Pamberi paMwari marudzi ose akafanana, saka hapana chakaipa kuti vanhu vemarudzi akasiyana varoorane. Bhaibheri rinoti: “Mwari anobata vanhu vose zvakafanana . . . , pasinei nekuti ndeverudzi rwupi.”—Mabasa 10:34, 35, Good News Translation.

 Chimboona zvimwe zvinotaurwa neBhaibheri nezvekufanana kwakaita marudzi evanhu akasiyana-siyana uye kuroorana kwevanhu ava.

 Vanhu vakabva kune munhu wokutanga, Adhamu, uye mudzimai wake, Evha, uyo anonzi neBhaibheri “amai vevanhu vose vapenyu.” (Genesisi 3:20) Nokuda kwechikonzero ichi, Bhaibheri rinoti Mwari “akaita marudzi ose evanhu kubva pamunhu mumwe chete.” (Mabasa 17:26) Pasinei nekuti vanhu ndevemarudzi akasiyana-siyana, vanhu vose imhuri imwe chete. Asi zvakadini kana nyaya yerusaruraganda ichitonga kwaunogara?

 Kunyange zvazvo kuna Mwari pasina chakaipa nokuroorana kwevanhu vemarudzi akasiyana, havasi vanhu vose vanozvifarira. (Isaya 55:8, 9) Kana uri kufunga zvokuroorana nemunhu werumwe rudzi, iwe nemumwe wako munofanira kukurukura zvinhu izvi:

•   Muchaita sei kana hama dzenyu kana kuti vanhu vekwamunogara vakatanga kutaura zvakasiyana-siyana?

•   Muchabatsira sei vana venyu kukunda dambudziko rerusaruraganda?

 Kutaurirana kwakadaro kunogona kuita kuti imba yenyu ibudirire.—Zvirevo 13:10; 21:5.