Pa 29 May 2024, Khoti la m’boma la Zeyskiy m’chigawo cha Amur, linapeza kuti M’bale Yevgeniy Sokolov ndi wolakwa ndipo linagamula kuti kwa zaka zitatu azitsatira malamulo ena ali kunyumba kwawo. M’baleyu sakufunika kupita kundende panopa.

Umenewu ndi mlandu wachiwiri womwe m’bale Sokolov anaimbidwa. Tikunena pano mlandu woyamba umene ukukhudzanso abale ena 9, ukuyendetsedwa mumzinda wa Voronezh komwe m’baleyu akukhala.

M’bale Sokolov anafotokoza chimene chimamuthandiza kupirira. Iye anati: “Ndikuphunzira kudalira kwambiri Yehova. Anthufe sitingathetse mavuto athu m’njira yabwino ngati mmene Yehova angachitire. Nthawi zonse iye amachita zinthu m’njira yabwino kwambiri komanso mwanzeru.”

Mofanana ndi M’bale Sokolov, tiyeni tipitirize kuuza Yehova kuti: “Inu ndinu malo anga othawirako,” ndipo tisamakayikire kuti adzatithandiza pa nthawi yomwe tikufunika kuthandizidwa.—Salimo 142:5.

1. 15 December, 2022

   Anatsegulira Yevgeniy mlandu wachiwiri mwiniwake asakudziwa

2. 22 September, 2023

   Yevgeniy anadziwa kuti amutsegulira mlandu. Anafunsidwa mafunso ndipo anamupeza ndi mlandu “wokonzekera komanso kuchititsa msonkhano wachipembedzo”

3. 22 April, 2024

   Anayamba kumuzenga mlandu

4. 29 May, 2024

   Anapezeka wolakwa ndipo anamugamula kuti kwa zaka zitatu azitsatira malamulo ena ali kunyumba kwawo