa wamncama kuba ethanda yena siqu. (Roma 5:8; 1 Yoh. 4:10) Xa ebona indlela uYehova amthanda ngayo, naye uza kuya emthanda.​—Gal. 2:20.

9. Yintoni eyanceda uMichael watshintsha indlela awayephila ngayo?

 ⁹ Khawuve into eyenzeka kuMichael waseIndonesia. Wakhulela enyanisweni, kodwa zange abhaptizwe. Xa wayena-18 wafumana umsebenzi wokuqhuba iilori kwelinye ilizwe. Ekuhambeni kwexesha waya kutshata eIndonesia. Emva kokuba etshatile washiya intsapho yakhe apho, waphinda waya kusebenza kwelinye ilizwe. Ngoxa wayengekho, inkosikazi yakhe nentombi yabo bafundelwa iBhayibhile, baza bazenza izinto ababezifunda. Emva kokusweleka kukamama wakhe, uMichael wagqiba ekubeni abuyele ekhaya ukuze ahoye utata wakhe. Ngoxa esekhaya, wavuma ukufundelwa iBhayibhile. Xa wayekwisifundo 27 sencwadi ethi Phila Ubomi Obumnandi Ngonaphakade! kwindawo ethi “Funda Nezinye Izinto,” wavakalelwa nyhani uMichael. Zehla iinyembezi xa wayecinga ngendlela amele ukuba waziva ngayo uYehova xa wayebukele uNyana Wakhe engcungcutheka. Waba nombulelo kakhulu ngedini likaYesu. Loo nto yamenza watshintsha ubomi bakhe, emva koko wabhaptizwa.

MNCEDE ENZE UYEHOVA ABE NGOYENA UBALULEKILEYO EBOMINI BAKHE

10. UYesu wabanceda njani abafundi bakhe bokuqala benza umsebenzi wokushumayela wayeyona nto ibalulekileyo ebomini babo? (Luka 5:​5-11) (Jonga nomfanekiso.)

¹⁰ Abafundi bakaYesu bokuqala baqonda ukuba wayenguMesiya othenjisiweyo, kodwa kwafuneka bancedwe ukuze benze umsebenzi wokushumayela ube yeyona nto ibalulekileyo ebomini babo. UPetros noAndreya babesele benexesha bengabafundi bakaYesu, xa wabamema ukuba bamlandele, bayeke zonke izinto zabo. (Mat. 4:​18, 19) Babeneshishini eliqhuba kakuhle lokuloba iintlanzi, besebenza noYakobi noYohane. (Marko 1:​16-20) Xa uPetros noAndreya ‘bashiya iminatha yabo,’ bamele ukuba bawenza amacebo okuqhubeka besondla intsapho yabo ngoxa babelandela uYesu. Yintoni eyabanceda bakwazi ukwenza umsebenzi wokushumayela  wayeyona nto ibalulekileyo kunokuba nemali eninzi? Incwadi kaLuka isixelela ukuba uYesu wenza ummangaliso owabenza baqiniseka ukuba uYehova uza kukwazi ukubanika izinto abazidingayo.​—Funda uLuka 5:​5-11.

11. Unokuluqinisa njani ukholo lomntu omfundelayo usebenzisa izinto ezenzekileyo kuwe?

¹¹ Asinakukwazi ukwenza imimangaliso njengoYesu, kodwa sinokubabalisela abantu esibafundelayo ngendlela uYehova abanceda ngayo abo bamenza abe ngoyena ubalulekileyo ebomini babo. Ngokomzekelo, uyayikhumbula indlela uYehova awakunceda ngayo xa wawuqala ukuya kwiintlanganiso? Ukuba wawusebenza nasemva kwexesha lomsebenzi, mhlawumbi kwafuneka uthethe nomqeshi wakho, umxelele ukuba awuzukwazi ngoku ukuyenza loo nto kuba ngelo xesha kufuneka ube kwiintlanganiso. Njengoko ubalisela umntu omfundelayo izinto ezenzeke kuwe, mxelele indlela oluye lwaqina ngayo ukholo lwakho xa ubona ukuba uYehova uyazixhasa izigqibo ozenza kuba ufuna ukumenza oyena Mntu ubalulekileyo ebomini bakho.

12. (a) Kutheni kufuneka simeme abavakalisi abahlukeneyo xa siyokuqhuba isifundo? (b) Unokuzisebenzisa njani iividiyo ukuze uncede umntu omfundelayo enze uYehova abe ngoyena ubalulekileyo ebomini bakhe? Yenza umzekelo.

¹² Umntu omfundelayo uza kuncedwa nakukuva indlela amanye amaKristu aye abutshintsha ngayo ubomi bawo ukuze uYehova abe ngoyena ubalulekileyo ebomini bawo. Ngoko xa usiya kuye cela abanye abavakalisi abakhule ngeendlela ezahlukeneyo ukuba bahambe nawe. Bacele bambalisele ukuba bayifumene njani inyaniso, nokuba yintoni abayenzileyo ukuze uYehova abe ngoyena ubalulekileyo ebomini babo. Enye into, unokubukela naye iividiyo ezikwindawo ethi, “Funda Nezinye Izinto” okanye ethi, “Jonga Nezi Zinto” kwincwadi ethi, Phila Ubomi Obumnandi Ngonaphakade! Ngokomzekelo, xa nikwisifundo 37, usenokuthetha ngemigaqo ekwividiyo ethi UYehova Uya Kuzinyamekela Iimfuno Zethu.

MNCEDE AYAZI INTO AMAKAYENZE XA ECHASWA

13. Yintoni awayenzayo uYesu ukuze ancede abafundi bakhe bayazi into amabayenze xa bechaswa?

¹³ UYesu wabaxelela kaninzi abalandeli bakhe ukuba babeza kuchaswa ngabantu, nkqu nabo bazalana nabo. (Mat. 5:11; 10:​22, 36) Xa wayesele eza kuwugqiba umsebenzi wakhe emhlabeni, wabaxelela ukuba babenokubulawa ngenxa yokuba bekhonza uYehova. (Mat. 24:9; Yoh. 15:20; 16:2) Wabakhuthaza ukuba balumke xa beshumayela. Wabacebisa ukuba bangalwi nabantu xa bebachasa, futhi bayilumkele into abayithethayo nabayenzayo ukuze baqhubeke beshumayela.

14. Sinokumnceda njani umntu esimfundelayo ayazi into amakayenze xa echaswa? (2 Timoti 3:12)

¹⁴ Sinokunceda umntu esimfundelayo ayazi into amakayenze xa echaswa ngokumxelela into esenokuthethwa ngabantu abasebenza naye, abahlobo bakhe, nabantu azalana nabo. (Funda u-2 Timoti 3:12.) Abanye abantu asebenza nabo basenokuhlekisa ngaye kuba etshintshe indlela aphila ngayo. Kanti abanye abantu, nkqu nabo azalana nabo, basenokuzigxeka izinto azikholelwayo eziseBhayibhileni. Xa abantu esifunda nabo sikhawuleza sibacebise ngento amabayenze xa bechaswa, baza kube sebeyazi into amabayenze namabayithethe xa lifika elo xesha.

15. Yintoni enokunceda umntu omfundelayo akwazi ukunyamezela xa echaswa ngabantu bakowabo?

¹⁵ Xa echaswa ngabantu bakowabo, mkhuthaze acinge ukuba yintoni esenokuba iyabacaphukisa. Kusenokwenzeka ukuba bacinga ukuba ulahlekisiwe, okanye amaNgqina KaYehova awalunganga. Kaloku noYesu abantu bakowabo babesithi ushiywa ziingqondo. (Marko 3:21; Yoh. 7:5) Mfundise ukuba ahlale enomonde,  futhi athethe kakuhle nabantu, nkqu nabo azalana nabo.

16. Unokumnceda njani umntu omfundelayo ukuba alumke xa ethetha nabantu ngezinto azikholelwayo?

¹⁶ Nokuba abantu azalana nabo umntu omfundelayo banomdla, umele alumke angabaxeleli yonke into ngexesha elinye. Basenokudikwa baze bangafuni aphinde ancokole nabo ngezinto azikholelwayo. Ngoko mkhuthaze ancokole nabo ngezinto azikholelwayo ngendlela eza kwenza ukuba akwazi ukuphinda ashumayele kubo. (Kol. 4:6) Mhlawumbi unokubacela ukuba bangene kujw.org/xh. Loo nto inokubanceda bawazi bhetele amaNgqina KaYehova, bazikhethele nokuba bafuna ukufunda kangakanani ngawo, futhi nini.

17. Ungamnceda njani umntu omfundelayo akwazi ukuthethelela amaNgqina KaYehova xa kuxokwa ngawo? (Jonga nomfanekiso.)

¹⁷ Unokusebenzisa amanqaku akujw.org/xh athi “Imibuzo Abantu Abaqhele Ukuyibuza NgamaNgqina KaYehova,” ukuze uncede umntu omfundelayo alungiselele iimpendulo ezilula zemibuzo esenokubuzwa ngabantu azalana nabo, okanye asebenza nabo. (2 Tim. 2:​24, 25) Ekupheleni kwesifundo ngasinye esikwincwadi ethi Phila Ubomi Obumnandi Ngonaphakade! ncokolani ngendawo ethi, “Abanye Abantu Bathi.” Mkhuthaze umntu omfundelayo ukuba aprekthize ukuphendula ngamazwi akhe. Sukonqena ukumnika amacebiso aza kumnceda aphendule bhetele kunendlela aphendula ngayo. Xa usenza ezi zinto, uza kumnceda abe nesibindi sokuthethelela izinto azikholelwayo.

18. Ungamkhuthaza njani umntu omfundelayo aqalise ukushumayela? (Mateyu 10:27)

¹⁸ UYesu wayalela abafundi bakhe ukuba bashumayele iindaba ezilungileyo kubo bonke abantu. (Funda uMateyu 10:27.) Xa umntu omfundelayo engalibazisi ukuthetha ngezinto azikholelwayo, kuza kuba lula ngaye ukufunda ukuthembela ngoYehova. Ungamnceda njani azimisele ukuyenza le nto? Xa ibandla lisaziswa ukuba kuza kubakho iphulo lokushumayela, mkhuthaze ukuba acinge ngezinto anokuzenza ukuze abe ngumvakalisi. Mxelele ukuba kudla ngokuba lula kwabanye ukuqalisa kuloo maphulo ukushumayela. Enye into enokumnceda kukunikela iintetho kwiintlanganiso zaphakathi evekini. Xa ezimisela ukwenza ezi zinto, uza kufunda ukuzicacisa kakuhle izinto azikholelwayo.

MBONISE UKUBA UYAMTHEMBA

19. UYesu wabonisa njani ukuba uyabathemba abafundi bakhe? Singamlinganisa njani?

¹⁹ Ngaphambi kokuba uYesu anyukele ezulwini, waxelela abafundi bakhe ukuba babeza kuphinda  babe kunye naye. Babengayiqondi into yokuba uYesu wayethetha ngokuya kwabo ezulwini. Sekunjalo, zange ahoye kakhulu izinto ababezithandabuza, wahoya indlela ababethembeke ngayo. (Yoh. 14:​1-5, 8) Wayesazi ukuba badinga ixesha ukuze baziqonde ezinye izinto, ezifana nethemba lokuphila ezulwini. (Yoh. 16:12) NjengoYesu, nathi sinokubabonisa abantu esibafundelayo ukuba siyabathemba ukuba bayafuna ukumvuyisa uYehova.

20. Udade waseMalawi wabonisa njani ukuba uyamthemba umntu amfundelayo?

²⁰ Sihlala sinethemba lokuba umntu esimfundelayo ufuna nyhani ukwenza into elungileyo. Ngokomzekelo, khawuve into eyenziwa ngomnye udade waseMalawi, uChifundo. Waqalisa isifundo seBhayibhile nentwazana eyayingumKatolika, uAlinafe kwincwadi ethi Phila Ubomi Obumnandi Ngonaphakade! Xa babegqiba isifundo 14, uChifundo wambuza ukuba ucinga ntoni ngabantu abasebenzisa imifanekiso xa bekhonza. Ecaphuka uAlinafe wamphendula wathi, “Sisigqibo sam ke eso!” UChifundo wazibuza ukuba akazukufuna ukuyeka na ukufunda naye. Kodwa waba nomonde, waqhubeka efunda noAlinafe, enethemba lokuba ekuhambeni kwexesha uza kude ayiqonde eyona nto ifunwa nguThixo. Kwiinyanga ezimbalwa ezalandelayo, uChifundo wambuza lo mbuzo ukwisifundo 34: “Ukufunda iBhayibhile nokufunda ngoYehova kukuncede njani?” Xa echaza indlela awaphendula ngayo uAlinafe, uChifundo uthi, “Wathetha ngezinto ezininzi awazifundayo, enye yazo ikukuba amaNgqina awazenzi izinto iBhayibhile ethi azilunganga.” Kungadlulanga xesha lide, uAlinafe wayeka ukusebenzisa imifanekiso xa ekhonza, waza wabhaptizwa.

21. Singamnceda njani umntu esimfundelayo akufune nyhani ukukhonza uYehova?

²¹ Nangona inguYehova ‘okhulisayo,’ nathi singakwazi ukumnceda umntu esimfundelayo ade akhonze uYehova. (1 Kor. 3:7) Asipheleli nje ekumfundiseni ukuba uThixo ufuna enze ntoni. Siyamnceda ukuba aye emthanda nyhani uYehova. Simkhuthaza nokuba abonise ukuba uyamthanda ngokumenza abe ngoyena ubalulekileyo ebomini bakhe. Sinokumfundisa nokuthembela ngoYehova xa echaswa. Xa sibonisa ukuba siyamthemba, simenza aqiniseke ukuba naye angakwazi ukuphila ngendlela ayilindeleyo uYehova, atsho akhethe ukumkhonza.