1-2. (a) Uyon sa Efeso 6:16, taano ta kaipuhan niyato nin “dakulang kalasag nin pagtubod”? (b) Anong mga hapot an pag-uulayan niyato?

 IGWA ka daw nin “dakulang kalasag nin pagtubod”? (Basahon an Efeso 6:16.) Siguradong igwa. Arog sa dakulang kalasag na nagpoprotektar sa haros bilog na hawak, an saimong pagtubod pinoprotektaran ka man sa imoral, madahas, asin sa gabos na iba pang bagay sa maraot na kinaban na ini na bakong kauyon kan mga pamantayan nin Diyos.

² Minsan siring, nabubuhay kita sa “huring mga aldaw,” asin an satong pagtubod padagos na mababalo. (2 Tim. 3:1) Paano mo iinspeksiyunon an saimong kalasag nin pagtubod tanganing masigurado na masarig iyan? Asin paano mo padagos na kakaputan nin higot an saimong kalasag? Pag-ulayan ta an simbag sa mga hapot na iyan.

3. Ano an ginigibo kan mga suldados kaidto sa saindang kalasag, asin taano?

³ Kan mga panahon kan Bibliya, sa parati pinaplastaran nin anit an mga kalasag nin mga suldados. Pinapahidan iyan kan mga suldados nin lana tanganing mapreserbar an anit asin tanganing dai taklaon an metal na mga parte kan kalasag. Kun mahiling nin sarong suldados na may raot an saiyang kalasag, sisiguraduhon niyang mahirahay iyan tanganing pirmi siyang andam sa sunod na laban. Paano iyan aplikado sa saimong pagtubod?

4. Taano ta kaipuhan mong inspeksiyunon an saimong kalasag nin pagtubod, asin paano mo iyan dapat gibuhon?

⁴ Arog kan mga suldados kan suanoy na mga panahon, kaipuhan mong regular na inspeksiyunon asin manteniron an saimong kalasag nin pagtubod tanganing pirmi kang andam sa laban. Bilang mga Kristiyano, igwa kita nin espirituwal na pakikipaglaban asin  kaiba sa mga kaiwal ta an maraot na mga espiritu. (Efe. 6:10-12) Mayong iba na makakamantenir kan saimong kalasag nin pagtubod kundi ika sana. Paano mo masisigurado na andam kang atubangon an mga pagbalo? Inot, kaipuhan mong mamibi para sa tabang nin Diyos. Dangan, kaipuhan mong gamiton an Tataramon nin Diyos tanganing tabangan kang mahiling an sadiri mo arog kan paghiling nin Diyos sa saimo. (Heb. 4:12) Sinasabi kan Bibliya: ‘Manarig ka ki Jehova sa bilog mong puso, asin dai ka manarig sa saimong [sadiring pakasabot].’ (Tal. 3:5, 6) Mantang isinasaisip iyan, puwede mo daw pag-isipan giraray an pira sa mga desisyon na ginibo mo kasuarin pa sana? Halimbawa, napaatubang ka daw sa dakulang problema sa pinansiyal? Nagsabong daw sa isip mo an panuga ni Jehova na nasa Hebreo 13:5: “Dai taka nuarin man tatalikudan, asin dai taka nuarin man papabayaan”? Nagpakusog daw iyan sa pagtitiwala mo na tatabangan ka ni Jehova? Kun iyo, ipinapahiling kaiyan na pinapagdanay mong nasa kondisyon an saimong kalasag nin pagtubod.

5. Ano an tibaad mahiling mo mantang sinisiyasat mo an saimong pagtubod?

⁵ Tibaad mabigla ka sa mahihiling mo mantang sinisiyasat mong marhay an saimong pagtubod. Tibaad may mahiling kang mga kaluyahan na ngunyan mo pa lang narisa. Halimbawa, tibaad marealisar mo na nararaot na an saimong pagtubod huli sa dai kinakaipuhan na paghadit, mga kaputikan, asin pagkadisganar. Kun totoo ini sa saimo, paano mo mapoprotektaran an saimong pagtubod tanganing dai na iyan urog pang maraot?

6. Ano an pirang halimbawa nin mga kahaditan na bako man maraot?

⁶ May mga kahaditan na bako man maraot. Halimbawa, tama sana na pinag-iisipan ta pirmi na mapaugma si Jehova asin si Jesus. (1 Cor. 7:32) Kun makagibo kita nin magabat na kasalan, nahahadit kita kun paano ta maibabalik an relasyon ta sa Diyos. (Sal. 38:18) Pirmi man niyatong pinag-iisipan na mapaugma an satong agom asin an kapakanan kan satong mga kapamilya asin kapagtubod.—1 Cor. 7:33; 2 Cor. 11:28.

7. Uyon sa Talinhaga 29:25, taano ta dai niyato kaipuhan na matakot sa tawo?

⁷ Sa ibong na lado, puwedeng maraot kan dai kinakaipuhan na paghadit an satong pagtubod. Halimbawa, tibaad pirmi na sana kitang naghahadit kun may igo pa kitang kakanon o kun may isusulot pa kita. (Mat. 6:31, 32) Tanganing mabawasan an paghadit, tibaad magpokus kita sa paghanap nin materyal na mga bagay. Tibaad mamuot pa ngani kita sa kuwarta. Kun tutugutan niyatong mangyari iyan, magigin maluya an satong pagtubod ki Jehova asin madadanyaran na marhay kaiyan an satong espirituwalidad. (Mar. 4:19; 1 Tim. 6:10) O tibaad mabiktima kita nin saro pang klase nin dai kinakaipuhan na paghadit—an sobrang pagparaisip kun paano makakamtan an pag-uyon kan iba. Huli kaiyan, tibaad magin mas makusog an pagkatakot niyato sa pagtuya o pagpersegir nin mga tawo kisa sa pagkatakot niyatong mapamundo si Jehova. Tanganing maprotektaran an satong sadiri sa peligrong iyan, kaipuhan niyatong makimahirak ki Jehova na tawan kita kan pagtubod asin kusog nin buot para maatubang an problema.—Basahon an Talinhaga 29:25; Luc. 17:5.

8. Ano an dapat niyatong gibuhon kun dapit sa mga kaputikan?

⁸ Si Satanas, “an ama kan kaputikan,” ginagamit an mga nasa kontrol niya tanganing ipalakop an mga kaputikan mapadapit ki Jehova asin sa satong mga kapagtubod. (Juan 8:44) Halimbawa, paagi sa mga website, telebisyon, asin iba pang media, nagpupublikar an mga apostata nin mga kaputikan asin binibiribid an mga katotoohan mapadapit sa organisasyon ni Jehova. Kaiba an mga kaputikan na iyan sa “nagkakalayong mga pana” ni Satanas. (Efe. 6:16) Ano an dapat  niyatong gibuhon kun may makipag-ulay sa sato mapadapit sa siring na mga kaputikan? Dai ta nanggad iyan dadangugon! Taano? Huling makusog an pagtubod ta ki Jehova asin nagtitiwala kita sa satong mga tugang. Sa katunayan, linilikayan niyatong makikomunikar sa mga apostata sa ano man na paagi. Dai niyato tinutugutan an siisay man o an ano man, pati na an pagigin mausyoso niyato, na magin dahilan na makiargumento kita sa sainda.

9. Paano puwedeng makaapektar sa sato an pagkadisganar?

⁹ An pagkadisganar puwedeng makapaluya sa satong pagtubod. Iyo, dai niyato puwedeng baliwalaon an satong personal na mga problema. Sa katunayan, pagigin iresponsable iyan. Asin huli sa mga problema tibaad madisganar kita kun minsan. Alagad dai niyato dapat pagtugutan an satong mga problema na iyo na sana an pagparaisipon ta huling tibaad mawara an pokus niyato sa makangangalas na paglaom na itinao sa sato ni Jehova. (Kap. 21:3, 4) An pagkadisganar na resulta kan mga problema puwedeng makahali kan satong kusog asin magin dahilan na sumuko na kita. (Tal. 24:10) Pero dai nanggad niyato tutugutan na mangyari iyan.

10. Ano an nanudan mo sa surat nin sarong sister?

¹⁰ Pag-isipan kun paano an sarong sister sa Estados Unidos napagdadanay na makusog an saiyang pagtubod mantang inaataman an agom niya na may malalang hilang. Sinabi kan sister sa saiyang surat sa satong headquarters: “Kun minsan nakaka-stress saka nakakadisganar an sitwasyon mi, pero makusog an paglaom mi. Nagpapasalamat akong marhay sa mga impormasyon na inaako mi na nakakapakusog sa samong pagtubod asin nakakapaginhawa sa pagmati mi. Kaipuhan mi talaga an mga sadol asin pampakusog na ini. Paagi kaiyan, nakakapagpadagos kami asin nakakatabang iyan sa samo na matagalan an mga pagbalo na ipinang-aatake samo ni Satanas.” Manunudan ta sa sinabi kan sister na kaya nanggad niyatong makayanan an pagkadisganar! Paano? Mansayon an saimong mga problema na mga pagbalo hali ki Satanas. Midbidon si Jehova bilang an Gikanan nin karangahan. Asin ipagpasalamat an espirituwal na mga kakanon na itinatao niya.

11. Tanganing maaraman an kondisyon kan satong pagtubod, ano an mga dapat niyatong ihapot sa satong sadiri?

¹¹ May naririsa ka daw na kaipuhan hirahayon sa saimong kalasag nin pagtubod? Sa nakaaging  pirang bulan, nalikayan mo daw na makamati nin dai kinakaipuhan na paghadit? Dai ka daw nagpadara sa pagigin mausyoso mo asin nagdangog o nakiargumento sa mga apostata mapadapit sa mga kaputikan na pinapalakop ninda? Asin nakayanan mo daw an pakamati nin pagkadisganar? Kun iyo, nasa kondisyon an saimong pagtubod. Pero dapat kitang magdanay na mapagbantay huling may iba pang mga armas na ginagamit si Satanas laban sa sato. Pag-ulayan ta an saro kaiyan.

12. Ano an puwedeng magin epekto sa sato nin materyalismo?

¹² An materyalismo puwedeng makawara kan satong pokus asin mapabayaan ta an satong kalasag nin pagtubod. Sinabi ni apostol Pablo: “Mayo nin suldados na nasa serbisyo an nakikilabot sa mga aktibidad na may koneksiyon sa pagnenegosyo, tanganing makamtan niya an pag-uyon kan saro na nagrehistro sa saiya.” (2 Tim. 2:4) Sa katunayan, dai itinutugot sa mga suldados na Romano na gumibo nin iba pang trabaho. Ano an puwedeng mangyari kun baliwalaon nin sarong suldados an kahagadan na iyan?

13. Taano ta dai magibo nin ibang trabaho an sarong suldados?

¹³ Imahinara an eksena. May sarong grupo nin suldados na bilog na agang nagsasanay sa paggamit kan saindang espada, pero mayo an saro sa kairiba ninda. Nagpupundar ini nin negosyong kakanan sa sentro. Kan banggi na, iniinspeksiyon kan mga suldados an saindang pangalasag asin tinatais an saindang mga espada. Alagad an suldados na may kakanan nagpepreparar nin mga kakanon na ipapabakal sa sunod na aldaw. Pero kan aga na, may biglang nagsalakay na kalaban. Sa hiling mo, arin na suldados an posibleng marhay na makaresponde nin tama asin makakua kan pag-uyon kan saiyang komandante? Asin siisay an gusto mong makaiba mo sa laban—an suldados na nagpokus sa pag-andam sa laban o an saro na may ibang mga ginibo?

14. Bilang mga suldados ni Cristo, ano an mahalaga sa sato?

¹⁴ Arog sa marahay na mga suldados, dai nawawara an satong pokus sa panginot niyatong pasuhan—an makamtan an pag-uyon kan satong mga Komandante, si Jehova asin si Cristo. Para sa sato, mas mahalaga iyan kisa sa makamtan an ano man na inaalok kan kinaban ni Satanas. Sinisigurado niyato na igwa kita kan panahon asin  kusog na kaipuhan niyato para makapaglingkod ki Jehova asin mapagdanay na nasa kondisyon an satong kalasag nin pagtubod asin an gabos na iba pang espirituwal na pangalasag niyato.

15. Anong patanid an itinao sa sato ni Pablo, asin taano?

¹⁵ Dapat na pirmi kitang magin alerto! Taano? Nagpatanid si apostol Pablo na “idtong mga determinadong yumaman . . . naparayo sa pagtubod.” (1 Tim. 6:9, 10) An ekspresyon na “naparayo” nagpaparisa na puwedeng mawara an satong pokus kun hihinguwahon niyatong magkamit nin materyal na mga bagay na dai man niyato kaipuhan. Dangan huli kaiyan, mababantad an satong puso sa “dakul na daing saysay saka nakakadanyar na mga pagmawot.” Imbes na tugutan na makalaog sa satong puso an siring na mga pagmawot, dapat na mansayon ta iyan sa kun ano talaga iyan—mga armas na makakadanyar sa sato.

16. Mapapahiro kita kan istoryang nasa Marcos 10:17-22 na isip-isipon an anong mga hapot?

¹⁶ Ipamugtak na kaya tang magbakal nin dakul na materyal na bagay. Sala daw na bumakal nin mga bagay na gusto ta pero dai ta man talaga kaipuhan? Dai man. Alagad isip-isipon ini: Dawa kun kaya tang bakalon an sarong bagay, igwa daw kita nin panahon asin kusog para gamiton asin mentenaron iyan? Saka, posible daw na magin mahalagang marhay sa sato an satong mga pagsadiri? Posible daw na huli kaiyan magin arog kita kan hoben na lalaki na sinayumahan an imbitasyon ni Jesus na pahiwason an saiyang paglilingkod sa Diyos? (Basahon an Marcos 10:17-22.)  Mas marahay nanggad na mamuhay kita nin simple asin gamiton an satong mahalagang marhay na panahon asin kusog para gibuhon an kabutan nin Diyos!

17. Ano an dai ta dapat nuarin man paglingawan?

¹⁷ Dai ta dapat nuarin man paglingawan na nasa laban kita asin dapat na andam kitang makipaglaban kada aldaw. (Kap. 12:17) Dai puwedeng an mga tugang ta an magdara para sa sato kan satong kalasag nin pagtubod. Kita mismo an dapat na padagos na magkapot kaiyan nin higot.

18. Kan suanoy na mga panahon, taano ta padagos na kinakaputan nin higot kan mga suldados an saindang kalasag?

¹⁸ Kan suanoy na mga panahon, tinatawan nin onra an sarong suldados huli sa saiyang pagkapusuan sa laban. Pero kasusupgan para sa saiya kun mapuli siyang dai dara an saiyang kalasag. An Romanong historyador na si Tacitus nagsabi: “An pagbaya nin saro sa kalasag niya an pinakadakulang kasusupgan.” Sarong dahilan iyan kaya sinisigurado kan mga suldados na padagos nindang kinakaputan nin higot an saindang kalasag.

19. Paano niyato padagos na mapapangaptan nin higot an satong kalasag nin pagtubod?

¹⁹ Padagos niyatong kinakaputan nin higot an satong kalasag nin pagtubod paagi sa regular na pag-atender sa Kristiyanong mga pagtiripon asin sa pagsabi sa iba kan dapit sa pangaran nin Diyos asin sa saiyang Kahadian. (Heb. 10:23-25) Apuwera kaiyan, may pagpamibi niyatong binabasa aroaldaw an Tataramon nin Diyos asin inaaplikar an mga sadol saka paggiya kaiyan sa gabos niyatong ginigibo. (2 Tim. 3:16, 17) Dangan, mayong armas na ginagamit ni Satanas laban sa sato an permanenteng makakadanyar sa sato. (Isa. 54:17) Poprotektaran kita kan satong “dakulang kalasag nin pagtubod.” Matirindog kitang marigon, na nagtitinarabangan kaiba kan satong mga tugang. Asin dai lang kita manggagana sa laban niyato sa aroaldaw—magkakaigwa kita kan onra na magin nasa lado ni Jesus pag manggana na siya sa giyera laban ki Satanas asin sa saiyang mga alipores.—Kap. 17:14; 20:10.