Levitikusi 20:1-27
20 UJehova waqhubeka ekhuluma noMose, wathi:
2 “Kufanele uthi kuma-Israyeli, ‘Noma yimuphi umuntu wakwa-Israyeli noma oyisifiki ohlala kwa-Israyeli, onikela nganoma iyiphi inzalo yakhe kuMoloki, kufanele abulawe nakanjani. + Abantu bezwe kufanele bamshaye ngamatshe aze afe.
3 Mina ngokwami ngiyomelana nalowo muntu, futhi ngiyombulala* ngoba unikele ngenye yenzalo yakhe kuMoloki, wangcolisa indawo yami engcwele + negama lami elingcwele.
4 Uma abantu bezwe bengavala amehlo abo ngamabomu kulokho okwenziwa yilowo muntu lapho enikela ngenzalo yakhe kuMoloki futhi bangambulali, +
5 nakanjani mina ngiyomelana nalowo muntu nomndeni wakhe. + Ngiyombulala* lowo muntu kanye nabo bonke abahlanganyela naye ekufebeni noMoloki.
6 “‘Ngokuqondene nomuntu ophendukela kwabasebenzelana nemimoya + nakubabikezeli bekusasa + ukuze afebe nabo ngokomoya,* nakanjani ngiyomelana nalowo muntu ngimbulale. *+
7 “‘Kumelwe nizingcwelise nibe ngcwele + ngoba nginguJehova uNkulunkulu wenu.
8 Kumelwe nigcine imithetho yami futhi niyenze. + NginguJehova oningcwelisayo. +
9 “‘Uma kukhona noma yimuphi umuntu oqalekisa uyise noma unina, kufanele abulawe nakanjani. + Ngenxa yokuthi uqalekise uyise noma unina, igazi lakhe liphezu kwakhe.
10 “‘Ngokuqondene nendoda ephinga nomfazi wenye indoda: Umuntu ophinga nomfazi wenye indoda kufanele abulawe nakanjani, isiphingi nesiphingikazi. +
11 Indoda elala nomkayise ithele uyise ngehlazo. *+ Bobabili kufanele babulawe nakanjani. Igazi labo liphezu kwabo.
12 Uma indoda ilala nomalokazana wayo, bobabili kufanele babulawe nakanjani. Baphule umthetho wemvelo. Igazi labo liphezu kwabo. +
13 “‘Uma indoda ilala nowesilisa ngendlela elala ngayo nowesifazane, bobabili benze into enyanyekayo. + Kufanele babulawe nakanjani. Igazi labo liphezu kwabo.
14 “‘Uma indoda ithatha owesifazane kanye nonina, kuyihlazo lokho. *+ Kufanele bayishise ngomlilo kanye nabo, + ukuze ukuziphatha okuyihlazo kungaqhubeki phakathi kwenu.
15 “‘Uma indoda ilala nesilwane, kufanele ibulawe nakanjani, kufanele nibulale naleso silwane. +
16 Uma owesifazane eya kunoma yisiphi isilwane ukuze alale naso, + kumelwe nimbulale owesifazane nesilwane. Kufanele babulawe nakanjani. Igazi labo liphezu kwabo.
17 “‘Uma indoda ilala nodadewabo, indodakazi kayise noma kanina, ibone ubunqunu bakhe, naye abone ubunqunu bayo, kuyihlazo. + Kumelwe babulawe* phambi kwabantu bakubo. Ithele udadewabo ngehlazo.* Kufanele iphendule ngesiphambeko sayo.
18 “‘Uma indoda ilala nowesifazane osesikhathini, bobabili bambule umthombo wegazi lakhe. + Kumelwe babulawe* bobabili.
19 “‘Akumelwe ulale nodadewabo kanyoko noma nodadewabo kayihlo, ngoba lokho kuyobe kuwukuthela isihlobo sakho segazi ngehlazo. + Kufanele baphendule ngesiphambeko sabo.
20 Indoda elala nomfazi womfowabo kayise ithele umfowabo kayise ngehlazo. *+ Kufanele baphendule ngesono sabo. Kufanele bafe bengenamntwana.
21 Uma indoda ithatha umkamfowabo, kuyinto enyanyekayo. + Ithele umfowabo ngehlazo.* Kufanele bangabi nabantwana.
22 “‘Kumelwe nigcine yonke imithetho yami nazo zonke izinqumo zami zokwahlulela + futhi nikwenze, + ukuze izwe enginiletha kulo ukuba nihlale kulo linganihlanzi linikhiphe. +
23 Akumelwe nihambe ngemithetho yezizwe engizixosha phambi kwenu; + ngoba zizenzile zonke lezi zinto futhi ngiyazenyanya. +
24 Yingakho ngithe kini: “Niyodla ifa lezwe lazo futhi mina ngiyolinika nina libe ifa lenu, izwe eligeleza ubisi noju. + NginguJehova uNkulunkulu wenu, onihlukanisile kwezinye izizwe.” +
25 Kumelwe nihlukanise phakathi kwesilwane esihlanzekile nesingcolile naphakathi kwenyoni engcolile nehlanzekile; + akumelwe nizenze nenyanyeke ngenxa yesilwane noma inyoni nanoma yini ehuquzela emhlabathini enginihlukanisele yona ngathi ingcolile. +
26 Kumelwe nibe ngcwele kimi ngoba mina Jehova ngingcwele + futhi ngiyanihlukanisa kwezinye izizwe ukuze nibe ngabami. +
27 “‘Noma iyiphi indoda noma owesifazane osebenzelana nemimoya noma obikezela ikusasa,* kufanele abulawe nakanjani. + Abantu kufanele bamshaye ngamatshe aze afe. Igazi lakhe liphezu kwakhe.’”
Imibhalo yaphansi
^ Noma, “ngiyomnquma phakathi kwabantu bakubo.”
^ Noma, “Ngiyomnquma phakathi kwabantu bakubo.”
^ Noma, “angathembeki kimi.”
^ Noma, “ngimnqume phakathi kwabantu bakubo.”
^ NgesiHebheru, “yambule ubunqunu bukayise.”
^ Noma, “kuwukuziphatha okuyihlazo; ichilo.”
^ Noma, “banqunywe.”
^ NgesiHebheru, “Yambule ubunqunu bukadadewabo.”
^ Noma, “banqunywe phakathi kwabantu bakubo.”
^ NgesiHebheru, “yambule ubunqunu bomfowabo kayise.”
^ NgesiHebheru, “Yambule ubunqunu bukamfowabo.”
^ Noma, “onomoya wokubikezela.”
