Go Hlankela le Mohlapetši

“Morena, ka mehla ke eme ke le tlhapetšong mosegare, gomme mašego ka moka ke lala ke emetše go hlapetša.”—JESAYA 21:8, PK.

1. Jehofa ke hlatse ka boyena dikholofetšong dife tše dikgolo?

JEHOFA ke Mophethi yo Mogolo wa Merero. Morongwa wa lerabele yo a ilego a fetoga Sathane Diabolo ga a kgone go dira gore morero wa Gagwe wa go kgethagatša leina la Gagwe ka noši le go hloma pušo ya Mmušo wa letago godimo ga lefase la paradeise o folotše. (Mateo 6:9, 10) Ka tlase ga pušo yeo, batho ba tla šegofatšwa e le ka kgonthe. Modimo “lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.” Batho ba thabilego le ba kopanego ba tla thabela khutšo le katlego ka mo go sa felego. (Jesaya 25:8; 65:17-25) Jehofa ke hlatse ka boyena ya dikholofetšo tše tše dikgolo!

2. Jehofa o tsošitše dihlatse dife tšeo e lego batho?

² Lega go le bjalo, Mmopi yo Mogolo gape o na le dihlatse tšeo e lego batho. Mehleng ya pele ga Bokriste “leru le lekaakao la dihlatse,” go thoma ka Abele, le ile la kitima lebelo la kgotlelelo gomme gantši le lebane le mathata a boima. Mehlala ya bona e mebotse e kgothatša Bakriste ba botegago lehono. Kriste Jesu ke mohlala o mobotse kudu wa hlatse e nago le sebete. (Ba-Hebere 11:1–12:2) Ka mohlala, gopola bohlatse bja gagwe bja makgaola-kgang bjo a ilego a bo nea ka pele ga Pontio Pilato. Jesu o ile a re: “Ké se ke se tswáletšwexo; ke tletše sôna lefaseng xore ke bê hlatse ya therešô.” (Johane 18:37) Go tloga ka 33 C.E. go fihla ngwageng wo wa 2000 C.E., Bakriste ba mafolofolo ba latetše mohlala wa Jesu gomme ba tšwetše pele ba nea bohlatse e bile ba bolela “matete a Modimo” ka sebete.—Ditiro 2:11.

Go Ikaga Dihlotswana ga Babele

3. Sathane o ile a ganetša bjang bohlatse bjo bo neilwego mabapi le Jehofa le thato ya gagwe?

³ Go theoša le nywaga-kete Lenaba le legolo, Sathane Diabolo, o ile a leka ka tsela e kgopo go hlompholla bohlatse bja dihlatse tša Modimo. Bjalo ka “rra-xo-moaketši,” ‘drakone ye e kgolo . . . , e lego noga ya kgale,’ e be e dutše ‘e aroša lefase ka moka.’ Ga se a ka a kgaotša ntweng ya gagwe malebana le bao “ba bolokago ditaelo tša Modimo,” kudu-kudu mehleng ye ya bofelo.—Johane 8:44; Kutollo 12:9, 17, PK.

4. Babele o Mogolo e tšweletše bjang?

⁴ Nywageng e ka bago 4 000 e fetilego, ka morago ga Meetse-fula a mehleng ya Noage, Sathane o ile a tsoša Nimirode, “motsomi yo bogale pele ga Jehofa.” (Genesi 10:9, 10, PK) Motse o mogolo-golo wa Nimirode e lego Babele, o ile wa fetoga lefelo la bodumedi bja botemona. Nakong ya ge Jehofa a be a raranya polelo ya baagi ba tora ya Babele, batho ba ile ba gašana lefaseng, gomme ba ile ba tloga le bodumedi bja bona bja maaka. Ka gona Babele e ile ya fetoga mothopo wa mmušo wa lefase ka bophara wa bodumedi bja maaka, wo o bitšwago Babele o Mogolo ka pukung ya Kutollo. Puku yeo e bolela e sa le pele ka phedišo ya tshepedišo ye ya kgale ya bodumedi.—Kutollo 17:5; 18:21.

Setšhaba sa Dihlatse

5. Jehofa o ile a rulaganya setšhaba sefe gore e be hlatse ya gagwe, eupša ke ka baka la’ng a ile a se dumelela gore se išwe bothopša?

⁵ Mo e ka bago lebaka la nywaga e 500 ka morago ga mehla ya Nimirode, Jehofa o ile a rulaganya ditlogolwana tša Aborahama yo a botegago a di dira setšhaba sa Isiraele gore se hlankele e le hlatse ya Gagwe mo lefaseng. (Jesaya 43:10, 12) Batho ba bantši ba setšhaba seo ba ile ba hlankela Jehofa ka potego e sa kwanantšhego. Lega go le bjalo, go theoša le nywaga-kgolo ditumelo tša maaka tša ditšhaba tša baagišani di ile tša šilafatša Isiraele,  gomme batho ba kgwerano ya Jehofa ba ile ba mo furalela ba ya borapeding bja medimo ya maaka. Ka baka leo, ka 607 B.C.E., madira a Babele, ao a bego a etelelwa pele ke Kgoši Nebukadinetsara, a ile a fediša Jerusalema le tempele ya yona gomme a iša bontši bja ba-Juda bothopša kua Babele.

6. Mohlapetši wa Jehofa wa boporofeta o ile a tsebatša ditaba dife tše di lokilego, gomme di ile tša phethagatšwa neng?

⁶ Yeo e ile ya ba phenyo e kgolo gakaakang ya borapedi bja maaka! Lega go le bjalo, go buša ga Babele e ile ya ba ga lebakanyana feela. Mo e ka bago nywaga e 200 pele ga tiragalo yeo, Jehofa o ile a laela gore: “Sepela O beê mohlapetši, a bolêlê se a se bônaxo.” Mohlapetši yo o ile a tsebatša ditaba dife? “O wile! O wile! Motse wa Babele; le diswanthšô tša medimo ya xôna ó di robaxanyeditše fase.” (Jesaya 21:6, 9) Ka kgonthe, ka 539 B.C.E. polelo ya boporofeta e ile ya phethagala. Babele e matla e ile ya wa gomme go se go ye kae batho ba kgwerano ya Modimo ba ile ba kgona go boela nageng ya gabo bona.

7. (a) Ba-Juda ba ile ba ithuta eng tayong ya Jehofa? (b) Ba-Juda ba ka morago ga bothopša ba ile ba wela mereong efe, gomme ka mafelelo afe?

⁷ Ba-Juda bao ba boilego ba be ba tloga ba ithutile gore ba tlogele borapedi bja medimo ya diswantšho le bja go dirišana le meoya. Lega go le bjalo, ge nywaga e dutše e e-ya, ba ile ba wela melabeng e mengwe. Ba bangwe ba ile ba tanywa ke filosofi ya Gerika. Ba bangwe ba ile ba thoma go gatelela metlwae ya batho go e na le go gatelela Lentšu la Modimo. Ba bangwe gape ba ile ba goketšwa ke moya wa botšhaba. (Mareka 7:13; Ditiro 5:37) Nakong ya ge Jesu a be a belegwa, setšhaba se be se boetše se furaletše borapedi bjo bo sekilego. Le ge ba-Juda ba ikemetšego ba ile ba arabela ditabeng tše di lokilego tše di bego di bolelwa ke Jesu, setšhaba ka moka se ile sa mo gana gomme ka go rialo sa lahlwa ke Modimo. (Johane 1:9-12; Ditiro 2:36) Isiraele e be e se sa hlwa e le hlatse ya Modimo, gomme ngwageng wa 70 C.E., Jerusalema le tempele ya yona di ile tša senywa gape gomme mo nakong ye di senywa ke madira a Roma.—Mateo 21:43.

8. Ke mang yo a ilego a fetoga hlatse ya Jehofa, gomme ke ka baka la’ng keletšo ya Paulo go hlatse ye e be e le nakong?

⁸ Ka nako e swanago, go ile gwa tswalwa Bakriste ba “Ba-Isiraele ba Modimo,” gomme ba ga bjale ba be ba hlankela e le hlatse ya Modimo ditšhabeng. (Ba-Galatia 6:16) Kapejana, Sathane o ile a loga maano a go šilafatša setšhaba se sefsa sa moya. Mafelelong a lekgolo la pele la nywaga, ditutuetšo tša go ikaga dihlotswana di ile tša bonagala ka diphuthegong. (Kutollo 2:6, 14, 20) Temošo ya Paulo e be e le nakong: “Le phafoxê xore xo se bê le a kaxo Le thopa ka mabohlale, ka xo Le fora ka mafêla, ka xo ya ka melawana ya batho, le ka dithutô tša mathômô a lexohle, è se xo ya le Kriste.”—Ba-Kolose 2:8.

9. Go fo etša ge Paulo a be a lemošitše, ke ditiragalo dife tšeo di ilego tša lebiša go beng gona ga Bojakane?

⁹ Mafelelong, filosofi ya Gerika, dikgopolo tša bodumedi tša Babele gomme ka morago gwa latela “mabohlale” ao a batho a bjalo ka thuto ya tlhagelelo le tsheka-tsheko e phagamego di ile tša šilafatša bodumedi bja ba bantši bao ba bego ba ipolela gore ke Bakriste. Go be go le bjalo ka ge Paulo a ile a bolela e sa le pele gore: “Ke tseba xore mohla kè sepetše, Le tlo tlêlwa ke diphiri tše di jaxo batho, tše di sa sétšexo mohlape. Le mo xo lena beng xo tlo tsoxa banna, ba ba tl’o xo bolêla ditaba tše šele, xore ba xôxê barutiwa ba tloxê le bôná.” (Ditiro 20:29, 30) Ka baka la bohlanogi bjo, Bojakane bo ile bja tšwelela.

10. Ke ditiragalo dife tše di ilego tša dira gore go bonagale gore ga se batho bohle bao ba bego ba ineetše borapeding bjo bo šilafetšego bjo bo dirišwago Bojakaneng?

 ¹⁰ Bao ba bego ba tloga ba ineetše borapeding bjo bo sekilego ba ile ba swanelwa ke go “hlabanêla tumêlô yé bakxêthwa ba e filwexo xa-tee ya ba moka.” (Juda 3) Na bohlatse bjo bo newago ka borapedi bjo bo sekilego le ka Jehofa bo be bo tla hwelela lefaseng? Aowa. Ge nako ya go fedišwa ga Sathane wa lerabele le mediro ya gagwe ka moka e dutše e batamela, go ile gwa bonagala gore ga se batho bohle bao ba ilego ba ineela borapeding bja bohlanogi bjo bo dirišwago Bojakaneng. Karolong ya mafelelo ya lekgolo la bo-19 la nywaga, kua Pittsburgh, Pennsylvania, U.S.A., go ile gwa rulaganywa sehlopha sa barutwana ba botegago ba Beibele gomme se ile sa fetoga motheo wa sehlopha sa mehleng yeno sa dihlatse tša Modimo. Bakriste ba ba ile ba lebiša tlhokomelo bohlatseng bja Mangwalo bja gore bofelo bja tshepedišo ya gona bjale ya lefase bo kgaufsi. Ka go dumelelana le boporofeta bja Beibele, “bofêlô” bja lefase le bo thomile ka 1914 gomme bo ile bja swawa ke go phulega ga ntwa ya pele ya lefase. (Mateo 24:3, 7) Go na le bohlatse bjo bo tiilego bja gore Sathane le madira a gagwe a batemona ba ile ba rakwa legodimong ka morago ga ngwaga woo. Lekgolo la bo-20 la nywaga leo le tletšego mathata le neile bohlatse bjo bo lego molaleng bja ditiro tša Sathane le bja phethagalo e kgolo ya pontšho ya go ba gona ga Jesu e le kgoši matleng a Mmušo wa legodimong.—Mateo, dikgaolo 24 le 25; Mareka, kgaolo 13; Luka, kgaolo 21; Kutollo 12:10, 12.

11. Sathane o ile a leka go dira eng, eupša maiteko a gagwe a ile a palelwa bjang?

¹¹ Ka June 1918, Sathane o ile a leka ka go lebanya go fediša barutwana bao ba Beibele, bao ka nako yeo ba bego ba šetše ba bolela dinageng tše dintšinyana. O ile a ba a leka le go fediša lekgotla la bona la molao, e lego Watch Tower Bible and Tract Society. Balaodi ba ikarabelago ba Mokgatlo ba ile ba golegwa, ba latofatšwa ka maaka a gore ba lwantšha mmušo, go etša ge Jesu le yena a ile a latofatšwa lekgolong la pele la nywaga. (Luka 23:2) Eupša ka 1919 balaodi ba ba ile ba lokollwa, e lego seo se ilego sa ba kgontšha gore ba tšwetše pele bodiredi bja bona. Ka morago ba ile ba lokollwa ka mo go feletšego.

“Mohlapetši” yo a Hlapeditšego

12. Ke bomang bao lehono ba bopago sehlopha sa Jehofa sa mohlapetši, gomme ba bile le boemo bja mohuta mang bja kgopolo?

¹² Ka gona, ge “lebaka la bofelo” le thoma, Jehofa o ile a dira gape gore mohlapetši a be gona, a lemoše batho ka ditiragalo tšeo di tswalanago le go phethagala ga merero ya Gagwe. (Daniele 12:4; 2 Timotheo 3:1) Go ba go fihla mehleng ye, sehlopha seo sa mohlapetši—Bakriste ba tloditšwego, ba-Isiraele ba Modimo—se be se dutše se dira dilo ka go dumelelana le tlhaloso ya Jesaya ya mohlapetši wa boporofeta: “A napa a hlwaya tsebe. A gohlola bjalo ka tau, a re: Morena, ka mehla ke eme ke le tlhapetšong mosegare, gomme mašego ka moka ke lala ke emetše go hlapetša.” (Jesaya 21:7, 8, PK) Yo ke mohlapetši yo a tšeelago mošomo wa gagwe godimo!

13. (a) Mohlapetši wa Jehofa o tsebaditše molaetša ofe? (b) Ke ka tsela efe go ka thwego Babele o Mogolo e wele?

¹³ Mohlapetši yo o bone’ng? Mo le gona, mohlapetši wa Jehofa, sehlopha sa dihlatse tša gagwe, o ile a tsebatša gore: “O wile! O wile! Motse wa Babele; le diswanthšô tša medimo ya xôna [Jehofa] ó di robaxanyeditše fase.” (Jesaya 21:9) Nakong ye, ka morago ga Ntwa ya I ya Lefase, Babele o Mogolo e lego mmušo wa lefase wa bodumedi bja maaka, ke yona e phuhlamišwago boemong bja yona bjo bo phagamego bja taolo. (Jeremia 50:1-3; Kutollo 14:8) Seo ga se makatše! Ntwa e Kgolo, bjalo ka ge e be e bitšwa bjalo ka nako yeo, e thomile Bojakaneng moo baruti ka mahlakoreng ka bobedi ba ilego ba butšwetša mollo ka go kgothaletša masogana a mabotse gore a ye ntweng. A mahlabiša dihlong a makaakang! Ka 1919, Babele o Mogolo ga se ya ka ya kgona go thibela Barutwana ba Beibele, bjalo ka ge Dihlatse tša Jehofa di be di tsebja bjalo ka nako yeo, go phonyokgeng boemong bja bona bja go se dire selo le go thomeng lesolo la lefase ka bophara la go nea bohlatse leo le sa dutšego le tšwela pele. (Mateo 24:14) Seo se ile sa nea sešupo sa go wa ga Babele o Mogolo, go fo swana le ge go lokollwa ga Isiraele lekgolong la botshelela la nywaga B.C.E. go ile gwa nea sešupo sa go wa ga Babele ya bogologolo.

14. Ke makasine ofe wo sehlopha sa mohlapetši wa Jehofa se o dirišitšego kudu, gomme Jehofa o šegofaditše bjang go dirišwa ga wona?

¹⁴ Sehlopha sa mohlapetši ka mehla se ile sa phetha modiro wa sona ka phišego le ka kganyogo e  matla ya go kganyoga go dira se se lokilego. Ka July 1879, Barutwana ba Beibele ba ile ba thoma go gatiša makasine wo, woo ka nako yeo o bego o tsebja e le Zion’s Watch Tower and Herald of Christ’s Presence. Tokollo e nngwe le e nngwe go tloga ka 1879 go fihla ka December 15, 1938, letlakaleng la yona la ka pele e be e e-na le mantšu a rego, “‘Hee Mohlapetši! Tša bošexo di re’ng?’—Jesaya 21:11.” * Morokami o ile wa dula o hlapeditše ditiragalo tša lefase le ditlhaloso tša tšona tša boporofeta ka potego ka lebaka la nywaga e 120. (2 Timotheo 3:1-5, 13) Sehlopha sa Modimo sa mohlapetši le bagwera ba sona ba “dinku tše dingwê” ba dirišitše makasine wo go tsebatša ka mafolofolo bathong gore go godišwa ga bogoši bja Jehofa ka Mmušo wa Kriste go batametše. (Johane 10:16) Na bohlatse bjo bo ile bja šegofatšwa ke Jehofa? Ee, go tloga ka tokollo ya mathomo ya dikopi tše 6 000 ka 1879, Morokami o goletše palong ya lefase ka bophara ya dikopi tše 22 000 000 ka maleme a 132—ao a 121 a ona a gatišwago sammaletee. Ke mo go swanetšego gakaakang gore makasine wa bodumedi wo o abjago ka bophara lefaseng e be wona o godišago leina la Modimo wa therešo, Jehofa!

Go Hlwekišwa mo go Tšwelago Pele

15. Ke go hlwekišwa gofe mo go tšwelago pele mo go thomilego gaešita le pele ga 1914?

¹⁵ Lebakeng la nywaga e ka bago 40 go ba go fihla nakong ya ge pušo ya Kriste ya legodimong e thoma ka 1914, Barutwana ba Beibele ba ile ba lokollwa dithutong tše dintši tša Bojakane tšeo e sego tša Beibele, tše bjalo ka go kolobetšwa ga masea, go se hwe ga moya wa motho, pakatori, tlhokofatšo ya mollong wa dihele le Modimo wa Boraro botee. Eupša go ile gwa tšea nako e oketšegilego go tloša dikgopolo ka moka tše di fošagetšego. Ka mohlala, nywageng ya bo-1920 Barutwana ba bantši ba Beibele ba be ba apara sepelete sa seswantšho se se nago le sefapano le mphapahlogo e bile ba be ba bina Keresemose le matšatši a mangwe a maikhutšo a boheitene. Lega go le bjalo, bakeng sa gore borapedi e be bjo bo sekilego, mašaledi ka moka a borapedi bja medimo ya diswantšho a swanetše go tlošwa. Lentšu la Modimo, Beibele e Kgethwa, le swanetše go ba motheo o nnoši wa tumelo ya Mokriste le tsela ya go phela. (Jesaya 8:19, 20; Ba-Roma 15:4) Go oketša goba go fokotša selo le ge e ka ba sefe Lentšung la Modimo go fošagetše.—Doiteronomio 4:2; Kutollo 22:18, 19.

16, 17. (a) Ke kgopolo efe e fošagetšego yeo sehlopha sa mohlapetši se ilego sa e kgomarela ka nywaga-some e mmalwa? (b) Tlhaloso e nepagetšego ya “aletare” le “kokwane” kua “Egipita” ke efe?

¹⁶ Mohlala o mongwe o tla gatelela kamoo molao wo wa motheo o lego bohlokwa ka gona. Ka 1886 ge C. T. Russell a be a gatiša puku e bitšwago The Divine Plan of the Ages, bolumo ye e be e na le tšhate yeo e kgokaganyago mehla ya batho le Great Pyramid of Egypt. Go be go naganwa gore segopotšo se sa Pharaoh Khufu e be e le lona lefsika la kgopotšo leo go bolelwago ka lona go Jesaya 19:19, 20, (PK): “Mohlang woo aletare ya Jehofa e tlo ba gona nageng ya Egipita, gomme lefsika la kgopotšo le tlo emišetšwa Jehofa mollwaneng wa yona. E tlo ba pontšho le bohlatse bjo bo bolelago Jehofa Tsebaothe nageng ya Egipita.” Ke kgokagano efe yeo phiramiti e bego e ka ba le yona le Beibele? Ee, e le mohlala, go be go thwe botelele bja dikarolo tše dingwe ka go Great Pyramid bo bontšha nako ya mathomo a ‘masetla-pelo a magolo’ a Mateo 24:21, ka ge go be go kwešišwa bjalo ka nako yeo. Barutwana ba bangwe ba Beibele ba ile ba nwelela kudu tabeng ya go ela dibopego tše di fapa-fapanego tša phiramiti e le go hlahloba ditaba tše bjalo ka letšatši leo ba tla bego ba e-ya legodimong ka lona!

 ¹⁷ Selo se se go thwego ke Bible in Stone se ile sa tšeelwa godimo kudu ka nywaga-some e mmalwa, go fihlela ge ditokollo tša Morokami (wa Seisemane) wa November 15 le wa December 1, 1928, di be di bea taba ka mo go kwagalago gore Jehofa o be a sa nyake monyumente wa lefsika wo o agilwego ke bo-farao ba baheitene le o nago le diswantšho tša botemona tša bolepi bja dinaledi go tiišetša bohlatse bjo bo neilwego ka Beibeleng. Go e na le moo, boporofeta bja Jesaya bo be bo lebelelwa bo šupa dilong tša moya. Bjalo ka ge go bonwa go Kutollo 11:8, “Egipita” e swantšhetša lefase la Sathane. “Aletare ya Morêna” e re gopotša ka dihlabelo tše di amogelegago tše di dirwago ke Bakriste ba tloditšwego ge ba sa dutše e le badudi ba nakwana lefaseng le. (Ba-Roma 12:1; Ba-Hebere 13:15, 16) Lefsika la kgopotšo le le lego ‘mollwaneng wa [Egipita]’ le šupa phuthego ya Bakriste ba tloditšwego, yeo e lego “kôkwanê le mothêô wa therešô” le yeo e emego e le bohlatse “Egipita,” e lego lefase leo ba tla tlogago ba le šia.—1 Timotheo 3:15.

18. (a) Jehofa o tšwetše pele bjang go hlalosetša barutwana ba Beibele ditaba ka tsela e kwagalago? (b) Ge e ba Mokriste a hwetša go le thata go kwešiša tlhaloso ya Mangwalo, ke boemo bofe bja kgopolo bjo e lego gabohlale go ba le bjona?

¹⁸ Ge nywaga e dutše e feta, Jehofa o tšwela pele go re nea tlhaloso e tšwelago pele ya therešo, go akaretša le kwešišo e kwagalago gabotse ya lentšu la gagwe la boporofeta. (Diema 4:18) Nywageng ya morago bjale, re ile ra kgothaletšwa gore re lebelele gape ka kwešišo e tseneletšego—gare ga dilo tše dingwe—moloko wo o ka se kego wa feta pele ga ge bofelo bo e-tla, seswantšho sa dinku le dipudi, makgapha le nako yeo a tlago go ema lefelong le lekgethwa ka yona, kgwerano e mpsha, go fetošwa lebopo le pono ya tempele ya puku ya Hesekiele. Ka dinako tše dingwe go ka ba thata go kwešiša ditlhaloso tše bjalo tše di lego nakong, eupša mabaka a gore di dirwe a a bonagala ka nako ya gona e swanetšego. Ge e ba Mokriste a sa kwešiše ka mo go feletšego tlhaloso e mpsha ya lengwalo, o dira gabotse gore ka boikokobetšo a bušeletše  mantšu a moporofeta Mika ao a rego: “Xe e le nna, ke lebeletše Morêna; ke dula kè letetše Modimo Mo-mphološi.”—Mika 7:7.

19. Mašaledi a tloditšwego le bagwera ba ona ba dinku tše dingwe ba ile ba bontšha bjang sebete se etšago sa tau mehleng ye ya bofelo?

¹⁹ Gopola gore mohlapetši o ile “a gohlola bjalo ka tau, a re: Morena, ka mehla ke eme ke le tlhapetšong mosegare, gomme mašego ka moka ke lala ke emetše go hlapetša.” (Jesaya 21:8, PK) Mašaledi a tloditšwego a bontšhitše sebete se etšago sa tau go pepentšheng bodumedi bja maaka le go bontšheng batho tsela e išago tokologong. (Kutollo 18:2-5) Bjalo ka “molaki e a bôtêxaxo yo bohlale,” ba neile Dibeibele, dimakasine le dipuku tše dingwe ka maleme a mantši kudu—“dijô ka lebaka la xôna.” (Mateo 24:45) Ba eteletše pele go kgoboketšeng “lešaba le legolo la . . . ba dithšaba ka moka, le meloko ka moka, le merafô ka moka, le maleme ka moka.” Ba le bona ba hlatswitšwe ka madi a lopollago a Jesu gomme ba ipontšha ba na le dipelo tša tau go neeleng Modimo “tirelo e kgethwa mosegare le bošego.” (Kutollo 7:9, 14, 15, bapiša le NW.) Ngwagola dienywa tša sehlopha se senyenyane se se phelago sa Dihlatse tša Jehofa tše tloditšwego gotee le bagwera ba sona ba lešaba le legolo e bile dife? Sehlogo sa rena se se latelago se tla re botša.

[Mongwalo wa ka tlase]

Na o a Gopola?

• Ke dihlatse dife tšeo Jehofa a ilego a di tsoša go theoša le nywaga?

• Babele o Mogolo e tšweletše bjang?

• Ke ka baka la’ng Jehofa a ile a dumelela gore Jerusalema, motse-mošate wa setšhaba sa gagwe sa dihlatse, e senywe ka 607 B.C.E.? le ka 70 C.E.?

• Sehlopha sa Jehofa sa mohlapetši le bagwera ba sona ba bontšhitše moya wa mohuta mang?

[Dipotšišo tša Thuto]

[Seswantšho go letlakala 7]

“Mong ’a bohle! Ke hlwa kè eme kè letile”

[Diswantšho go letlakala 10]

Ba sehlopha sa Jehofa sa mohlapetši ba tšeela mošomo wa bona godimo