Jeremiya 2:1-37
2 Shoko raJehovha rakauya kwandiri richiti:
2 “Enda unoudza Jerusarema kuti, ‘Zvanzi naJehovha:
“Ndinonyatsoyeuka kuzvipira kwako* pawaiva mudiki,+Rudo rwawakaratidza panguva yawainge wakavimbiswa kuroorwa,+Kunditevera kwawakaita murenje,Munyika isina kudyarwa mbeu.+
3 Israeri aiva mutsvene kuna Jehovha,+ zvibereko zvekutanga zvegoho rake.”’
‘Chero munhu aimuparadza aibva ava nemhosva.
Aibva awirwa nedambudziko,’ ndizvo zvinotaurwa naJehovha.”+
4 Inzwai shoko raJehovha, haiwa imi imba yaJakobho,Nemi mhuri dzese dzeimba yaIsraeri.
5 Zvanzi naJehovha:
“Madzitateguru enyu akawana mhosva ipi pandiri,+Yakaita kuti aende kure neni zvakadaro,Akafamba achitevera zvidhori zvisina zvazvinobatsira,+ naiwo akavawo vanhu vasina zvavanobatsira?+
6 Haana kubvunza kuti, ‘Jehovha ari kupi,Iye akatibudisa munyika yeIjipiti,+Akatitungamirira nemurenje,Munyika ine magwenga+ nemakomba,Nyika isinganayi mvura+ uye ine rima gobvu,Nyika isina munhu anoifambaUye isina munhu anogara mairi?’
7 Ndakabva ndakuunzai kunyika ine minda yemichero,Kuti mudye michero yayo nezvinhu zvayo zvakanaka.+
Asi makapinda mukasvibisa nyika yangu;Makaita kuti nhaka yangu ive chinhu chinosemesa.+
8 Vapristi havana kubvunza kuti, ‘Jehovha ari kupi?’+
Vaya vanoita zveMutemo havana kundiziva,Vafudzi vakandipandukira,+Vaprofita vakaprofita muzita raBhaari,+Uye vakatevera vaya vaisagona kubatsira.
9 ‘Saka ndichakakavadzanazve nemi,’+ ndizvo zvinotaurwa naJehovha,‘Uye ndichakakavadzana nevanakomana vevanakomana venyu.’
10 ‘Asi yambukai muende kunyika dzevaKitimu+ dziri* mumhenderekedzo yegungwa muone.
Tumirai shoko kuKedhari+ munyatsofungisisa;Onai kuti zvinhu zvakadai zvakamboitika here.
11 Kune rudzi rwakambochinjanisa vanamwari varwo nevaya vasiri vanamwari here?
Asi vanhu vangu vakachinjanisa kukudzwa kwangu nezvinhu zvisingabatsiri.+
12 Ramba wakatarisa izvi uchishamiswa, iwe denga;Dedera nekutya kukuru,’ ndizvo zvinotaurwa naJehovha,
13 ‘Nekuti vanhu vangu vakaita zvinhu zviviri zvakaipa:
Vakandisiya, ini tsime remvura mhenyu,+Uye vakazvicherera migodhi yemvura,Migodhi* isingachengeti mvura.’
14 ‘Israeri mushandi kana kuti muranda akaberekwa mumusha here?
Saka nei akasiyiwa achipambwa?
15 Shumba dzine simba* dzinomudzvovera;+Idzo dzaomba.
Dzakaita kuti nyika yake ive chinhu chinotyisa.
Maguta ake atungidzwa nemoto, zvekuti hamuna anogaramo.
16 Vanhu vekuNofi*+ nekuTapanesi+ vanodya panhongonya pako.
17 Hauna kuzviunzira zvinhu izvi hereNekusiya kwawakaita Jehovha Mwari wako+Paaikutungamirira munzira?
18 Zvino wava kudirei nzira inoenda kuIjipiti+Kuti unwe mvura yeShihori?*
Wava kudirei nzira inoenda kuAsiriya+Kuti unwe mvura yeRwizi?*
19 Zvakaipa zvako zvinofanira kukururamisa,Uye kusatendeka kwako kunofanira kukutsiura.
Ziva uone kuipa nekurwadza kwazvinoita+Paunosiya Jehovha Mwari wako;Hauna kunditya,’+ ndizvo zvinotaurwa naChangamire Ishe, Jehovha wemauto.
20 ‘Nekuti ndakatyora-tyora joko rako kare kare+Uye ndakabvisa zvisungo zvako.
Asi iwe wakati: “Handisi kuzoshumira,”
Nekuti waizvambarara uchiita upfambi+Muzvikomo zvese zvakakwirira nepasi pemiti yese yakasvibirira.+
21 Ndakakudyara uri muzambiringa mutsvuku wakanaka kwazvo,+ wese zvawo uri mbeu yakanaka;Saka wachinja sei pamberi pangu ukava nhungirwa dzakaipa dzemuzambiringa wemusango?’+
22 ‘Kunyange ukageza nesoda kana kushandisa sipo yakawanda,Kukanganisa kwako kuchangoramba kuri gwapa pamberi pangu,’+ ndizvo zvinotaurwa naChangamire Ishe Jehovha.
23 Ungati sei, ‘Handina kuzvisvibisa.
Handina kutevera vanaBhaari’?
Tarisa nzira yako mubani.
Funga zvawakaita.
Wakaita sengamera diki hadzi inomhanya chaizvo,Inongomhanya-mhanya munzira dzayo zvisina chinangwa,
24 Dhongi remusango rajaira kugara murenje,Rinofembedza mhepo richida mukono.
Ndiani angaridzora parinenge rava kuda mukono?
Pavanhu vanoritsvaga hapana anoita zvekutobuda ziya.
Vachariwana mumwaka* waro wekuda mukono.
25 Usaita kuti tsoka dzako dzifambe dzisina shanguUye kuti huro yako ive nenyota.
Asi wakati, ‘Hazvichabatsiri!+
Aiwa! Ndiri kuda vaya vandisingazivi,*+Uye ndichavatevera.’+
26 Sekunyara kunoita mbavha kana yabatwa,Imba yaIsraeri yanyadziswa,Ivo nemadzimambo avo, machinda avo,Nevapristi vavo nevaprofita vavo.+
27 Vanoti kumuti, ‘Ndiwe baba vangu,’+
Uye kudombo, ‘Wakandibereka.’
Asi ivo vanondifuratira, havanditarisi nezviso zvavo.+
Panguva yedambudziko ravo vachati,‘Simukai mutiponese!’+
28 Zvino vanamwari vako vawakazvigadzirira vari kupi?+
Ngavasimuke kana vachikwanisa kukuponesa panguva yekutambudzika kwako,Nekuti vanamwari vako vawanda semaguta ako, haiwa iwe Judha.+
29 ‘Nei muchiramba muchikakavadzana neni?
Nei makandipandukira mese zvenyu?’+ ndizvo zvinotaurwa naJehovha.
30 Ndakarova vanakomana venyu asi hapana zvazvakabatsira.+
Havana kubvuma kurangwa;+Bakatwa renyu rakaparadza vaprofita venyu+Seshumba yarura.
31 Haiwa imi chizvarwa ichi, fungai shoko raJehovha.
Ndaita serenje kuna Israeri hereKana kuti senyika yerima rinotyisa?
Nei vanhu vangu ava vakati, ‘Tinongofamba tichienda kwatada.
Hatizouyi kwamuri zvakare’?+
32 Mhandara ingakanganwa zvishongo zvayo here,Uye mwenga angakanganwa machira ake anosungwa nechemumazamu* here?
Asi vanhu vangu vakandikanganwa kwemazuva asingaverengeki.+
33 Haiwa iwe mukadzi, wakanyatsogadzira nzira yako uchitsvaga kudiwa!
Wakazvidzidzisa nzira dzezvakaipa.+
34 Kunyange nechezasi kwenguo dzako kune ropa revarombo vasina mhosva,*+Kunyange zvazvo ndisina kuvawana vachipaza;Ropa ravo riri panguo dzako dzese nechekuzasi kwadzo.+
35 Asi unoti, ‘Handina mhosva.
Chokwadi kutsamwa kwake kwabva pandiri.’
Iye zvino ndiri kukuunzira mutongo wakoNekuti uri kuti, ‘Handina kutadza.’
36 Nei uchiona kuchinja-chinja kwaunoita nzira yako sechinhu chidiki?
Uchanyarawo neIjipiti,+Sekunyara kwawakaita neAsiriya.+
37 Nekuda kweizviwo uchabuda wakabata musoro,+Nekuti Jehovha aramba vaya vaunovimba navo;Havazoiti kuti ubudirire.”
Mashoko Emuzasi
^ Kana kuti “rudo rwako rusingachinji.”
^ Kana kuti “kuzvitsuwa zvevaKitimu zviri.”
^ Kana kuti “Migodhi yakatsemuka.”
^ Kana kuti “Shumba dzava nezenze.”
^ Kana kuti “vekuMemfisi.”
^ Kureva, Yufratesi.
^ Kureva, rwizi rwunobuda muRwizi rwaNire.
^ ChiHeb., “mumwedzi.”
^ Kana kuti “vanamwari vekumwe.”
^ Kana kuti “bhandi rake repamuchato rejira.”
^ Kana kuti “remweya isina mhosva.”
