IMPENDULO YEBHAYIBHELI: “Ihora liyeza lapho bonke abasemathuneni beyokhunjulwa futhi bayolizwa izwi [likaJesu] baphume.”—Johane 5:28, 29.

UJesu wabikezela ukuthi ngaphansi kokubusa kwakhe, abasemathuneni bayovuswa. UFernando okukhulunywe ngaye esihlokweni esandulele, uyakhumbula: “Ngamangala lapho ngiqala ukufunda uJohane 5:28, 29. Lo mBhalo wanginika ithemba langempela futhi ngaqala ukubheka ikusasa ngethemba.”

Endulo, indoda ethembekile uJobe yayinethemba lokuthi lapho ifa uNkulunkulu wayeyoyivusa iphinde iphile. UJobe wabuza: “Uma indoda enamandla ifa ingabuye iphile futhi?” Wabe esephendula ngokuqiniseka: “Ngiyolinda zonke izinsuku zomsebenzi wami oyimpoqo [ethuneni], kuze kufike impumuzo yami. Uyobiza, futhi mina ngiyokuphendula.”—Jobe 14:14, 15.

UMarta udadewabo kaLazaru wayengaqali ukuzwa ngovuko. Ngemva kokufa kukaLazaru, uJesu wathi kuMarta: “Umfowenu uzovuka.” Emphendula wathi: “Ngiyazi ukuthi uyovuka ovukweni ngosuku lokugcina.” UJesu wathi kuye: “Mina ngingukuvuka nokuphila. Lowo obonisa ukholo kimi, ngisho noma efa, uyophila.” (Johane 11:23-25) Ngokushesha ngemva kwalokho uJesu wavusa uLazaru! Leso senzakalo esijabulisayo sisinika amazwibela ezinto ezinhle ezizokwenzeka esikhathini esizayo. Cabanga nje sekuvuswa abantu emhlabeni wonke!

IMPENDULO YEBHAYIBHELI: IZwi likaNkulunkulu libonisa ukuthi ukuvuswa kukaJesu kwakuhlukile ekuvusweni kwabangu-8 okukhulunywa ngabo eBhayibhelini. Labo bantu bavuselwa lapha emhlabeni. Kodwa sifunda lokhu ngokuvuswa kukaJesu: ‘UJesu Kristu ungakwesokunene sikaNkulunkulu, ngoba waya ezulwini.’ (1 Petru 3:21, 22) Ingabe uJesu kuphela oyovuselwa ezulwini? UJesu wayethe kubaphostoli bakhe: “Uma ngihamba nginilungisela indawo, ngiyobuye ngize futhi ngizonamukela ekhaya kimi, ukuze kuthi lapho ngikhona nani nibe khona.”—Johane 14:3.

UJesu waya ezulwini futhi walungiselela ukufika kwabafundi bakhe. Labo abavuselwa ezulwini bayogcina bengu-144 000. (IsAmbulo 14:1, 3) Kodwa bayokwenzani ezulwini labo balandeli bakaJesu?

 Bayoba matasa kakhulu! ImiBhalo ithi: “Uyajabula futhi ungcwele noma ubani onesabelo ovukweni lokuqala; ukufa kwesibili akunalo igunya phezu kwabo, kodwa bayoba ngabapristi bakaNkulunkulu nabakaKristu, babuse njengamakhosi kanye naye iminyaka eyinkulungwane.” (IsAmbulo 20:6) Labo abayovuselwa ezulwini bayobusa noKristu njengamakhosi nabapristi phezu komhlaba.

IMPENDULO YEBHAYIBHELI: ImiBhalo ephefumulelwe inala mazwi ashiwo umphostoli uPawulu: “Nginethemba kuNkulunkulu, okuyithemba nalaba bantu ngokwabo abanalo, lokuthi kuyoba khona uvuko lwabalungile nabangalungile.”—IzEnzo 24:15.

Obani abayoba phakathi kwalabo uPawulu ababiza ngokuthi “abalungile”? Cabanga nganasi isibonelo. Indoda ethembekile uDaniyeli yatshelwa lokhu ngasekupheleni kokuphila kwayo: “Uyophumula, kodwa uyosukuma umele isabelo sakho ekupheleni kwezinsuku.” (Daniyeli 12:13) Uyovuselwa kuphi uDaniyeli? “Abalungile bayokudla ifa lomhlaba, futhi bayohlala kuwo kuze kube phakade.” (IHubo 37:29) UJesu wabikezela: “Bayajabula abanomoya omnene, ngoba bayokudla ifa lomhlaba.” (Mathewu 5:5) UDaniyeli namanye amadoda nabesifazane abathembekile bayovuselwa lapha emhlabeni, baphile phakade.

Obani abayoba phakathi kwalabo uPawulu ababiza ngokuthi “abangalungile”? Izigidigidi eziye zaphila futhi zafa; iningi lazo elingazange lithole ithuba lokuqonda nokusebenzisa iqiniso leBhayibheli. Ngemva kokuvuswa kwazo ziyokwazi ukufunda ngoJehova * nangoJesu futhi zibazise. (Johane 17:3) Bonke abakhetha ukukhonza uNkulunkulu bayoba nethemba lokuphila phakade njengoba nje noJehova ephila phakade.

IMPENDULO YEBHAYIBHELI: UNkulunkulu “uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.” (IsAmbulo 21:4) “Bayokwakha izindlu bahlale kuzo; nakanjani bayotshala izivini badle izithelo zazo.”—Isaya 65:21.

Zibone uhlala endaweni enjalo nabathandekayo bakho! Kodwa umbuzo uyaphakama, Ungaqiniseka kanjani ukuthi abantu bayovuswa ngempela?