Akoon an Autoridad ni Jehova

“Ini iyo an boot sabihon kan pagkamoot sa Dios, na kuyogon niato an saiyang mga togon; alagad ta an saiyang mga togon dai nakakapagabat.”​—1 JUAN 5:3.

1, 2. (a) Taano ta dakol ngonyan an habong magpasakop sa autoridad? (b) Talaga daw na independiente an mga habong magpasakop sa autoridad nin iba? Ipaliwanag.

DAKOL ngonyan an negatibo an saboot kun nadadangog ninda an terminong “autoridad.” Dakol an habong magpasakop sa gusto nin iba. An mga tawo na habong magpasakop sa autoridad nin iba nagsasabi na “mayo nin siisay man na maninigong magsabi sa sako kun ano an dapat kong gibohon.” Pero, talaga daw na independiente an mga tawong ini? Bako nanggad! An kadaklan sa sainda nagsusunod sana sa mga pamantayan kan dai mabilang na iba pa na ‘nagpamolde sa sistemang ini nin mga bagay.’ (Roma 12:2) Imbes na magin independiente, sinda “mga oripon nin kalapaan,” bilang pagkotar sa mga tataramon kan Kristianong si apostol Pedro. (2 Ped. 2:19) Sinda naglalakaw “segun sa sistema nin mga bagay kan kinaban na ini, segun sa namamahala sa autoridad kan aire,” si Satanas na Diablo.​—Efe. 2:2.

² Sarong autor an naghambog: “Dai ko tinotogotan an sakong mga magurang o an sarong padi o ministro sa relihion o guru o an Biblia na iyo an magdesisyon kun ano an tama para sa sako.” Totoo, tibaad abusohon nin nagkapira an saindang autoridad asin tibaad bako sindang maninigo sa pagkuyog niato. Alagad solusyon daw an biyong pagsayuma sa ano man na pangangaipo para sa pagdirehir? An pagheling sana sa pangenot na mga bareta sa peryodiko nagtatao nin mamondo nanggad na simbag. Makamomondo nanggad na sa panahon na kaipuhan na marhay kan mga tawo an paggiya, an kadaklan ngonyan mas habo nang akoon iyan.

An Satong Pagmansay sa Autoridad

3. Paano ipinaheling kan enot na siglong mga Kristiano na dai sinda basta na sana nagpasakop sa autoridad nin tawo?

³ Bilang mga Kristiano, an satong paninindogan laen sa paninindogan kan kinaban. Dai iyan nangangahulogan na basta na sana niato ginigibo an ano man na sabihon sa sato. Sa kabaliktaran, kun beses kaipuhan kitang magsayuma na magpasakop  sa gusto nin iba dawa kun sinda may mga katongdan nin autoridad. Totoo man ini sa enot na siglong mga Kristiano. Halimbawa, kan an mga apostol pagbotan na umontok sa paghuhulit, dai ninda sinunod an halangkaw na saserdote asin an iba pang may autoridad na kabilang sa Sanhedrin. Dai ninda liningawan an tamang paggawe tangani sanang magpasakop sa autoridad nin tawo.​—Basahon an Gibo 5:27-29.

4. Anong mga halimbawa sa Hebreong Kasuratan an nagpapaheling na dakol sa banwaan nin Dios an nagsunod sa klase nin pamumuhay na hinahaboan nin dakol?

⁴ Kadakol na lingkod nin Dios kaidtong mga panahon bago kan mga Kristiano an guminawe na may kaparehong determinasyon. Halimbawa, si Moises “nagsayuma na apodon na aki kan aking babae ni Faraon, na pinagmarahay pa na maapi kaibanan kan banwaan nin Dios,” minsan ngani an paggibo kaiyan nagresulta sa “kaanggotan kan hade.” (Heb. 11:24, 25, 27) Linabanan ni Jose an pang-aakit kan agom ni Potifar, na may kapangyarihan na magbalos asin magpahamak sa saiya. (Gen. 39:7-9) “Nagdesisyon si Daniel sa saiyang puso na dai nia didigtaan an saiyang sadiri kan mga piling kakanon kan hade,” minsan ngani an paninindogan nia sa bagay na iyan bakong pasil na akoon kan mayor na opisyal sa korte kan Babilonya. (Dan. 1:8-14) Ipinapaheling kan siring na mga halimbawa sa kasaysayan na an banwaan nin Dios marigon na nanindogan sa kun ano an tama, ano man an magin resulta kaiyan. Dai sinda nagpadara sa mga tawo tangani sanang paoyonan an mga ini; ni na maninigo man kitang magpadara sa sainda.

5. Paano an pagmansay niato sa autoridad laen sa pagmansay kan kinaban?

⁵ An satong mapusong paninindogan dai puedeng ipareho sa pagigin matagas sana an payo; ni arog man kita sa nagkapira na nagrerebelde tangani sanang ipaheling na dai sinda oyon sa politikal na sistema. Imbes, determinado kita na akoon an autoridad ni Jehova kisa sa autoridad nin siisay man na tawo. Kun an ley nin tawo kontra sa ley nin Dios, bakong depisil na magdesisyon kun ano an gigibohon niato. Kapareho kan mga apostol kan enot na siglo, kinukuyog niato an Dios bilang namamahala imbes na mga tawo.

6. Taano ta pirmeng pinakamarahay na kuyogon an mga pagboot ni Jehova?

⁶ Ano an nakakatabang sa sato na akoon an autoridad nin Dios? Minaoyon kita sa sinasabi sa Talinhaga 3:5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Nagtitiwala kita na ano man an hinahagad sa sato nin Dios mataong pakinabang sa sato pag-abot nin panahon. (Basahon an Deuteronomio 10:12, 13.) Sa katunayan, ilinadawan ni Jehova an saiyang sadiri sa mga Israelita bilang “an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” Dangan sinabi pa nia: “O kun ika sana kutana totoong matao nin atension sa sakong mga togon! Dangan an saimong katoninongan magigin siring nanggad sa salog, asin an saimong katanosan siring sa mga alon kan dagat.” (Isa. 48:17, 18) Nagtitiwala kita sa mga tataramon na iyan. Kombensido kita na an pagkuyog sa mga pagboot nin Dios pirmeng para sa pinakaikakarahay niato.

7. Ano an maninigo niatong gibohon kun dai niato lubos na nasasabotan an sarong pagboot na sinabi sa Tataramon nin Dios?

⁷ Inaako niato an autoridad ni Jehova asin kinukuyog sia dawa kun dai niato lubos na nasasabotan an dahelan nin sarong kahagadan na sinasabi sa saiyang Tataramon. Ini bakong pagigin madaling mapaniwala kundi iyan pagtitiwala. Ipinapabanaag kaiyan an odok sa pusong pagsarig na aram ni Jehova kun ano an marahay para sa sato. An satong pagkuyog kapahayagan man kan satong pagkamoot, huli ta si apostol Juan nagsurat: “Ini iyo an boot sabihon kan pagkamoot sa Dios, na kuyogon niato an saiyang mga togon.” (1 Juan 5:3) Alagad igwa nin saro pang aspekto kan satong pagkuyog na maninigong dai niato lingawan.

Pagpatuod sa Satong Kakayahan sa Pagrisa

8. Paano an pagigin ‘napatuod niato sa kakayahan sa pagrisa’ konektado sa pag-ako sa autoridad ni Jehova?

⁸ Sinasabi sa sato kan Biblia na maninigo niatong ‘patuodon an satong kakayahan sa pagrisa na mamidbid an tama sagkod an sala.’ (Heb. 5:14) Huli kaini, an pasohan niato bako na kuyogon an mga ley nin Dios na garo mayo sa boot; imbes, gusto niato na “mamidbid an tama sagkod an sala” basado sa mga pamantayan ni Jehova. Gusto niatong masabotan an kadonongan kan mga dalan ni  Jehova, tanganing makapagsabi kita siring kan salmista: “An saimong ley nasa kairaroman kan sakong nasa laog na mga kabtang.”​—Sal. 40:8.

9. Paano niato ikakaoyon an satong konsensia sa mga pamantayan ni Jehova, asin taano ta mahalaga na gibohon niato iyan?

⁹ Tanganing maapresyar an mga ley nin Dios siring kan salmista, kaipuhan niatong horophoropon an satong binabasa sa Biblia. Halimbawa, kun pinag-aadalan niato an manongod sa sarong kahagadan ni Jehova, puede kitang maghapot: ‘Taano ta madonong an pagboot o prinsipyong ini? Taano ta para sa pinakaikakarahay ko an pagkuyog? Anong maraot na mga resulta an nangyari sa mga dai nag-intindi sa hatol nin Dios sa bagay na ini?’ Sa siring, kun an satong konsensia kaoyon kan mga dalan ni Jehova, mas posibleng marhay na makagibo kita nin mga desisyon na kaoyon kan saiyang kabotan. Magigibo niato na “padagos na saboton kun ano an kabotan ni Jehova” dangan padagos na sunodon an dalan nin pagigin makinuyog. (Efe. 5:17) Ini bakong pirmeng pasil.

Hinihingoa ni Satanas na Paluyahon an Autoridad nin Dios

10. Ano an sarong paagi na hinihingoa ni Satanas na paluyahon an autoridad nin Dios?

¹⁰ Haloy nang hinihingoa ni Satanas na paluyahon an autoridad nin Dios. An saiyang independienteng espiritu maririsa sa dakol na paagi. Kuanon niatong halimbawa an kadaihan nin paggalang sa institusyon nin Dios na pag-agoman. An nagkapira nag-iibanan na bakong kasal, mantang an iba naghahanap nin paagi tanganing makatalingkas sa saindang agom. An mga naggigibo kan arin man dian tibaad umoyon sa sinabi kan sarong bantog na aktres: “An monogamiya imposible sa mga lalaki sagkod babae.” Sinabi pa nia: “Mayo akong midbid na maimbod o gustong magin maimbod.” Hinohorophorop an saiya mismong nasudyang mga relasyon, nagsabi man an sarong bantog na aktor: “Dai ko segurado kun talagang naturalesa na niato na magkaigwa nin saro sanang agom sa bilog niatong buhay.” Marahay na hapoton niato an satong sadiri, ‘Inaako ko daw an autoridad ni Jehova manongod sa pag-agom, o apektado daw ako kan kaisipan kan kinaban na bakong permanente an pag-agom?’

11, 12. (a) Taano ta tibaad depisil para sa mga hoben na akoon an autoridad ni Jehova? (b) Isaysay an eksperyensia na nagpapaheling kan kalolongan sa dai pag-intindi kan mga ley asin prinsipyo ni Jehova.

¹¹ Kamo daw sarong hoben sa organisasyon ni Jehova? Kun iyo, tibaad magin kamong espesyal na punteriya kan mga paghihingoa ni Satanas na paluyahon an autoridad ni Jehova. An “mga mawot na konektado sa pagkahoben” kaiba an panggigipit kan saindong mga kaedad tibaad magpangyari sa saindo na magkongklusyon na nakakapagabat an mga ley nin Dios. (2 Tim. 2:22) Dai pagtogotan na mangyari iyan. Pagmaigotan na saboton an kadonongan kan mga pamantayan nin Dios. Halimbawa, an Biblia nagsasabi sa saindo na “dumulag kamo sa pakikisaro.” (1 Cor. 6:18) Sa giraray, ihapot an mga ini sa saimong sadiri: ‘Taano ta madonong an pagboot na iyan? Paano ako makikinabang sa pagkuyog sa bagay na ini?’ Tibaad may midbid kamo na dai nag-intindi sa hatol nin Dios dangan inani ninda an makamomondong gayo na mga resulta kan salang iyan. Talaga daw na maogma sinda ngonyan? Ruminahay daw an buhay ninda kun ikokomparar sa buhay ninda kan nakikiasosyar pa sinda sa organisasyon ni Jehova? Talaga daw na nanompongan ninda an sekreto sa kaogmahan na dai nanompongan kan iba sa mga lingkod nin Dios?​—Basahon an Isaias 65:14.

¹² Estudyare an sinabi dai pa sana nahahaloy kan Kristianang si Sharon: “Huli sa dai pag-intindi sa ley ni Jehova, naolakitan ako nin nakakagadan na helang na AIDS. Pirme kong ginigirumdom an dakol  na maogmang taon na ginamit ko sa paglilingkod ki Jehova.” Narealisar nia na kalolongan an paglapas sa mga ley ni Jehova asin na pinahalagahan nia kutanang marhay an mga iyan. An mga ley ni Jehova para sa sadiri niatong proteksion. Si Sharon nagadan mga pitong semana sana pakatapos na isurat an mga tataramon na nasambitan sa enotan. Siring kan ipinapaheling kan makamomondo nanggad na eksperyensia niang iyan, mayong marahay na ikakaalok si Satanas sa mga nagigin kabtang kan maraot na sistemang ini. Bilang “an ama kan kaputikan,” dakol an ipinapanuga nia, alagad dai nia inootob an mga iyan, siring kan dai nia pag-otob sa ipinanuga nia ki Eva. (Juan 8:44) Tunay nanggad na pirmeng pinakamarahay na akoon an autoridad ni Jehova.

Magmaan sa Independienteng Kaisipan

13. Ano an sarong kamugtakan na dian kaipuhan kitang magmaan sa independienteng kaisipan?

¹³ Sa pag-ako sa autoridad ni Jehova, kaipuhan kitang magmaan sa independienteng kaisipan. An mapaabaw-abaw na kaisipan puedeng magin dahelan na magsaboot kita na dai niato kaipuhan an paggiya nin siisay man. Halimbawa, tibaad labanan niato an hatol na itinao kan mga nangengenot sa banwaan nin Dios. An Dios nag-establisar nin areglo na paagi kaiyan itinatao kan grupong maimbod asin mapagmansay na oripon an espirituwal na kakanon sa tamang panahon. (Mat. 24:45-47) Maninigo na mapakumbaba niatong midbidon na ini an paagi ni Jehova sa pag-ataman sa saiyang banwaan ngonyan. Arogon an maimbod na mga apostol. Kan masingkog an nagkapirang disipulo, hinapot ni Jesus an mga apostol: “Kamo, gusto man nindong maghale?” Si Pedro nagsimbag: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan.”​—Juan 6:66-68.

14, 15. Taano ta maninigo kitang mapakumbabang magpasakop sa hatol na nasa Biblia?

¹⁴ Kalabot sa pag-ako sa autoridad ni Jehova an paghimate sa hatol na basado sa saiyang Tataramon. Halimbawa, an grupong maimbod asin mapagmansay na oripon danay na nagsasadol sa sato na “magpuka kita asin papagdanayon niato an toltol na pag-iisip.” (1 Tes. 5:6) An siring na hatol angay na marhay sa huring mga aldaw na ini na dakol an “mamomoton sa sainda man sana, mga mamomoton sa kuarta.” (2 Tim. 3:1, 2) Puede daw kitang maapektaran kan siring na nangingibabaw na mga kaisipan? Iyo. An bakong espirituwal na mga pasohan puedeng makapatorog sa sato sa espirituwal na paagi, o tibaad magkaigwa kita nin materyalistikong kaisipan. (Luc. 12:16-21) Huli kaini, madonong nanggad na akoon an hatol kan Biblia asin likayan an maimot na estilo nin pamumuhay na lakop na gayo sa kinaban ni Satanas!​—1 Juan 2:16.

¹⁵ Itinatao kan nombradong kamagurangan sa lokal na mga kongregasyon an espirituwal na kakanon hale sa grupong maimbod asin mapagmansay na oripon. Sinasadol kita kan Biblia: “Magin makinuyog kamo sa mga nangengenot sa saindo asin magin mapagpasakop, huli ta sinda nagbabantay sa saindong kalag bilang an mga maninimbag; tanganing ini magibo nindang may kagayagayahan asin bakong may pag-agagha, huli ta ini makakaraot sa saindo.” (Heb. 13:17) Nangangahulogan daw ini na dai nasasala an kamagurangan sa kongregasyon? Dai nanggad! Naheheling nin Dios nin mas malinaw kisa siisay man na tawo an saindang mga pagkukulang. Sa ibong kaiyan, linalaoman nia na kita magin mapagpasakop. An pakikikooperar sa kamagurangan, minsan ngani bako sindang sangkap, nagpapatunay na inaako niato an autoridad ni Jehova.

An Kahalagahan nin Kapakumbabaan

16. Paano niato ikakapaheling an paggalang ki Jesus bilang Payo kan Kristianong kongregasyon?

¹⁶ Dapat na pirme niatong girumdomon na si Jesus an tunay na Payo kan kongregasyon. (Col. 1:18) Sarong dahelan iyan na kita dapat na  mapakumbabang magpasakop sa pagdirehir kan nombradong kamagurangan, na tinatawan sinda nin “orog kisa ekstraordinaryong konsiderasyon.” (1 Tes. 5:12, 13) Siempre, ikakapaheling kan kamagurangan sa kongregasyon na sinda man mapagpasakop paagi sa pagigin maingat na an itinatao ninda sa kongregasyon iyo an mensahe nin Dios, bakong an sadiri nindang mga opinyon. ‘Dai sinda minalihis sa mga bagay na nasusurat’ tangani sanang magpalakop nin personal na ideya.​—1 Cor. 4:6.

17. Taano ta peligroso an ambisyosong kaisipan?

¹⁷ Kaipuhan na an gabos na nasa kongregasyon magmaan sa peligro na hanapon an sadiri nindang kamurawayan. (Tal. 25:27) Minalataw na nagin silo iyan sa sarong partikular na disipulo na namidbid ni apostol Juan. Sia nagsurat: “Si Diotrefes, na gustong magkamit kan enot na lugar sa tahaw ninda, dai nag-aako nin ano man hale sa samo na may paggalang. Kaya, pagdatong ko, gigirumdomon ko an saiyang mga gibo na padagos niang ginigibo, na nagtatabil dapit sa samo nin maraot na mga tataramon.” (3 Juan 9, 10) Iyan may leksion dawa sa sato ngonyan. May marahay kitang dahelan na haleon an ano man na ambisyon na tibaad maheling niato sa satong sadiri. An Biblia nagsasabi sa sato: “An pagigin orgolyoso naeenot sa kapahamakan, asin an espiritu nin kaabhawan naeenot sa pagkapukan.” An mga nag-aako sa autoridad nin Dios dapat na labanan an siod nin kapangahasan, huli ta an paggibo kaiyan maresulta sa kasusupgan.​—Tal. 11:2; 16:18.

18. Ano an makakatabang sa sato na akoon an autoridad ni Jehova?

¹⁸ Iyo, gibohon nindong pasohan na labanan an espiritu kan kinaban na pagigin independiente asin na akoon an autoridad ni Jehova. Sa panapanahon, horophoropon na may pag-apresyar an saindong dakulang pribilehio na paglingkodan si Jehova. An katunayan na kamo kabilang sa banwaan nin Dios ebidensia na dinadagka nia kamo paagi sa saiyang banal na espiritu. (Juan 6:44) Nungkang bali-walaon an saindong relasyon sa Dios. Magmaigot sa gabos na aspekto kan saindong buhay tanganing ipaheling na isinisikwal nindo an independienteng kaisipan asin na inaako nindo an autoridad ni Jehova.

Nagigirumdoman daw Nindo?

• Ano an kalabot sa pag-ako sa autoridad ni Jehova?

• Paano an pagpatuod sa satong kakayahan sa pagrisa konektado sa pag-ako sa autoridad ni Jehova?

• Sa anong mga paagi pinagmamaigotan ni Satanas na paluyahon an autoridad nin Dios?

• Taano ta mahalaga an kapakumbabaan sa pag-ako sa autoridad ni Jehova?

[Mga Hapot Para sa Pag-adal]

[Ritrato sa pahina 18]

“Dapat na kuyogon niamo an Dios bilang namamahala imbes na mga tawo”

[Ritrato sa pahina 20]

Pirmeng madonong na sumunod sa mga pamantayan nin Dios