1. Iyiphi indlela uJehova asidale ngayo futhi kungani esidale kanjalo?

 UJEHOVA usidale ngendlela esenza sikwazi ukucabanga, ukufunda izinto ezintsha, ukuqonda nokwenza izinto ezibonisa ukuthi sihlakaniphile. Kungani esidale ngale ndlela? Ufuna ‘sithole ulwazi ngoNkulunkulu’ futhi senze izinqumo ezihlakaniphile ezisekelwe olwazini olunembile njengoba simkhonza.—IzAga 2:​1-5; Roma 12:1.

2. (a) Yini okudingeka siyiqonde ngendlela esidalwe ngayo? (Jobe 37:​23, 24) (Bheka nesithombe.) (b) Kusizuzisa kanjani ukuba nesizotha samukele ukuthi asazi yonke into?

² Nakuba uJehova esidale ngendlela esenza sikwazi ukufunda izinto eziningi, kodwa kuningi esingakwazi. (Funda uJobe 37:​23, 24.) Cabanga ngesibonelo sikaJobe. Wabuzwa imibuzo eminingi eyaveza ukuthi kuningi kangakanani ayengakwazi. Lokho okwenzeka kwamthobisa, kwamsiza nokuba alungise indlela ayecabanga ngayo. (Jobe 42:​3-6) Nathi siyazuza lapho ngesizotha siqaphela ukuthi asazi yonke into. Ukuba nesizotha kuyosenza simethembe uJehova ukuthi uyosambulela lokho okudingeka ngempela ukuba sikwazi ukuze senze izinqumo ezihlakaniphile.—IzAga 2:6.

3. Sizoxoxa ngani kulesi sihloko?

³ Kulesi sihloko, sizoxoxa ngezinye zezinto esingazazi nezinselele esingase sibhekane nazo ngenxa yalokho. Sizofunda nangokuthi kungani kukuhle ukuthi kunezinto ezithile esingazazi. Ukuxoxa ngalawo maphuzu kuyosenza siqiniseke nakakhulu ukuthi uJehova, “Lowo onolwazi oluphelele,” usitshela lokho okudingeka sikwazi ngempela.—Jobe 37:16.

ASAZI UKUTHI UKUPHELA KWALELI ZWE KUYOFIKA NINI

4. NgokukaMathewu 24:​36, yiliphi iqiniso esingalazi?

⁴ Funda uMathewu 24:36. Asazi ukuthi ukuphela kwaleli  zwe elibi kuyofika nini. Ngisho noJesu, ngesikhathi esesemhlabeni, wayengalwazi ‘usuku nehora.’ a Kamuva watshela abaphostoli ukuthi uJehova, onguMgcini-sikhathi Omkhulu, ‘nguye ngokwakhe’ onegunya noma onqumayo ukuthi izenzakalo ezithile ziyokwenzeka nini. (IzE. 1:​6, 7) UJehova usesinqumile isikhathi okuyophela ngaso leli zwe elibi, kodwa thina ngeke sazi ngokuqondile ukuthi sinini leso sikhathi.

5. Kungase kusithinte kanjani ukungazi ukuthi ukuphela kwaleli zwe kuyofika nini?

⁵ Ngokwalokho uJesu akusho, asazi ukuthi kuyodingeka silinde isikhathi esingakanani ngaphambi kokuba kufike ukuphela. Ngenxa yalokho, singase siphelelwe yisineke noma sidikibale, ikakhulukazi uma kakade bese silulinde isikhathi esithile usuku lukaJehova. Noma singase sikuthole kunzima ukukhuthazelela ukuhlekwa amalungu emindeni yethu noma ukuhlekwa abanye abantu. (2 Pet. 3:​3, 4) Singase sicabange ukuthi ukube besilwazi usuku oluqondile okuyophela ngaso lesi simiso, besiyoba nesineke kakhudlwana futhi besiyokukhuthazelela kalula ukuhlekwa.

6. Kungani kukuhle ukungazi ukuthi ukuphela kwaleli zwe kuyofika nini?

⁶ Empeleni, ngokungasambuleli usuku okuyophela ngalo leli zwe, uJehova usinika ithuba lokubonisa ukuthi simkhonza ngoba simthanda futhi simethemba. Asikhonzi uJehova sinosuku oluthile engqondweni, njengokungathi ukholo lwethu luhamba luphelelwe yisikhathi. Kunokuba sigxile ekutheni ‘usuku lukaJehova’ luzofika nini, senza kahle ngokugxila kulokho okuyofezwa yilolo suku. Ukwenza kanjalo kuyosisiza sisondele nakakhulu kuNkulunkulu, sithembele kuye futhi senze konke esingakwenza ukuze simjabulise.—2 Pet. 3:​11, 12.

7. Yini esiyaziyo?

⁷ Senza kahle ngokugxila kulokho esikwaziyo—ukuthi izinsuku zokugcina zaqala ngo-1914. EBhayibhelini, uJehova akagcinanga nje ngokusinika iziprofetho ezifakazela ukuthi lowo nyaka wawuyoba ukuqala kwezinsuku zokugcina, kodwa ziphinde zichaze  ngokuningiliziwe ukuthi izimo zaziyoba njani kusukela ngaleso sikhathi. Ngenxa yalokho, siyaqiniseka ukuthi “usuku olukhulu lukaJehova luseduze.” (Zef. 1:14) Siyawazi nomsebenzi uJehova afuna siwenze—ukutshela abantu abaningi ngangokunokwenza ‘izindaba ezinhle zoMbuso.’ (Math. 24:14) Lo myalezo ushunyayelwa emazweni angaba ngu-240, ngezilimi ezingaphezu kuka-1 000. Akudingeki sazi ‘usuku nehora’ ukuze sihlanganyele ngentshiseko kulo msebenzi obalulekile.

ASIKWAZI LOKHO UJEHOVA ANGASE AKWENZE

8. Ubhekisela kuphi ‘umsebenzi kaNkulunkulu weqiniso?’ (UmShumayeli 11:5)

⁸ Asiwazi ngaso sonke isikhathi ‘umsebenzi kaNkulunkulu weqiniso.’ (Funda umShumayeli 11:5.) Leyo nkulumo ibhekisela kulokho uJehova abangela ukuba kwenzeke noma kulokho avumela ukuba kwenzeke ukuze afeze intando yakhe. Ngeke sazi ngokuqinisekile ukuthi kungani uJehova engase avumele into ethile ukuba yenzeke noma ukuthi yini ngempela ayoyenza ukuze asisize. (IHu. 37:5) Lokho ngeke sakwazi ukukuqonda, njengoba nje singeke sakwazi ukuqonda ukuthi ingane ikhula kanjani esibelethweni sowesifazane okhulelwe, okuyinto ososayensi abangakayiqondi ngokuphelele.

9. Yiziphi izinselele esingase sibhekane nazo ngenxa yokungazi ukuthi yini uJehova azoyenza ukuze asisize?

⁹ Ukungazi ukuthi yini uJehova azoyenza ukuze asisize kungasenza sinqikaze ukwenza izinqumo ezithile. Singase sinqikaze ukuzidela ukuze sandise inkonzo yethu, njengokwenza ukuphila kwethu kube lula noma ukuthuthela lapho kunesidingo esikhulu sabamemezeli boMbuso. Noma singase sizibuze ukuthi uNkulunkulu uyajabula yini ngathi uma singayifinyeleli imigomo yethu engokomoya, uma singayiboni imiphumela emihle yokuzikhandla kwethu enkonzweni noma uma sihlangabezana nobunzima lapho senza umsebenzi othile wenhlangano.

10. Ukungazi ukuthi yini uJehova azoyenza ukuze asisize kusisiza sibe naziphi izimfanelo ezibalulekile?

¹⁰ Empeleni, ukungazi ukuthi yini uJehova azoyenza ukuze asisize kusisiza sibe nezimfanelo ezibalulekile ezinjengokuthobeka nesizotha. Kusisiza siqonde ukuthi imicabango kaJehova nezindlela zakhe kuphakeme kunokwethu. (Isaya 55:​8, 9) Sifunda nokuthembela kuJehova kakhudlwana, simethembe ukuthi uyozisingatha ngendlela engcono kakhulu izinto. Lapho sibona imiphumela emihle enkonzweni noma emsebenzini othile wenhlangano ebesiwenza, udumo siluyisa kuJehova futhi kube kufanele. (IHu. 127:1; 1 Kor. 3:7) Uma izinto zingenzeki ngendlela ebesiyilindele, kudingeka sikhumbule ukuthi uJehova ubona yonke into. (Isaya 26:12) Senza lokho esingakwenza, siqhubeke simethemba uJehova ukuthi naye uzokwenza ingxenye yakhe. Siyaqiniseka ukuthi uzosinika isiqondiso esisidingayo, ngisho noma lokho engeke akwenze ngendlela eyisimangaliso njengoba ayenza ngezinye izikhathi esikhathini esidlule.—IzE. 16:​6-10.

11. Yiziphi izinto ezibalulekile esizaziyo?

¹¹ Zindla ngeqiniso lokuthi siyazi ukuthi uJehova uhlale enothando, ubulungisa futhi uhlakaniphile. Siyazi ukuthi ukwazisa kakhulu esimenzela kona nesikwenzela esikholwa nabo. Siyazi nokuthi uJehova uhlale ebavuza labo abaqotho kuye.—Heb. 11:6.

ASAZI UKUTHI YINI EZOKWENZEKA KUSASA

12. NgokukaJakobe 4:​13, 14, yini esingaqiniseki ngayo?

¹² Funda uJakobe 4:​13, 14. Iqiniso elibalulekile liwukuthi asazi ukuthi ukuphila kwethu kuyoba njani kusasa. Kuleli zwe elibi, sibhekana ‘nesikhathi nezenzakalo ezingalindelekile.’  (UmSh. 9:11) Ngenxa yalokho, ngeke sazi ukuthi esikuhlelile kuyophumelela yini noma ngisho ukuthi siyobe sisaphila yini ukuze sikubone kwenzeka lokho ebesikuhlelile.

13. Ukungazi ukuthi yini engenzeka esikhathini esizayo kungasithinta kanjani?

¹³ Kungaba yinselele ukukhuthazelela ukungazi ukuthi yini ngempela eyokwenzeka esikhathini esizayo. Kanjani? Singase sikhathazeke ngenxa yalokho okungase kwenzeke futhi lokho kungasiqedela injabulo. Izinhlekelele nezenzakalo ezingalindelekile kungasibangela usizi nokucindezeleka. Lapho izinto zingahambi ngendlela ebesiyilindele, singadumazeka futhi siphele amandla.—IzAga 13:12.

14. Yini okudingeka siyenze ukuze sihlale sijabule? (Bheka nezithombe.)

¹⁴ Lapho sikhuthazelela ubunzima, sifakazela ukuthi kungakhathaliseki ukuthi yini eyenzekayo, sikhonza uBaba wethu osezulwini ngoba simthanda, hhayi ngenxa yezisusa zobugovu. Izindaba eziseBhayibhelini zibonisa ukuthi akufanele silindele ukuba uJehova asivikele kubo bonke ubunzima futhi akakuhleli kusengaphambili lokho okuzokwenzeka ekuphileni kwethu. Uyazi ukuthi injabulo yethu ayincikile ekwazini ukuthi ikusasa lisiphatheleni. Kunalokho, incike ekufuneni isiqondiso sakhe nokumlalela. (Jer. 10:23) Ngokufuna isiqondiso sakhe lapho senza izinqumo, empeleni kunjengokungathi sithi: “Uma uJehova ethanda, sizophila futhi senze lokhu noma lokhuya.”—Jak. 4:15.

15. Yini esiyaziyo ngesikhathi esizayo?

¹⁵ Nakuba singazi ukuthi usuku ngalunye lusiphatheleni, siyazi ukuthi uJehova usithembise ukuphila okuphakade—ezulwini noma emhlabeni. Siyazi ukuthi akanakuwaqamba amanga futhi akukho okungamvimba ukuba agcwalise izithembiso zakhe. (Thithu 1:2) Nguye kuphela ‘ongabikezela isiphetho, . . . kusukela kudala obikezela izinto ezingakenziwa.’ Yilokho kanye okwenzekile ngezenzakalo azibikezela esikhathini esedlule futhi yilokho okuzokwenzeka ngezenzakalo zangesikhathi esizayo. (Isaya 46:10) Ngokuqinisekile siyazi ukuthi ayikho into engavimba uJehova ukuba asithande. (Roma 8:​35-39) Uzosinika ukuhlakanipha, induduzo namandla esiwadingayo ukuze sikhuthazelele noma yini esingase sibhekane nayo. Singaqiniseka ukuthi uJehova uzosisiza futhi asibusise.—Jer. 17:​7, 8.

 ASINAKUKUQONDA NGOKUPHELELE UKUTHI UJEHOVA USAZI KAHLE KANGAKANANI

16. Njengoba kuboniswe kumaHubo 139:​1-6, yiluphi ulwazi uJehova analo esingeke sikwazi ukuluqonda ngokuphelele?

¹⁶ Funda iHubo 139:​1-6. UMdali wethu wazi yonke into ngathi, ukuthi sakheke kanjani nokuthi yini esenza sicabange futhi senze ngendlela esenza ngayo. Uhlale enesithakazelo kithi. Uyakwazi esikushoyo nalokho esiqonde ukukusho, uyakwazi nesikwenzayo nokuthi kungani sikwenza. Njengoba iNkosi uDavide yasho, uJehova uhlale esiqaphile futhi akwenzeki ahluleke ukufinyelela kithi. Kumangalisa ngempela ukuthi iNkosi EnguMbusi wendawo yonke, uMdali wezulu nomhlaba onguMninimandla Onke, isikhathalela ngaleyo ndlela! UDavide wathi: “Ulwazi olunjalo lumangalisa kakhulu kimi. Luphakeme kakhulu, angikwazi ukuluqonda.”—IHu. 139:​6, mbhw.

17. Kungani singase sikuthole kunzima ukwamukela ukuthi uJehova usazi kahle kangaka?

¹⁷ Mhlawumbe ngenxa yendlela esikhule ngayo, isiko lethu noma izinkolelo esasinazo ngaphambi kokuba sifunde iqiniso, kungase kube nzima ukubheka uJehova njengoBaba onothando onendaba nathi. Noma singase sibe nomuzwa wokuthi amaphutha esawenza esikhathini esidlule mabi kakhulu kangangokuba uJehova akasoze afuna ukusazi futhi ukude kakhulu nathi. Ngisho noDavide ngezinye izikhathi wayezizwa ngaleyo ndlela. (IHu. 38:​18, 21) Noma umuntu ozama ngobuqotho ukushintsha indlela aphila ngayo ukuze aphile ngemithetho kaNkulunkulu yokulunga angase azibuze, ‘Uma uNkulunkulu engiqonda ngempela, yini engamenza alindele ukuba ngiyeke indlela engiphila ngayo okunzima kangaka kimi ukuba ngiyiyeke?’

18. Kusizuzisa kanjani ukwamukela ukuthi uJehova usazi kangcono kunathi? (Bheka nezithombe.)

 ¹⁸ Singafunda ukwamukela ukuthi uJehova usazi kangcono kunathi futhi uyakwazi ukubona okuhle kithi, thina esingakwazi ukukubona. Nokho, nakuba ewabona amaphutha ethu futhi eqonda ukuthi kungani sizizwa noma senza ngendlela esenza ngayo, uyasithanda. (Roma 7:15) Lapho sikwazisa ngempela ukuthi uJehova uyabona ukuthi yiziphi izinto esingakwazi ukuzifeza esikhathini esizayo, siyoba namandla esiwadingayo ukuze simkhonze ngokwethembeka nangenjabulo.

19. Yini esiyaziyo nesiqiniseka ngayo ngoJehova?

¹⁹ Siyazi ukuthi uJehova uluthando. Asikungabazi nakancane lokho. (1 Joh. 4:8) Siyazi ukuthi imithetho yakhe yokulunga ibonisa ukuthi uyasithanda futhi uhlale esifunela okungcono. Siyazi ukuthi uJehova ufuna siphile phakade. Wasilungiselela isihlengo ukuze lokho kwenzeke. Isipho sesihlengo sisiqinisekisa ngokuthi singakwazi ukuphumelela ngisho noma sinamaphutha. (Roma 7:​24, 25) Siyazi nokuthi “uNkulunkulu mkhulu kunezinhliziyo zethu futhi wazi zonke izinto.” (1 Joh. 3:​19, 20) UJehova ubona yonke into ngathi futhi uyaqiniseka ukuthi singakwazi ukwenza intando yakhe.

20. Yini ezosisiza sigweme ukukhathazeka ngokungenasidingo?

²⁰ Ayikho into uJehova asifihlele yona okudingeka ngempela siyazi. Lapho ngesizotha samukela lelo qiniso, sigwema ukukhathazeka ngokungenasidingo ngento esingeke sikwazi ukuyilawula futhi sigxila kulokho okubaluleke ngempela. Uma senza kanjalo, sibonisa ukuthi simethemba ngokuphelele uJehova, “Lowo onolwazi oluphelele.” (Jobe 36:4) Nakuba singeke siziqonde ezinye izinto njengamanje, sibheke phambili esikhathini lapho esiyofunda khona izinto ezintsha kuNkulunkulu wethu Omkhulu futhi sifunde ngaye phakade.—UmSh. 3:11.