Kana tiine vamwe vatinonamata navo, tinonzwa sezvaiita Mambo Dhavhidhi paakati: “Tarisai kunaka kwazvakaita uye kufadza kwazvinoita kana hama dzichigara pamwe chete dzakabatana.” (Pisarema 133:1) Hazvingoitiki zvega kuti tive vanhu vakabatana. Mumwe nemumwe wedu ane zvaanofanira kuita kuti tirambe takabatana.

1. Chii chinoyemurika pavanhu vaMwari?

Kana ukashanya kune imwe nyika woenda kumusangano weungano, unogona kusanzwa hako mutauro weko, asi unonzwa kuti uri pakati pevamwe vako. Chii chinoita kuti unzwe saizvozvo? Chikonzero ndechekuti tinodzidza Bhaibheri tichishandisa mabhuku akafanana munyika yese. Uye tinoedza kuratidzana rudo. ‘Tinodana zita raJehovha, uye tinomushumira takabatana,’ pasinei nekwatinogara.—Zefaniya 3:9.

2. Ungaita sei kuti uchengetedze kubatana kwatakaita?

“Dananai kwazvo zvichibva pamwoyo.” (1 Petro 1:22) Ungashandisa sei zano iri? Panzvimbo pekungotarisa zvinokanganiswa nevamwe, tsvagawo zvakanaka zvavanoita. Usangoshamwaridzana nevanofarira zvaunofarirawo chete. Edza kuzivanawo nevamwe vanobva kwakasiyana-siyana. Tinofanirawo kurwisa pfungwa yekuvenga vanhu vemamwe marudzi yatingava nayo.—Verengai 1 Petro 2:17. a

3. Ungaita sei kana ukatadza kuwirirana nemumwe muKristu?

Kunyange zvazvo tiri vanhu vakabatana, tinombotadziranawo. Tinogona kuitira vamwe vedu zvavanga vasingatarisire kuti tingavaita, kana kutovarwadzisa. Ndosaka Shoko raMwari richitiudza kuti “rambai . . . muchiregererana.” Rinoenderera mberi richiti: “Sezvo Jehovha akakuregererai nemwoyo wese, imiwo itai saizvozvo.” (Verengai VaKorose 3:13.) Takatadzira Jehovha kakawandisa, asi anongotiregerera. Saka anotarisira kuti isuwo tikanganwire hama dzedu. Kana ukaziva kuti pane munhu wawakatadzira, tanga iwe kutora danho rekugadzirisa nyaya yacho.—Verengai Mateu 5:23, 24. b

 WEDZERA KUONGORORA

4. Kurira dambudziko rekusarura vanhu vemamwe marudzi

Tinofanira kuda hama dzedu dzese. Asi tinogona kuona zvichitiomera kuda mumwe munhu akasiyana nesu. Chii chingatibatsira? Verengai Mabasa 10:34, 35, mobva makurukura mibvunzo iyi:

• Jehovha anogamuchira vanhu vemarudzi ese kuti vave Zvapupu zvake. Kuziva izvozvo kunofanira kuita kuti tione sei vamwe vanobva kwakasiyana nekwatinobva?

• Kwaunogara vanhu vanowanzosarura vanhu vakaita sei?

Verengai 2 VaKorinde 6:11-13, mobva makurukura mubvunzo uyu:

• Unofunga kuti ungaita sei kuti uve pedyo nehama nehanzvadzi dzisiri dzerudzi rwako?

5. Regerera nemwoyo wese uye gadzirisa nyaya kana paine kusawirirana

Jehovha anotiregerera nemwoyo wese, asi hapana paachazomboda kuti isuwo timuregerere. Verengai Pisarema 86:5, mobva makurukura mibvunzo iyi:

• Kuregerera kwaJehovha kwakakura zvakadii?

• Chii chinoita kuti uonge kukanganwira kwake?

• Ndepapi patinogona kuomerwa nekuchengeta rugare muungano?

Tingatevedzera sei Jehovha toramba takabatana nehama dzedu nehanzvadzi? Verengai Zvirevo 19:11, mobva makurukura mubvunzo uyu:

• Kana mumwe munhu akakugumbura kana kuti akakudenha, ungaite sei kuti nyaya isabva yawedzera kuipa?

 Dzimwe nguva tinogumbura vamwe. Kana izvozvo zvikaitika, tinofanira kuita sei? Ngationei VHIDHIYO, tobva takurukura mubvunzo unotevera.

• Muvhidhiyo iyi, hanzvadzi yakaita sei kuti igadzirise kusawirirana kwayaive nako neimwe hanzvadzi?

 PFUPISO

Unogona kubatsira kuti ungano igare yakabatana kana uchikanganwira uye uchiratidza kuti unoda hama nehanzvadzi dzako dzese.

Kudzokorora

• Ungakurira sei dambudziko rekusarura vanhu vemamwe marudzi?

• Uchaita sei kana ukapesana nemumwe muKristu?

• Nei uchida kutevedzera Jehovha panyaya yekuregerera vamwe?