Ebangedi ya Luka 8:1-56
-
Basadi bao ba sepelago le Jesu (1-3)
-
Papišo ya mobjadi (4-8)
-
Lebaka leo le dirilego gore Jesu a diriše dipapišo (9, 10)
-
Tlhaloso ya papišo ya mobjadi (11-15)
-
Lebone ga le khupetšwe (16-18)
-
Mmago Jesu le banababo Jesu (19-21)
-
Jesu o homotša ledimo (22-25)
-
Jesu o rakela matemona mohlapeng wa dikolobe (26-39)
-
Morwedi wa Jairo. Mosadi o swara seaparo sa ka ntle sa Jesu (40-56)
8 Ka moragonyana ga moo, Jesu o ile a tloga motseng o mongwe a ya go o mongwe a ba a tloga motsaneng o mongwe a ya go o mongwe. O be a sepela a bolela ditaba tše dibotse tša Mmušo wa Modimo+ ebile o be a na le Baapostola ba gagwe ba 12
2 le basadi ba bangwe bao a ilego a ba ntšha matemona le go ba fodiša. Basadi bao ke ba ba latelago: Maria yo a bego a bitšwa Magdalena yo a ilego a ntšhiwa matemona a šupago,
3 Johana+ mosadi wa Khusa. Monna wa gagwe o be a hlokomela dilo tša Heroda. Yo mongwe e be e le Susana ebile go be go na le basadi ba bangwe ba bantši. Basadi ba ka moka ba be ba thuša Jesu le baapostola ba gagwe ka dilo tša bona.+
4 Bjale ge lešaba le legolo le be le kgobokane gotee le batho bao ba bego ba tlile le yena ba etšwa metseng e fapafapanego, o ile a ba ruta a diriša papišo a re:+
5 “Mobjadi yo mongwe o ile a tšwa a ya go bjala peu. Ge a dutše a bjala peu, e nngwe e ile ya wela kgauswi le tsela ke moka batho ba e gatakela gomme dinonyana tša tla tša eja tša e fetša.+
6 E nngwe e ile ya wela leswikeng gomme ka morago ga gore e mele, dimela tša yona di ile tša omelela ka gobane di be di sa hwetše meetse.+
7 E nngwe e ile ya wela meetlweng gomme meetlwa ya gola ya di khupetša.+
8 Eupša e nngwe e ile ya wela mobung o mobotse ke moka ka morago ga gore e mele, peu e nngwe le e nngwe e ile ya tšweletša go feta ga 100.”+ Ge a dutše a bolela dilo tše, a hlaboša lentšu a re: “Anke yo a nago le tsebe a kwe.”+
9 Eupša barutiwa ba gagwe ba mmotšiša gore papišo yeo e ra goreng.+
10 A re: “Modimo o le dumeletše gore le kgone go kwešiša diphiri tše kgethwa tša Mmušo wa gagwe eupša ba bangwe ka moka ke ba ruta tšona ke diriša dipapišo+ e le gore le ge ba ka lebelela, ba se bone selo, le gore le ge ba ka kwa, ba se kwešiše selo.+
11 Se ke seo se bolelwago ke papišo ye: Peu e swantšhetša lentšu la Modimo.+
12 Peu yeo e bjetšwego kgauswi le tsela e swantšhetša batho bao ba kwelego lentšu la Modimo ke moka Diabolo a tla a tšea lentšu leo le lego dipelong tša bona e le gore ba se ke ba ba le tumelo le gore ba se ke ba phološwa.+
13 Peu yeo e bjetšwego leswikeng e swantšhetša batho bao ba kwelego lentšu la Modimo ba le amogela ka lethabo, eupša ba swana le dimela tšeo di se nago medu. Ba le dumela ka nakwana eupša ge ba kopana le diteko ga ba sa le dumela.+
14 Ge e le yeo e wetšego gare ga meetlwa, e swantšhetša bao ba kwago lentšu la Modimo eupša ga ba enywe dienywa ka gobane ba šitišwa ke dipelaelo, mahumo+ le maipshino a bophelo bjo,+ gomme dilo tše ka moka di khupetša lentšu leo.+
15 Ge e le yeo e wetšego mmung o mobotse e swantšhetša bao ba kwelego lentšu gomme ba le amogela ka dipelo ka moka,+ ke moka ba tšweletša dienywa le ge ba kgotleletše mathata.+
16 “Ga go na motho yo a ka tšhumago lebone gomme ka morago a le khurumetša ka sebjana goba a le bea ka fase ga mpete, eupša o le bea godimo ga sehlomelalebone e le gore batho bao ba tsenago ka ntlong ba kgone go bona seetša.+
17 Ka gobane ga go na selo seo se utilwego seo se ka se bonagalego le gona ga go na selo seo se utilwego ka kelohloko seo se ka se tsebjego gomme sa tšweletšwa pele ga batho.+
18 Ka gona le swanetše go theetša gabotse ka gobane mang le mang yo a nago le selo o tla fiwa dilo tše dintši,+ eupša mang le mang yo a se nago selo gaešita le seo a naganago gore o na le sona o tla se tšeelwa.”+
19 Bjale mmagwe le banababo+ ba tla go yena, eupša ba be ba sa kgone go fihla go yena ka gobane go be go na le batho ba bantši.+
20 Batho ba bangwe ba ile ba tla go yena gomme ba re go yena: “Mmago le banabeno ba eme ka ntle ba nyaka go go bona.”
21 Ge a ba araba a re go bona: “Mma le banabešo ke bao ba kwago lentšu la Modimo gomme ba dira seo le se bolelago.”+
22 Ka letšatši le lengwe, Jesu le barutiwa ba gagwe ba ile ba namela sekepe ke moka Jesu a re go bona: “A re tsheleleng ka mošola wa letsha.”+ Ke moka ba ya.
23 Eupša ge ba dutše ba sepela Jesu o ile a robala. Ke moka gwa ba le ledimo le legolo ka lewatleng, meetse a tlala ka sekepeng moo se bego se le kgauswi le go nwelela.+
24 Ka gona ba tla ba mo tsoša ba re: “Morutiši, Morutiši, re kgauswi le go hwa!” Ke moka Jesu a tsoga a kgalemela phefo le maphoto ao a bego a galefile gomme ledimo la ema, gwa homola gwa re tuu!+
25 Ke moka a re go bona: “Ke ka baka la eng le sa tshepe Modimo?” Eupša ba tšhoga kudu ba ba ba makala ba boledišana ba re: “Gabotsebotse motho yo ke mang? O kgalemela diphefo le meetse gomme tša mo kwa.”+
26 Ke moka ba fihla ka lehlakoreng le lengwe la lewatle la Galelia nageng ya Bagerasa.+
27 Ge Jesu a se na go fologa sekepe, o ile a kopana le monna yo mongwe yoo a bego a na le matemona. O be a feditše nako e telele a sa apare diaparo gomme a dula mabitleng+ e sego ka gae.
28 Ge monna yoo a bona Jesu, o ile a goeletša ke moka a wela fase pele ga Jesu gomme a bolela ka lentšu la godimo a re: “O tlile go dira eng mo wena Jesu Morwa wa Modimo yo Godimodimo? Ke kgopela gore o se ke wa ntlaiša.”+
29 (Jesu o be a laetše moya woo o mobe gore o tšwe go monna yoo. O be o mo tlaišitše ka makga a mantši*+ ebile o be a tlengwa gantši ka ditšhipi le diketane eupša o be a kgaola diketane tšeo le ditšhipi gomme letemona le mo iša mafelong ao a lego ka thokwana.)
30 Jesu a mmotšiša a re: “Ke wena mang?” A re: “Leina la ka ke nna Madira,” ka gobane o be a tsenwe ke matemona a mantši.
31 Ke moka matemona ao a dulela go kgopela Jesu gore a se ke a a lahlela sekoting.+
32 Bjale go be go na le mohlape o mogolo wa dikolobe+ woo o bego o fula thabeng yeo e bego e le kgauswi le moo. Ka gona matemona ao a mo kgopela gore a a dumelele gore a tsene mohlapeng woo wa dikolobe, ke moka a a dumelela.+
33 Ka gona, matemona a tšwa go monna yoo a tsena dikolobeng ke moka mohlape wa dikolobe wa kitimela leribeng la letsha gomme wa wela ka moo wa kgangwa ke meetse.
34 Eupša ge badiši ba tšona ba bona dilo tšeo di diregilego ba ile ba tšhaba, ba ya ba botša batho bao ba dulago motseng woo le bao ba dulago go o dikologa ka dilo tšeo.
35 Ke moka batho ba tšwela ka ntle go yo bona seo se diragetšego, ba tla go Jesu gomme ba hwetša monna yo Jesu a mo ntšhitšego matemona a apere ebile monagano wa gagwe o boetše sekeng, a dutše kgauswi le maoto a Jesu, ke moka ba tšhoga kudu.
36 Batho bao ba bonego seo ba ile ba ba hlalosetša kamoo Jesu a ilego a fodiša monna yoo a bego a na le matemona.
37 Ke moka batho ba bantši bao ba tšwago nageng ya Bagerasa ba kgopela Jesu gore a tloge moo ka gobane ba be ba tšhogile kudu. Ke moka Jesu a namela sekepe gomme a itokišeletša go sepela.
38 Eupša monna yoo a bego a ntšhitšwe matemona a dulela go kgopela Jesu gore a tšwele pele a sepela le yena. Le ge go le bjalo Jesu a mo gomiša a re:+
39 “Boela gae o ye go botša batho ka dilo tšeo Modimo a go diretšego tšona.” Ka gona a boela gae, a botša motse ka moka ka dilo tšeo Jesu a mo diretšego tšona.
40 Ge Jesu a boela tikologong ya Galelia, batho ba moo ka moka ba ile ba mo amogela ka gobane ba be ba mo letetše.+
41 Eupša monna yo a bitšwago Jairo a tla. Monna yo e be e le moetapele wa sinagoge. O ile a khunama pele ga Jesu gomme a mo kgopela gore a tle ntlong ya gagwe,+
42 ka gobane morwedi wa gagwe a nnoši yo a bego a na le mengwaga e ka bago e 12, o be a le kgauswi le go hlokofala.
Ge Jesu a eya moo, mašaba a ile a mo šala morago gomme a mo pitlaganya.
43 Bjale go be go na le mosadi yo mongwe yo a bego a swerwe ke bolwetši bja go ya matšatšing a sa fetše*+ ka mengwaga e 12, go be go se na motho yo a ilego a kgona go fodiša mosadi yoo.+
44 Mosadi yoo o ile a tla ka morago ga Jesu, a kgwatha morumo wa seaparo sa gagwe sa ka ntle+ gomme bolwetši bja gagwe bja napa bja fola.
45 Ka gona Jesu a re: “Ke kgwathilwe ke mang?” Batho ka moka ba ile ba re ga se bona. Ke moka Petro a re: “Morutiši, o a bona gore mašaba a go kgobokanetše ebile a a go pitlaganya.”+
46 Eupša Jesu a re: “Ke re ke a tseba gore go na le yo a nkgwathilego ka gobane ke kwele maatla+ a etšwa go nna.”
47 Ge mosadi yoo a lemoga gore a ka se dule a khutile, o ile a tla go Jesu a thothomela gomme a khunama pele ga gagwe. A bolela pele ga batho ka moka gore ke ka baka la eng a kgwathile Jesu, a ba a hlalosa le ka mo a ilego a fola gateetee.
48 Eupša Jesu a re go yena: “Morwedi wa ka, tumelo ya gago e go fodišitše. Sepela ka khutšo.”+
49 A re a sa bolela, gwa tla monna yo a tšwago legaeng la Jairo, a re: “Morwedi wa gago o hlokofetše. O se sa tshwenya Morutiši.”+
50 Ge Jesu a ekwa seo, a re go yena: “O se ke wa tšhoga, wena e no ba le tumelo gomme yena o tla phela.”*+
51 Ge a fihla ntlong o ile a dumelela gore go tsene feela Petro, Johane, Jakobo le batswadi ba ngwanenyana yoo.
52 Batho ka moka ba be ba lla gabohloko ebile ba itshetla dihuba go bontšha gore ba nyamišitšwe ke gore ngwana yoo o hlokofetše. Ka gona Jesu a re: “Tlogelang go lla+ ka gobane ngwana yo ga se a hlokofala eupša o robetše.”+
53 Ge a realo, ba thoma go mo sega ka lenyatšo ka gobane ba be ba tseba gore ngwanenyana yoo o hlokofetše.
54 Eupša a swara ngwanenyana yoo ka seatla a bolela ka go hlaboša a re: “Ngwanenyana, tsoga!”+
55 Ngwanenyana yoo a boela a phela,*+ a napa a tsoga+ moo a bego a robetše gona ke moka Jesu a laela gore a fiwe sa go ja.
56 Batswadi ba ngwanenyana yoo ba be ba thabile kudu, eupša Jesu o ile a ba laela gore ba se ke ba botša motho ka seo se diregilego.+
