Kubalisa uMarko 9:1-50
-
UYesu uyatshintsha (1-13)
-
Kuphiliswa inkwenkwe enedemon (14-29)
-
Zonke izinto zinako ukwenzeka kumntu onokholo (23)
-
-
Kuphinda kuprofetwe ngokufa kukaYesu (30-32)
-
Abafundi baphikisana ngokuba ngubani omkhulu (33-37)
-
Nabani na ongasichasiyo ungakuthi (38-41)
-
Izinto ezenza abantu bone (42-48)
-
“Yibani nencasa yetyiwa” (49, 50)
9 Kwakhona uYesu wathi kubo: “Ndiyaniqinisekisa ukuba, kubantu abemi apha, kukho abangazukufa de baqale babubone uBukumkani bukaThixo sele bumiselwe.”+
2 Emva kweentsuku ezintandathu, uYesu wenyuka intaba ephakamileyo noPetros noYakobi noYohane. Bambona etshintsha;+
3 izambatho zakhe zangaphezulu zabengezela, zamhlophe lee kunokuba zinokwenziwa ngumntu.
4 Kwathi kusenjalo, babona uEliya noMoses bencokola noYesu.
5 Emva koko uPetros wathi kuYesu: “Mfundisi,* kuyasivuyisa ukuba lapha. Ngoko masimise iintente zibe ntathu, eyakho, ekaMoses nekaEliya.”
6 UPetros wayengazi ukuba makathini, kuba babesoyika kakhulu.
7 Kwavela ilifu phezu kwabo, kwaza kwavakala ilizwi+ kwelo lifu, lisithi: “Lo nguNyana wam endimthandayo.+ Mmameleni.”+
8 Bathe bakubhekabheka babona ukuba akusekho mntu ngaphandle koYesu.
9 Bathi ke xa besihla entabeni, uYesu wabayalela kabukhali ukuba bangaxeleli mntu ngale nto bayibonileyo,+ de uNyana womntu avuswe ekufeni.+
10 Bammamela,* kodwa babuzana bodwa ukuba kuthetha ukuthini ukuvuka kwakhe.
11 Bambuza bathi: “Kutheni ababhali besithi kumele kuqale kufike uEliya?”+
12 Wathi kubo: “UEliya uyafika nyhani aze alungise yonke into;+ kodwa ke, kutheni kubhalwe kwathiwa uNyana womntu umele eve iintlungu ezininzi+ aze adelelwe?+
13 Kodwa ndithi kuni, uEliya+ sele ezile, baza benza unothanda kuye, kanye njengokuba kubhaliwe ngaye.”+
14 Bathi bakufika kwabanye abafundi, bababona bengqongwe ngabantu abaninzi, kukho nababhali bephikisana nabo.+
15 Bathe nje abantu bakumbona, bamangaliswa baza babaleka bayokumbulisa.
16 Wababuza esithi: “Niphikisana ngantoni naba bantu?”
17 Omnye kwabo bantu wathi: “Mfundisi, bendizise unyana wam kuwe kuba unedemon emenza angathethi.+
18 Ithi xa imphethe, imjule phantsi, alephuze amagwebu, atshixize amazinyo, aphelelwe nangamandla. Ndicele abafundi bakho ukuba bayikhuphe, kodwa khange bakwazi.”
19 UYesu wathi kubo: “Owu sizukulwanandini singenalukholo,+ kufuneka ndihlale nani de kube nini? Koda kube nini ndininyamezele? Mziseni apha.”+
20 Ngoko bayizisa kuye le nkwenkwe, kodwa loo demon ithe yakumbona uYesu, yayixhuzulisa, yawa phantsi iqika-qikeka, ilephuza namagwebu.
21 Emva koko uYesu wabuza utata wale nkwenkwe wathi: “Kudala kangakanani le nto isenzeka?” Wathi: “Yaqala esemncinci,
22 yaye amaxesha amaninzi imphosa emlilweni nasemanzini ifuna ukumbulala. Ukuba unako, sisizele uze usincede.”
23 UYesu wathi kuye: “Kutheni usithi, ‘Ukuba unako’? Kaloku, zonke izinto zinako ukwenzeka kulowo unokholo.”+
24 Ngoko nangoko utata womntwana wakhwaza esithi: “Ndinalo ukholo! Ndincede ndibe nokholo olungaphezu kolu ndinalo!”+
25 UYesu waqaphela ukuba abantu babebaleka besiza kubo, waza wayingxolisa loo demon, esithi: “Demonindini esisimumu nesisithulu, ndithi kuwe phuma kuye, uze ungaphindi ubuye!”+
26 Le demon yamxhuzulisa kaninzi lo mntwana, yakhala kakhulu, yaphuma, waza umntwana waba ngathi ufile, kangangokuba abantu abaninzi babesithi: “Ufile!”
27 Kodwa uYesu wambamba ngesandla, wamphakamisa, waza wema ngeenyawo.
28 Ngoko emva kokuba engene endlini, abafundi bakhe bambuza ecaleni besithi: “Kutheni singakwazanga nje thina ukuyikhupha?”+
29 Wathi kubo: “Olu hlobo lwedemon lukhutshwa ngomthandazo kuphela.”
30 Bemka apho, badlula eGalili, kodwa wayengafuni kubekho nabani na uyaziyo loo nto.
31 Wayefundisa abafundi bakhe, esithi kubo: “UNyana womntu uza kujikelwa aze anikelwe ebantwini, ibe baza kumbulala,+ kodwa uza kuvuka emva kweentsuku ezintathu.”+
32 Kodwa ke, babengayiqondi le nto ayithethayo, ibe babesoyika ukumbuza.
33 Bafika eKapernahum, waza uYesu akuba sendlini, wabuza abafundi bakhe esithi: “Beniphikisana ngantoni endleleni?”+
34 Bathi cwaka, kuba endleleni bebephikisana ngokuba ngubani omkhulu.
35 Ngoko wahlala phantsi, wabiza abapostile bakhe abayi-12 waza wathi kubo: “Ukuba nabani na ufuna ukuba ngowokuqala, umele abe ngowokugqibela kubo bonke aze asebenzele abanye.”+
36 Emva koko wathatha umntwana omncinci, wammisa phakathi kwabo, wamgona waza wathi kubo:
37 “Nabani na owamkela omnye wabantwana abancinci+ njengalo egameni lam, wamkela nam; ibe nabani na owamkela mna, akamkeli mna ndedwa, kodwa wamkela naLowo undithumileyo.”+
38 UYohane wathi kuye: “Mfundisi, sibone umntu ekhupha iidemon egameni lakho, sazama ukumnqanda, kuba akanguye omnye wethu.”+
39 Kodwa uYesu wathi: “Myekeni, kuba akukho mntu unokwenza imimangaliso egameni lam aze ajike athethe kakubi ngam.
40 Kuba nabani na ongasichasiyo ungakuthi.+
41 Ndiyaniqinisekisa ukuba, nabani na oninika amanzi okusela ngenxa yokuba ningabakaKristu,+ nakanjani na uza kuwufumana umvuzo wakhe.+
42 Kodwa nabani na owenza omnye waba bancinci aphelelwe lukholo, ngekubhetele ukuba ebebotshelelwe ilitye elikhulu lokuguba* entanyeni waza waphoswa elwandle.+
43 “Ukuba isandla sakho sikwenza wone, sinqumle. Kungcono ufumane ubomi ulimele kunokuba uthi unezandla zozibini uye eGehena,* emlilweni ongenakucimeka.+
44 *——
45 Yaye ukuba unyawo lwakho lukwenza wone, lunqumle. Kungcono ufumane ubomi usisiqhwala kunokuba uthi uneenyawo zombini uphoswe eGehena.*+
46 *——
47 Yaye ukuba ilihlo lakho likwenza wone, lilahle kude.+ Kungcono ungene eBukumkanini bukaThixo unelihlo elinye kunokuba uthi unamehlo omabini uphoswe eGehena,*+
48 apho iimpethu zingafiyo nomlilo ungacinywayo.+
49 “Bonke abo bantu bamele bagalelwe umlilo+ ngokungathi bagalelwa ityiwa.
50 Ityiwa ilungile, kodwa ukuba iphelelwa yincasa, niza kuyibuyisela ngantoni incasa yayo?+ Yibani nencasa yetyiwa,+ kuhlale kukho uxolo phakathi kwenu.”+
Umbhalo osemazantsi
^ Okanye “Rabhi.”
^ Okanye “abazange baxelele mntu.”
^ Okanye “ilitye lokuguba elijikeleziswa yidonki.”
^ Funda Ingcaciso Yamagama.
^ Funda Isihlomelo A3.
^ Funda Ingcaciso Yamagama.
^ Funda Isihlomelo A3.
^ Funda Ingcaciso Yamagama.
