“Magtiwala ka ki Jehova sa bilog mong puso, asin dai ka manarig sa sadiri mong pakasabot. Sa gabos mong lakad isipon mo siya, asin itatanos niya an saimong mga dalan.”—Talinhaga 3:5, 6, Bagong Kinaban na Traduksiyon.

 ‘Magtiwala ka sa KAGURANGNAN sa bilog mong puso, asin sa sadiri mong pakasabot dai magsandig. Sa gabos mong gawi midbidon mo siya, asin papatanuson niya an saimong mga agihan.’—Proverbio [Talinhaga] 3:5, 6, An Banal na Biblia (Paulines).

 Pag naggigibo kita nin mahahalagang desisyon, dapat na umasa kita sa Diyos na Jehova a para sa paggiya imbes na sa sadiri ta sana.

 “Magtiwala ka ki Jehova sa bilog mong puso.” Ipinapahiling niyato na nagtitiwala kita sa Diyos pag ginigibo ta an mga bagay-bagay kauyon kan mga pamamaagi niya. Dapat na lubos kitang magtiwala sa Diyos, sa bilog tang puso. Sa Bibliya, an puso sa parati nanunungod sa panglaog na pagkatawo, asin kaiba diyan an mga emosyon, motibasyon, kaisipan, saka sabuot nin saro. Kaya an pagtitiwala sa Diyos sa bilog tang puso bako lang basta pagmati. Pinipili niyatong gibuhon iyan huling lubos kitang kumbinsido na aram kan satong Kaglalang kun ano an pinakamarahay para sa sato.—Roma 12:1.

 “Dai ka manarig sa sadiri mong pakasabot.” Kaipuhan tang magtiwala sa Diyos huling bakong masasarigan an satong bakong perpektong pangangatanusan. Kun mananarig lang kita sa satong sadiri o kun tutugutan niyatong an emosyon an magdikta sa sato, tibaad makagibo kita nin mga desisyon na garo baga marahay man sa inot pero may maraot palan na mga resulta. (Talinhaga 14:12; Jeremias 17:9) An kadunungan nin Diyos nakakalabi nanggad kisa kan sa sato. (Isaias 55:8, 9) Pag nagpapagiya kita sa kaisipan niya, magigin mapanggana an buhay ta.—Salmo 1:1-3; Talinhaga 2:6-9; 16:20.

 “Sa gabos mong lakad isipon mo siya.” Dapat niyatong aramon an kaisipan nin Diyos sa lambang mahalagang aspekto kan satong buhay asin sa lambang importanteng desisyon na ginigibo ta. Maaaraman ta iyan paagi sa pagpamibi sa saiya para sa paggiya asin pagsunod sa kun ano an sinasabi niya sa saiyang Tataramon, an Bibliya.—Salmo 25:4; 2 Timoteo 3:16, 17.

 “Itatanos niya an saimong mga dalan.” Itinatanos nin Diyos an satong dalan paagi sa pagtabang sa sato na mamuhay kauyon kan saiyang matanos na mga pamantayan. (Talinhaga 11:5) Kaya nakakalikay kita sa nagkapirang problema saka nagigin mas maugma nanggad an buhay ta.—Salmo 19:7, 8; Isaias 48:17, 18.

 Mababasa sa libro kan Bibliya na Talinhaga an panginot na mga prinsipyo para magkaigwa nin maugmang buhay na nakakapaugma sa Diyos. An pagkasurat kan inot na siyam na kapitulo arog sa pagsadol nin sarong ama sa saiyang namumutan na aki. Idinuduon kan kapitulo 3 an mga pakinabang na nakakamtan kan mga nagpapahalaga asin nagsasabuhay sa kadunungan kan satong Kaglalang.—Talinhaga 3:13-26.