Pagmidbid ki Jesus—An Saro na Orog Kisa ki David Asin ki Salomon

“Uya! an saro na labi pa kisa ki Salomon yaon digdi.”—MAT. 12:42.

1, 2. Sa pagmansay nin tawo, taano ta makangangalas na pinagbotan si Samuel na lahidan si David bilang hade?

MAYO sa itsura nia an pagigin hade. Imbes, para ki propeta Samuel, sia ordinaryo sanang solteritong pastor. Dugang pa, an ginikanan niang banwaan, an Betlehem, bakong gayong midbid. Iyan ilinadawan na “sadangoton sa tahaw kan rinibo nin Juda.” (Miq. 5:2) Minsan siring, an minalataw na ordinaryo sanang hoben na lalaking ini na hale sa sadit na banwaan madali nang lahidan ni propeta Samuel bilang an magigin hade nin Israel.

² An hoben na si David bako an enot na aki na iprinesentar kan saiyang ama na si Jese tanganing lahidan ni Samuel; bako man sia an ikaduwa o ikatolo. Si David, na kangudhan sa walong aking lalaki ni Jese, mayo ngani kan mag-abot si Samuel sa harong ni Jese tanganing lahidan an saro sa mga aki kan maimbod na tawong iyan bilang an sunod  na hade nin Israel. Alagad si David an pinili ni Jehova, asin iyan an mahalaga.—1 Sam. 16:1-10.

3. (a) Ano an minamansay ni Jehova na pinakamahalaga kun sinisiyasat nia an sarong indibiduwal? (b) Kan lahidan si David, ano an nagpoon na maghiro sa saiya?

³ Naheling ni Jehova an dai naheheling ni Samuel. Aram nin Dios an kamugtakan kan puso ni David, asin iyan nakakapaogma sa saiya. Para sa Dios, bako nanggad an pangluwas na itsura an mahalaga, kundi kun ano talaga an panglaog na pagkatawo nin saro.(Basahon an 1 Samuel 16:7.) Kaya kan maaraman ni Samuel na dai pinili ni Jehova an arin man sa pitong matuang aki ni Jese, ipinaapod nia an kangudhan hale sa pasabsaban. An pagkasaysay nagsasabi: “Huli kaiyan nagsugo [si Jese] asin pinaduman [si David]. Mamulamula an saiyang kutis, sarong hoben na lalaki na magayon an mata asin guapo. Dangan si Jehova nagsabi: ‘Tindog, lahidan mo sia, huli ta iyo na sia!’ Huli kaiyan kinua ni Samuel an sungay na lalagan nin lana asin linahidan sia sa tahaw kan saiyang mga tugang na lalaki. Asin an espiritu ni Jehova nagpoon na maghiro ki David poon kan aldaw na idto.”—1 Sam. 16:12, 13.

Si David Patienot na Nagrepresentar ki Cristo

4, 5. (a) Iladawan an nagkapirang pagkakaagid ni David asin ni Jesus. (b) Taano ta si Jesus puedeng apodon na an Saro na Orog Kisa ki David?

⁴ Arog ni David, si Jesus namundag sa Betlehem, mga 1,100 na taon pagkamundag ki David. Sa pagheling nin dakol, mayo man sa itsura ni Jesus an pagigin hade. An boot sabihon, bako sia an klase nin hade na linalaoman nin dakol sa Israel. Pero, arog ni David, sia an pinili ni Jehova. Arog ni David, sia namomotan ni Jehova. * (Luc. 3:22) Sa kamugtakan man ni Jesus, ‘an espiritu ni Jehova nagpoon na maghiro sa saiya.’

⁵ Dakol pa an pagkakaagid nindang duwa. Halimbawa, si David trinaydoran kan saiyang parahatol na si Ahitofel, asin si Jesus trinaydoran kan saiyang apostol na si Judas Iscariote. (Sal. 41:9; Juan 13:18) Si David asin si Jesus parehong igwa nin naglalaad na kaigotan para sa lugar nin pagsamba ki Jehova. (Sal. 27:4; 69:9; Juan 2:17) Si Jesus paramana man ni David. Bago mamundag si Jesus, sarong anghel an nagsabi sa ina nia: “Itatao sa saiya ni Jehova Dios an trono ni David na saiyang ama.” (Luc. 1:32; Mat. 1:1) Minsan siring, huling an gabos na panuga dapit sa Mesiyas maootob ki Jesus, sia nakakalabi nanggad kisa ki David. Sia an Saro na Orog Kisa ki David, an haloy nang linalaoman na Mesiyanikong Hade.—Juan 7:42.

Sunodon an Pastor Asin Hade

6. Sa anong mga paagi na si David nagin marahay na pastor?

⁶ Si Jesus pastor man. Ano an mga karakteristiko nin marahay na pastor? Sia saro na maimbod asin makosog an boot na nag-aataman, nagpapakakan, saka nagbabantay sa aripompon nia. (Sal. 23:2-4) Kan hoben pa si David, sia sarong pastor, asin inasikaso niang marhay an mga karnero kan ama nia. Makosog an boot nia kan mameligro an aripompon asin isinapeligro nia an saiyang buhay tanganing protehiran sa leon asin sa oso an mga karnero.—1 Sam. 17:34, 35.

7. (a) Ano an nag-andam ki David para sa mga katongdan nia bilang hade? (b) Paano si Jesus nagin an Marahay na Pastor?

⁷ An mga taon na ginamit ni David sa kalangtadan asin mga bulod sa pag-ataman sa mga karnero an nag-andam sa saiya para sa depisil na mga katongdan asin paninimbagan na pagpastor sa nasyon nin Israel. * (Sal. 78:70, 71) Si Jesus man nagin arogan na pastor. Sia pinapakosog asin ginigiyahan ni Jehova mantang pinapastoran nia an saiyang “sadangoton na aripompon” asin an “ibang mga karnero.” (Luc. 12:32; Juan 10:16) Sa siring, si Jesus an Marahay na Pastor. Midbid niang marhay an saiyang aripompon kaya inaapod nia sa ngaran an lambang karnero. Namomotan niang gayo an mga karnero nia, kaya kan sia nasa daga pa, sia gikan sa boot na nagsakripisyo para sa ikakarahay ninda. (Juan 10:3, 11, 14, 15) Bilang an Marahay na Pastor, ginigibo ni Jesus an sarong bagay na nungkang magigibo ni David. An saiyang atang na pantubos  nagbukas nin dalan tanganing iligtas an katawohan sa kagadanan. Mayo nin makakaolang sa saiya sa pagpastor sa saiyang “sadangoton na aripompon” pasiring sa imortal na buhay sa langit asin sa paggiya sa saiyang “ibang mga karnero” pasiring sa buhay na daing katapusan sa matanos na bagong kinaban, na mayo nang mga naniniba na siring sa lobo.—Basahon an Juan 10:27-29.

Sunodon an Nandadaog na Hade

8. Paano si David nagin nandadaog na hade?

⁸ Bilang hade, si David daing takot na parapakilaban na prinotehiran an daga kan banwaan nin Dios, asin “padagos na iliniligtas ni Jehova si David saen man sia magduman.” Sa pamomoon ni David, an mga linderos kan nasyon huminiwas poon sa salog nin Egipto sagkod sa salog nin Eufrates. (2 Sam. 8:1-14) Paagi sa kosog ni Jehova, sia nagin makapangyarihan na namamahala. An Biblia nagsasabi: “An kabantogan ni David nagpoon na makaabot sa gabos na kadagaan, asin ginibo ni Jehova mismo na matakot sa saiya an gabos na nasyon.”—1 Cron. 14:17.

9. Ipaliwanag kun paano nandaog si Jesus bilang Nombradong Magin Hade.

⁹ Arog ni Hadeng David, an tawong si Jesus daing takot. Bilang Nombradong Magin Hade, ipinaheling nia an autoridad nia sa mga demonyo, na pinapatalingkas an mga biktima sa kapangyarihan ninda. (Mar. 5:2, 6-13; Luc. 4:36) Dawa an pangenot na kaiwal, si Satanas na Diablo, mayo nin kapangyarihan sa saiya. Paagi sa suporta ni Jehova, nadaog ni Jesus an kinaban, na nasa kapangyarihan ni Satanas.—Juan 14:30; 16:33; 1 Juan 5:19.

10, 11. Ano an papel ni Jesus bilang Parapakilaban na Hade sa kalangitan?

¹⁰ Mga 60 taon pagkagadan asin pagkabuhay liwat ni Jesus pasiring sa langit, si apostol Juan nag-ako nin makahulang bisyon dapit ki Jesus sa Saiyang papel bilang Parapakilaban na Hade sa kalangitan. Si Juan nagsurat: “Uya! . . . sarong kabayong puti; asin an nakakabayo dian igwa nin busog; asin sarong korona an itinao sa saiya, asin sia nagluwas na nandadaog asin tanganing taposon an saiyang pandadaog.” (Kap. 6:2) An nakasakay sa puting kabayo iyo si Jesus. “Sarong korona an itinao sa saiya” kan 1914 kan sia patukawon sa trono bilang Hade sa langitnon na Kahadean. Pakatapos kaiyan, “sia nagluwas na nandadaog.” Iyo, arog ni David, si Jesus nandadaog na hade. Dai nahaloy pakapatukawa sa saiya bilang Hade kan Kahadean nin Dios, nadaog nia sa ralaban si Satanas asin iinapon sia saka an mga demonyo nia sa daga. (Kap. 12:7-9) Magpapadagos an saiyang mapangganang pangangabayo sagkod na ‘matapos nia an saiyang pandadaog,’ na biyong lalaglagon an maraot na sistema ni Satanas.—Basahon an Kapahayagan 19:11, 19-21.

¹¹ Pero, arog ni David, si Jesus mapagmalasakit na hade, asin poprotehiran nia sa Armagedon an “dakulang kadaklan.” (Kap. 7:9, 14) Apuera kaini, sa pamamahala ni Jesus asin kan binuhay liwat na 144,000 na saiyang kairibang paramana, magkakaigwa “nin pagkabuhay liwat an mga matanos sagkod an mga bakong matanos.” (Gibo 24:15) An mga bubuhayon liwat sa daga magkakaigwa nin oportunidad na mabuhay sagkod lamang. Makangangalas nanggad na ngapit an naghahalat sa sainda! Logod na kita gabos magin determinado na padagos na ‘gibohon an marahay,’ tanganing kita magin presente kun an daga mapano na nin matanos asin maogmang mga sakop kan Saro na Orog Kisa ki David.—Sal. 37:27-29.

Sinimbag an Pamibi ni Salomon na Magkaigwa nin Kadonongan

12. Ano an hinagad ni Salomon sa pamibi?

¹² An aki ni David na si Salomon patienot man na nagrepresentar ki Jesus. * Kan si Salomon magin hade, si Jehova nagpaheling sa saiya sa sarong pangatorogan asin nagsabi na itatao Nia sa saiya an ano man na hagadon nia. Puede kutanang naghagad si Salomon nin orog na kayamanan, kapangyarihan, o mas halawig na buhay. Imbes, sia daing kaimotan na naghagad ki Jehova: “Tawe ako ngonyan nin kadonongan asin kaaraman tanganing ako makaluwas sa atubangan kan banwaan na ini asin tanganing ako makalaog, huli ta siisay an makakahokom sa dakulang banwaan mong ini?” (2 Cron. 1:7-10) Sinimbag ni Jehova an pamibi ni Salomon.—Basahon an 2 Cronica 1:11, 12.

13. Paanong dai napantayan an kadonongan ni Salomon, asin siisay an Gikanan kaiyan?

¹³ Sagkod na si Salomon maimbod ki Jehova, an  saiyang mga tataramon nin kadonongan dai napantayan kan mga tawong nabuhay kan panahon nia. Si Salomon nagtaram nin “tolong ribong talinhaga.” (1 Ha. 4:30, 32, 34) Dakol sa mga ini an isinurat asin pinapahalagahan pa man giraray kan mga naghahanap nin kadonongan. An reyna nin Seba nagbiahe nin mga 2,400 na kilometro tanganing baloon an kadonongan ni Salomon paagi sa “depisil na mga hapot.” Sia naghanga sa mga sinabi ni Salomon asin sa prosperidad kan kahadean nia. (1 Ha. 10:1-9) Sinasabi kan Biblia kun siisay an Gikanan kan kadonongan ni Salomon paagi sa pagsabing: “An gabos na tawo sa daga naghihimuyawot na makaatubang si Salomon tanganing madangog an saiyang kadonongan na ibinugtak nin Dios sa saiyang puso.”—1 Ha. 10:24.

Sunodon an Madonong na Hade

14. Sa anong mga paagi na si Jesus “an saro na labi pa kisa ki Salomon”?

¹⁴ Saro sanang tawo an malinaw nanggad na nakalabi sa kadonongan ni Salomon. Iyan iyo si Jesu-Cristo, na ilinadawan an sadiri nia na “an saro na labi pa kisa ki Salomon.” (Mat. 12:42) Nagtaram si Jesus kan “mga tataramon nin buhay na daing katapusan.” (Juan 6:68) Halimbawa, an Sermon sa Bukid nagtao nin orog na detalye dapit sa mga prinsipyo na yaon sa nagkapira sa mga talinhaga ni Salomon. Ilinadawan ni Salomon an dakol na bagay na nagtatao nin kaogmahan sa sarong nagsasamba ki Jehova. (Tal. 3:13; 8:32, 33; 14:21; 16:20) Idinoon ni Jesus na an tunay na kaogmahan naggigikan sa mga bagay na may koneksion sa pagsamba ki Jehova asin sa kaotoban kan mga panuga nin Dios. Sia nagsabi: “Maogma an mga nakakamate kan saindang espirituwal na pangangaipo, huli ta sainda an kahadean kan kalangitan.” (Mat. 5:3) An mga nag-aaplikar kan mga prinsipyo na yaon sa mga katokdoan ni Jesus mas minadayupot ki Jehova, “an burabod nin buhay.” (Sal. 36:9; Tal. 22:11; Mat. 5:8) Irinerepresentar ni Cristo “an kadonongan nin Dios.” (1 Cor. 1:24, 30) Bilang an Mesiyanikong Hade, si Jesu-Cristo igwa kan “espiritu nin kadonongan.”—Isa. 11:2.

15. Paano kita makikinabang sa diosnon na kadonongan?

¹⁵ Bilang mga parasunod kan Saro na Orog Kisa ki Salomon, paano kita makikinabang sa diosnon na kadonongan? Huling an kadonongan ni Jehova ihinahayag sa Tataramon nia, dapat kitang maghingoa na makua iyan paagi sa maingat na pag-adal sa Biblia, nangorogna sa nakarekord na mga tataramon ni Jesus, asin paagi sa paghorophorop sa binasa niato. (Tal. 2:1-5) Dugang pa, kaipuhan kitang magmaigot na humagad sa Dios nin kadonongan. Sinisierto sa sato kan Tataramon nin Dios na sisimbagon an sinserong mga pamibi niato na logod tabangan kita. (Sant. 1:5) Paagi sa tabang kan banal na espiritu, makukua niato an mahalagang marhay na kadonongan sa Tataramon nin Dios na makakatabang sa sato na atubangon an mga problema asin na gumibo nin madonong na mga desisyon. (Luc. 11:13) Si Salomon inapod man na “an paratipon” na “padagos na nagtokdo sa banwaan nin kaaraman.” (Ecl. 12:9, 10) Bilang Payo kan Kristianong kongregasyon, si Jesus paratipon man kan banwaan nia. (Juan 10:16; Col. 1:18) Kun siring, marahay na kita mag-atender sa mga pagtiripon kan kongregasyon, na dian kita ‘padagos na tinotokdoan.’

16. Ano an pagkakaagid ni Salomon asin ni Jesus?

¹⁶ Dakolon an ginibo ni Hadeng Salomon. Nag-organisar sia nin proyekto sa pagtogdok sa bilog na nasyon, na pinamamahalaan an pagtogdok nin mga palasyo, tinampo, sistema sa tubig, siudad bilang bodega, siudad para sa mga karuwahe, asin siudad para sa mga parakabayo. (1 Ha. 9:17-19) An bilog na kahadean nakinabang sa mga itinogdok nia. Si Jesus paratogdok man. Itinogdok nia sa ibabaw kan ‘dakulang gapo’ an saiyang kongregasyon. (Mat. 16:18) Pamamahalaan man nia an pagtogdok na gigibohon sa bagong kinaban.—Isa. 65:21, 22.

 Sunodon an Hade nin Katoninongan

17. (a) Ano an pambihirang karakteristiko kan pamamahala ni Salomon? (b) Ano an dai nagibo ni Salomon?

¹⁷ An ngaran na Salomon naggikan sa orihinal na termino na nangangahulogan na “katoninongan.” Si Hadeng Salomon namahala hale sa Jerusalem, na an ngaran na iyan nangangahulogan na “Pagkaigwa nin Dobleng Katoninongan.” An 40 taon na pamamahala nia nagin bantog huli sa daing kaagid na katoninongan sa nasyon nin Israel. An Biblia nagsasabi mapadapit sa mga taon na iyan: “An Juda asin Israel padagos na nag-erok na may seguridad, an lambang saro sa sirong kan saiyang ubasan asin sa sirong kan saiyang higera, poon sa Dan sagkod sa Beer-seba, sa gabos na aldaw ni Salomon.” (1 Ha. 4:25) Sa ibong kaiyan, dawa paagi sa gabos na kadonongan ni Salomon, an mga sakop nia dai nia nahimong patalingkason sa mga gapos nin helang, kasalan, asin kagadanan. Pero, kun dapit sa Saro na Orog Kisa ki Salomon, papatalingkason nia an saiyang mga sakop sa gabos na iyan.—Basahon an Roma 8:19-21.

18. Sa Kristianong kongregasyon, anong mga kamugtakan an naeeksperyensiahan niato?

¹⁸ Dawa ngonyan sa Kristianong kongregasyon, may katoninongan kita. Sa katunayan, naeeksperyensiahan niato an tunay na espirituwal na paraiso. May pakipagkatoninongan kita sa Dios asin sa kapwa niato. Mangnohon an ihinula ni Isaias manongod sa mga kamugtakan na naeeksperyensiahan niato ngonyan: “Pupulpogon ninda an saindang mga espada na magin mga tarom nin arado asin an saindang mga budyak na magin mga kagot na pantakras. An nasyon dai mabingat nin espada tumang sa nasyon, ni mag-aadal pa man sinda nin pakikiguerra.” (Isa. 2:3, 4) Paagi sa paghiro kaoyon kan espiritu nin Dios, nakakatabang kita sa kagayonan kan espirituwal na paraiso.

19, 20. Ano an mga dahelan niato na maggayagaya?

¹⁹ Minsan siring, magigin mas marahay pa ngani an ngapit. Mantang naeeksperyensiahan kan makinuyog na mga tawo an daing kaagid na katoninongan sa pamamahala ni Jesus, sinda luway-luway na “papatalingkason sa pagkaoripon sa kalapaan” sagkod na maabot ninda an pagkasangkap bilang tawo. (Roma 8:21) Pakatapos na sinda makapasar sa pangultimong pagbalo sa katapusan kan Sangribong Taon na Paghade, “an mga mahoyo mismo makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan.” (Sal. 37:11; Kap. 20:7-10) Tunay nanggad na malalabihan kan pamamahala ni Cristo Jesus an pamamahala ni Salomon sa mga paagi na dai niato maiimahinar!

²⁰ Kun paanong an Israel naggayagaya sa pangangataman ni Moises, David, asin Salomon, kita man orog pa nganing maggagayagaya sa pamamahala ni Cristo. (1 Ha. 8:66) An gabos na pasasalamat para ki Jehova sana huling isinugo nia sa sato an saiyang bugtong na Aki—an Saro na Orog Kisa ki Moises, David, asin Salomon!

[Mga Nota sa Ibaba]

Ikakapaliwanag daw Nindo?

• Paanong si Jesus an Saro na Orog Kisa ki David?

• Paanong si Jesus an Saro na Orog Kisa ki Salomon?

• Ano an pinapahalagahan nindo manongod sa Saro na Orog Kisa ki David, na iyo man an Saro na Orog Kisa ki Salomon?

[Mga Hapot Para sa Pag-adal]

[Ritrato sa pahina 31]

An itinao nin Dios na kadonongan ni Salomon patienot na nagrepresentar sa kadonongan kan Saro na Orog Kisa ki Salomon

[Ritrato sa pahina 32]

Malalabihan kan pamamahala ni Jesus an pamamahala ni Salomon asin ni David sa mga paagi na dai pa niato maiimahinar!