Jesu o laleditše barutiwa ba bane—Petro, Andrea, Jakobo le Johane—gore e be barei ba batho. Bjale, ka Sabatha ka moka ga bona ba ya sinagogeng ya kgauswi kua Kaperenaume. Jesu o ruta sinagogeng gomme batho ba buša ba makatšwa ke mokgwa wa gagwe wa go ruta. O dira seo bjalo ka motho yo a nago le matla a bolaodi e sego bjalo ka bamangwalo.

Ka Sabatha ye, go na le monna yo a nago le motemona. Gona moo sinagogeng, monna o goeletša ka lentšu le hlabošago o re: “O tletše eng mo wena Jesu wa Monatsaretha? Na o tletše go re fediša? Ke tseba gabotse gore o mang, o Mokgethwa wa Modimo.” Ge Jesu a kgalemela motemona yo a laolago monna yoo, o re: “Homola gomme o tšwe go yena!”—Mareka 1:24, 25.

Ge a re’alo, moya o sa hlwekago wa lahlela monna fase ka go mo utlautla le go goeletša ka lentšu le legolo. Eupša motemona o tšwa go monna “ka ntle le go mo gobatša.” (Luka 4:35) Batho bao ba lego kgauswi le yena ka sinagogeng ba maketše e le ruri! Ba botšiša ba re: “Ke eng se? . . . Gaešita le meoya e sa hlwekago o e laela ka matla gomme e a mo kwa.” (Mareka 1:27) Ga go makatše ge ditaba tša tiragalo ye e kgahlišago di phatlalala le Galilea ka moka.

Ge Jesu le barutiwa ba gagwe ba tloga sinagogeng, ba ya legaeng la Simone goba Petro. Mmatswale wa Petro o swerwe ke letadi o šoro moo. Ba kgopela Jesu gore a mo thuše. Ka gona Jesu o ya go yena, a mo swara ka seatla gomme a mo tsoša. O fola ka yona nako yeo gomme a thoma go hlokomela Jesu le barutiwa bao ba nago le yena moo, mohlomongwe a ba lokišetša dijo.

Ge letšatši le yela go sobela, batho ba tšwago mathokong ohle ba tla ntlong ya Petro le balwetši ba bona. Kapejana go bonala eka motse ka moka o bokane mojakong. Ka baka la’ng? Ba nyaka phodišo. Ge e le gabotse, ‘bohle bao ba bego ba na le batho ba ba swerwego ke malwetši a fapafapanego ba ba tliša go yena. O ba fodiša ka go bea yo mongwe le yo mongwe wa bona diatla.’ (Luka 4:40) Ee, go sa šetšwe gore malwetši a bona ke afe, Jesu o a ba thuša, bjalo ka ge go boletšwe e sa le pele. (Jesaya 53:4) E bile o lokolla bao ba nago le batemona. Ge meoya e kgopo e etšwa, e goeletša ka gore: “O Morwa wa Modimo.” (Luka 4:41) Eupša Jesu o a e kgalemela gomme a se sa e dumelela go bolela. E a tseba gore Jesu ke Kriste gomme ga a nyake gore e bonale eka e hlankela Modimo wa therešo.