KumaHebhere 12:1-29
12 Ngoko ke, ekubeni sinelifu elikhulu kangaka lamangqina elisingqongileyo, masilahle zonke izinto ezisisindayo nesono esisirhintyela lula,+ yaye masilubaleke sinyamezele ugqatso olubekwe phambi kwethu,+
2 njengokuba sijonge ngqo kuMmeli Oyintloko noMphelelisi wokholo lwethu, uYesu.+ Ngenxa yovuyo olwalubekwe phambi kwakhe wasinyamezela isibonda sokungcungcutheka,* engakukhathalelanga ukuhlazeka, waza wahlala ngasekunene kwetrone kaThixo.+
3 Cingisisani ngalowo uye wanyamezela amazwi enkohlakalo anjalo athethwa ngaboni+ bezenzakalisa, ukuze ningadinwa nize ninikezele.+
4 Njengokuba nisilwa neso sono, anikade nilwe de nife.
5 Niwalibele amazwi awathethwa kuni nicengwa njengoonyana kusithiwa: “Nyana wam, ungayideleli ingqeqesho kaYehova,* unganikezeli xa ekulungisa,
6 kuba uYehova* uyamohlwaya umntu amthandayo. Uyamtywatyusha* nabani na amamkela njengonyana.”+
7 Bunyamezeleni ubunzima, kuba niyaqeqeshwa. UThixo uniphatha njengoonyana bakhe.+ Ngowuphi unyana ongaqeqeshwayo ngutata wakhe?+
8 Kodwa ukuba aniqeqeshwa, aningabo oonyana, anizalwa nguye.
9 Ngaphezu koko, ootata bethu babesiqeqesha ibe sasibahlonipha. Asifanelanga na simthobele nangaphezulu ke uTata owasikhetha ngomoya oyingcwele size siphile?+
10 Kuba bona basiqeqesha ixesha elifutshane ngendlela ababeyibona ilungile, kodwa yena usiqeqesha enceda thina ukuze sibe ngcwele njengaye.+
11 Ewe kona, akubi mnandi ngeli xesha siqeqeshwayo, kodwa kuba buhlungu. Sekunjalo, abo baqeqeshwayo baba nesiqhamo soxolo esibubulungisa.
12 Ngoko ke yomelezani izandla ezityhafileyo namadolo abuthathaka,+
13 nize niqhubeke nihamba kwindlela efanelekileyo,+ ukuze into eqhwalelayo ingakruneki, kodwa iphiliswe.
14 Zamani ukuba seluxolweni nabantu bonke,+ nize nibe ngcwele+ kuba akakho umntu ongekho ngcwele oya kuyibona iNkosi.
15 Lumkani kungabikho mntu ungabufumaniyo ububele* bukaThixo, ukuze kungabikho ngcambu inetyhefu intshulayo ize ibangele inkathazo, bangcoliswe yiyo abantu abaninzi.+
16 Lumkani kungabikho nabani na oziphatha kakubi ngesondo* okanye nabani na ongazixabisiyo izinto ezingcwele, njengoEsawu, owancama amalungelo akhe obuzibulo ngenxa yesidlo esinye.+
17 Kuba niyazi ukuba xa wayefuna ukufumana intsikelelo emva koko, zange ayinikwe. Wazama ngazo zonke iindlela ukutshintsha ingqondo katata wakhe ngeenyembezi,+ kodwa zange imncede loo nto.
18 Kuba anisondelanga kwinto enokuphathwa+ netshiswe ngomlilo,+ nakwilifu elimnyama nesithokothoko sobumnyama nesivuthuvuthu,+
19 nasekukhaleni kwexilongo+ nelizwi,+ abathi abantu xa beliva, bacela ukuba lingaphindi lithethe nabo.+
20 Kuba babesoyika kwaumyalelo othi: “Kwanesilwanyana esichukumisa le ntaba, simele sibethwe ngamatye.”+
21 Ngaphezu koko, loo mbono wawusoyikeka kangangokuba uMoses wathi: “Ndiyoyika yaye ndiyangcangcazela.”+
22 Kodwa nina niye nasondela kwiNtaba YeZiyon+ nakwisixeko sikaThixo ophilayo, iYerusalem yasezulwini,+ namashumi amawaka eengelosi
23 asebandleni,+ nebandla lamazibulo abhaliswe emazulwini, noThixo uMgwebi wabo bonke,+ nobomi bamalungisa akhethwe ngumoya oyingcwele+ aza enziwa agqibelela,+
24 noYesu umlamli+ wesivumelwano esitsha,+ negazi elifefiweyo, elithetha ngendlela ebhetele kunegazi lika-Abheli.+
25 Qinisekani ukuba niyammamela lowo uthethayo. Kaloku ukuba zange babhungce abantu abangazange bavume ukummamela lowo wayezise isilumkiso esivela kuThixo emhlabeni, singabhungca njani ke thina ukuba siyamfulathela lowo uthetha esezulwini?+
26 Ngelo xesha ilizwi lakhe lawugungqisa umhlaba,+ kodwa ngoku uye wathembisa, esithi: “Ndiza kuphinda ndigungqise kungekuphela nje umhlaba kodwa kwanezulu.”+
27 Amagama athi “ndiza kuphinda” abonisa ukuba ziza kususwa izinto ezigungqisiweyo, izinto ezenziweyo, ukuze kushiyeke ezo zingagungqiswanga.
28 Ngoko ke, ekubeni siza kufumana uBukumkani obungenakugungqiswa, masiqhubeke sisamkela ububele bukaThixo,* obusinceda sikwazi ukukhonza uThixo ngendlela engcwele, simoyika yaye simhlonipha.
29 Kuba uThixo wethu ungumlilo otshabalalisayo.+
Umbhalo osemazantsi
^ Okanye “isibonda sentuthumbo.” Funda Ingcaciso Yamagama.
^ Funda Isihlomelo A5.
^ Funda Isihlomelo A5.
^ Okanye “Uyamohlwaya.”
^ Okanye “ububele obungasifanelanga.”
^ Okanye “ohenyuzayo.” Funda Ingcaciso Yamagama.
^ Okanye “ububele bukaThixo obungasifanelanga.”
